گه‌ڕان

Shadow Shadow
سیاسه‌تی

هێرشێک لە پارتییەوە بۆسەر شیعەکان

فراکسیۆنى پارتی هێرش دەکات: شیعەکان خۆپەرستانە جڵەوى دەسەڵاتیان گرتووەتە دەست

2020.11.13 - 14:10
App store icon Play store icon Play store icon
فراکسیۆنى پارتی هێرش دەکات: شیعەکان خۆپەرستانە جڵەوى دەسەڵاتیان گرتووەتە دەست

ناس کورد-

وتەبێژی فراکسیۆنى پارتى هێرش دەکات سەر فراکسیۆنە شیعەکان بەوەى "تاکلایەنانە حوکمى عێراق دەکەن و پێشێلى بنەما دەستورییەکانیان کردووە"، ئەوەش مەترسییەکى گەورەى لەسەر داهاتووى عێراق و بنەماى پێکەوەژیان دروست کردووە.

کەناڵی ناس کورد لە تێلیگرام جۆین بکە   

 

ئارام بالەتەیى، وتەبێژی فراکسیۆنى پارتى لە پەرلەمانى عێراق لە لێدوانێکیدا بۆ میدیای فەرمی حزبەکەى کە ناس کورد بەدواداچوونی بۆ کردووە دەڵێت، "شیعەکان تاکلایەنانە و خۆپەرستانە جڵەوى دەسەڵاتیان گرتووەتە دەست و حوکمى عێراق دەکەن، بە ناوى زۆرینە ئەوەى مەبەستیان بێ لە پەرلەمان ئەنجامى دەدەن، ئەمەش پێشێلکردنى روون و ئاشکراى دەستوورى عێراقە، چونکە ئەو دەستوورە لەسەر بنەماکانى (هاوبەشى- هاوپەیمانى- یەکسانى) داڕێژراوە".

 

ڕاشیگەیاند: "ئەم هەنگاوەى لایەنە شیعەکان، پێشهاتێکى ترسناکە و عێراق بەرەو ئایندەیەکى نادیار و تاریک دەبات، چونکە ناکرێ پێکهاتەیەکى گرنگ و گەورەى وەکو کورد کە خاوەنى 60 کورسى پەرلەمانە ئەژماری بۆ نەکرێت، بڕیاری پەرلەمان سەبارەت بە تێپەڕکردنی یاساى پڕکردنەوەى کورتهێنانى دارایی، مەترسیەکى گەورەى لەسەر پێکەوەژیانى نەتەوەکان دەبێ لە عێراق، بۆیە دەبێ شیعە بەرپرسیارێتى ئەو دۆخە مەترسیدارە بگرێتە ئەستۆ".

 

باسی لەوەشکردووە کە "ئێمە گفتوگۆیەکى زۆرمان لەسەر ئەو پڕۆژەیە کرد کە حکومەت لەبارەى قەرزەوە ئاراستەى پەرلەمانى کردبوو، بەڵام شیعەکان لەبەرژەوەندى خۆیان دەستکاریان کرد، ئەوەى ویستیان لە پڕۆژەکەدا جێیان کردەوە و پڕۆژەکەیان خستە دەنگدانەوە و بە زۆرینەی دەنگ تێیان پەڕاند".

 

ڕونیشی کردووەتەوە کە "سەرجەم فراکسیۆنە شیعەکانى نێو پەرلەمانى عێراق بە هەناسەی خۆپەرستى کاردەکەن و هەموویان کۆک بوون لەسەر ئەو بڕیارەى کە دوێنێ دایان، کاتێک بڕیارەکە دەنگى زۆرینەى هێنا کەشێکیان لە نێو هۆڵى پەرلەمان دروست کردبوو، وایان دەزانى عێراق سەرکەوتنێکى گەورەى بەدەست هێناوە".