گه‌ڕان

Shadow Shadow
سیاسه‌تی

سوپای ئازەربایجان چووە شارێکی قەرەباغ کە 30 ساڵە لەژێر دەسەڵاتی ئەرمینیادایە

2020.11.20 - 13:58
سوپای ئازەربایجان چووە شارێکی قەرەباغ کە 30 ساڵە لەژێر دەسەڵاتی ئەرمینیادایە

 ناس کورد-

وەزارەتی بەرگریی ئازەربایجان ڕایگەیاند، دوای داگیرکردنی لەلایەن ئەرمینیاوە بۆ ماوەی نزیکەی 30 ساڵ، سوپای وڵاتەکەی چووە نێو شاری ئاگدام لە هەرێمی قەرەباخ، ئەمەش لە چوارچێوەی ئەو رێککەوتنەی کە لە نێوان ئازەربایجان و ئەرمینیادا واژۆکراوە.

 

بەگوێرەی هەواڵێکی ئاژانسی" فرانس پریس" کە "ناس کورد" بەدواداچوونی بۆ کردووە ( 20ی تشرینی دووەمی 2020) ئاماژە بەوەکراوە: " بەرەبەیانی ئەمڕۆ (هەینی) جارێکی دیکە دوای 27 ساڵ سوپای ئازەربایجان گەڕایەوە نێو شاری ئاگدام، ئەوەش لە چوارچێوەی رێککەوتنی ئاشتیی هەمیشەییدا کە لەگەڵ ئەرمینیا بە سەرپەرشتیی روسیا واژۆکرا".

 

رۆژی 11ی تشرینی دووەمی 2020، ئیلهام عەلیێڤ، سەرۆکی ئازربایجان، لەوتارێکدا ڕایگەیاند، خشتەیەکیان بۆ کشانەوەی هێزەکانی ئەرمینیا داناوە کە لە کۆتایی ئەم مانگەدا جێبەجێ دەکرێت.

 

عەلیێڤ، لە دوای واژۆکردنی رێککەوتنەکە ئاشکرایکرد: " بەپێی رێککەوتنەکە، ئازەربایجان سێ شاری هەرێمی قەرەباخ بەدەستدەهێنێتەوە، کە بریتین لە کڵجڵار تاوەکو 15 تشرینی دووەم، هەروەها ئاگدام تاوەکو 20ی هەمان مانگ و لاچین تاوەکو یەکی کانوونی یەکەمی داهاتوو".

 

ڕۆژی 10ی تشرینی دووەمی 2020، هەریەکە لە ئەرمینیا، ئازەربایجان و روسیا، رێککەوتنی ئاشتییان راگەیاند و بەوەش لە هەرێمی قەرەباخ  لە نێوان هەردوو وڵات کۆتایی هات.

 

بەپێی رێککەوتنەکە ئەو ناوچە ئازەریانەی کە پێشتر ئەرمینیا دەستی بەسەردا گرتوون کەوتنەوە سەر سنوری ئەو وڵاتە و روسیاش، هێزە ئاشتیپارێزەکانی خۆی لەسەر سنوری نێوان هەردوو وڵات بڵاوەپێدەکات.

 

 ڤلادیمێر پووتین، سەرۆکی روسیا رێکەوتننامەی هەردوو وڵاتی بەسەرپەرشتی وڵاتەکەی دووپاتکردەوە و ئاشکرایکرد، هەموو پێکدادانێکی سەربازیی نێوان هەردوو وڵات رادەگیرێت، هێزەکان لە شوێنی ئێستای خۆیان دەمێننەوە و ئاشتیپارێزانی روسیا دەکەونە نێوانیانەوە.

 

لەگەڵ راگەیاندنەکەی سەرۆکی روسیادا، وەزارەتی بەرگریی ئەو وڵاتە ناردنی 1960 سەربازی روسی لەرێگەی ئاسمانەوە بۆ هەرێمی قەرەباخ راگەیاند.