گه‌ڕان

Shadow Shadow
سیاسه‌تی

لێدوانی سەباح هەورامی لەبارەی دەستنیشانکردنی حاڵەتی ڤایرۆسی سارس لە سلێمانی

2020.11.20 - 15:56
لێدوانی سەباح هەورامی لەبارەی دەستنیشانکردنی حاڵەتی ڤایرۆسی سارس لە سلێمانی

ناس کورد-

بەڕێوەبەری گشتیی تەندروستیی سلێمانی ڕایگەیاند، هيچ بەڵگەيەکی زانستی نیە بۆ بوونی حاڵەتی تووشبوی ڤایرۆسی سارس و لێکۆڵینەوە لە بابەتەکە دەکەن.

 

لە ڕوونکردنەوەیەکدا د.صباح هەورامی، بەڕێوەبەری گشتیی تەندروستیی سلێمانی لە فەیسبوکی فەرمیی خۆی ڕایگەیاند: " هيچ بەڵگەيەکی زانستی لەبەر دەست نیە، بۆ بوونی حاڵەتی تووشبوی ڤایرۆسی سارس لە شاری سلێمانی."

 

بەڕێوەبەری گشتیی تەندروستیی سلێمانی ئاماژەی بەوەشكردووە، بەدواداچوونی ورد بۆ بابەتەکە دەکەن.

 

ئەمڕۆ هەینی لە بەشێک لە ماڵپەڕەکانی هەواڵ، ڕاگەیەندراوێک بەناوی دەزگای تەندروستیی پێشمەرگەوە بڵاوبووەوە و تیایدا هاتبوو: "لە تاقیگەکانی نەخۆشخانەی ئاسا، جگە لە کۆرۆنا حاڵەتی ڤایرۆسی سارسیش تۆمارکراوە و ڤایرۆسەکە بڵاوبووەتەوە."  

  

لەوبارەیەوە شەماڵ جەبار یاوەر، بەڕێوەبەری دەزگای تەنروستیی پێشمەرگە بە ناس کوردی ڕاگەیاند: "داوا لە میدیاکان دەکەم خەڵک نەترسێنن و بەرپرسیارانە مامەڵە بکەن، ئەوە بۆچوونی پزیشکێکی تاقیگەی نەخۆشخانەی ئاسا بووە و هێشتا یەکلایی نەبووەتەوە."  

  

ڕوونیشیکردەوە: " ئەو بۆچوونەش لەوەوە سەرچاوەی گرتووە کە هەندێک نەخۆش هەن نیشانەکانی کۆرۆنایان هەیە، بەڵام پشکنینەکانیان نێگەتیڤ دەردەچێت، بۆیە لەوەدا گومانێک هەیە کە ئەو کەسانە توشی ڤایرۆسی سارس بووبن، بەڵام ئەوە تائێستا گومانە و یەکلایی نەبووەتەوە."  

  

بەڕێوەبەری دەزگای تەندروستیی پێشمەرگە ئاماژەی بەوەشكرد: "لەگەڵ وەزیری تەندروستی قسەم کردووە و ئەو خۆی سەرپەرشتی ئەو پرسە دەکات و لەئێستادا سەرقاڵی لێکۆڵینەوەیەن لەوبارەیەوە."   

  

شەماڵ جەبار یاوەر جەختیشیکردەوە: "داوا لە هاووڵاتیان دەکەم بەهیچ شێوەیەک نەترسن و ڤایرۆسی سارس-یش هەروەک کۆرۆنایە، تەنها خۆیان بپارێزن و پابەندی ڕێنماییەکان بن."