گه‌ڕان

Shadow Shadow
سیاسه‌تی

باسى هەڵوێستى یەکێتى دەکەن

هێزەکانى پارتى دوا بڕیارى خۆیان لەبارەى شەڕى پەکەکە ئاشکرادەکەن

2020.11.08 - 22:53
App store icon Play store icon Play store icon
هێزەکانى پارتى دوا بڕیارى خۆیان لەبارەى شەڕى پەکەکە ئاشکرادەکەن

ناس کورد-

فەرماندەى هێزەکانى 80ى پارتى رایگەیاند، بڕیارى شەڕیان نەداوە لەگەڵ پەکەکە، بەڵام دەیانەوێت ئەو ناوچانە کۆنتڕۆڵ بکەنەوە کە پەکەکە "دەستى بەسەردا گرتووە".

 

کەناڵی ناس کورد لە تێلیگرام جۆین بکە   

نەجات عەلى  (8ی تشرینی دووەمی 2020)  لە چاوپێکەوتنێکى تەلەفزیۆنیدا لەگەڵ کەناڵى رووداو کە ناس کورد بەدواداچوونى بۆ کردووە وتى "لەبەرنامەماندا نییە شەڕى پەکەکە بکەین و بڕیارى شەڕمان نەداوە، بەڵام ئەمە ماناى ئەوە نییە بوار بە پەکەکە بدەین تەجاوز بکاتە سەر دامەزراوەکانى هەرێم، ئەوە هێڵى سورە".

 

وتیشى "پەکەکە بۆشایی ئەمنى شەڕى داعشى لەسنورى بادینان قۆستووەتەوە و دەستى بەسەر هەندێ ناوچەدا گرتووە، دەمانەوێت ئەو ناوچانە بگەڕێنینەوە ژێر کۆنتڕۆڵى هێزەکانى پێشمەرگە".

 

نەجات عەلى دەڵێت "پەکەکە ئەو قوەتەى نییە کە شەڕى پێشمەرگە بکات، لەرووى سەربازییەوە شکستێکى گەورەى خواردووە بەرانبەر تورکیا، نامانەوێت ئەو بابەتە بگاتە ئاستى شەڕ، بەڵام پێویستە سنوریان بۆ دابنرێت".



سەبارەت بە هەڵوێستى یەکێتى و لایەنەکانى دیکە، نەجات عەلى جەختیکردەوە کە پێویستە هەڵوێستەکان یەکبخرێن و هەڵوێستى جدى ببینن "یەکێتى هەڵوێستێکى فەرمى نەبووە هەرچەندە هەندێ بەرپرس لێرە و لەوێ قسەیان کردووە".

 

4ی ئەم مانگە لە ڕوبەڕوبونەوەیەکی تەمومژاوی هێزەکانی نزیک لە پارتی دیموکراتی کوردستان و هێزەکانی پەکەکەدا لە چەمانکێ، پێشمەرگەیەک گیانیلەدەستدا و دوو پێشمەرگەی دیکەش برینداربوون.  

 

کۆمیتەى بەڕێوەبەرى پەکەکە (8ی تشرینی دووەمی 2020) لە بەیاننامەیەکدا رایگەیاند، "پێویستە هیچ کەسێک هێزەکانی پەکەکە تاقینەکاتەوە و حسابی ئەوە نەکات کە پەکەکە لاواز بووە".



ئاماژەى بەوەشکردووە "پێویست ناکات ئەو کەسانەی لە کۆشکەکاندا دانیشتوون بڵێن، پەکەکە پێویستە لە فڵان دەڤەری کوردستان بێت و لە فیسار دەڤەر نەبێت".

 

کۆمیتەى بەڕێوەبەرى پەکەکە ئاماژەى بەوەشکردووە "بانگەوازییان لە بەڕێوەبەری پەدەکە کردووە کە پێویستە پەیوەندیان لەگەڵ تورکیا بپچڕێنن و لەسەر بناغەی هەبوونی نەتەوەیی و دیموکراتی کورد، پەیوەندیەکان هەموار بکرێنەوە، بەڵام پەدەکە بە شێوەیەکی نەرێنی لەبەرانبەر بانگەوازەکانمان جوڵایەوە".

 

دەشڵێت "پارتى دوای خواکورک و حەفتانین لە گارە دەستی بە جموجۆڵی سەربازی کرد. ئەم دۆخەش بووەتە هەوڵێکی تێکدەرانە کە خزمەتی دوژمنانی کورد دەکات".