گه‌ڕان

Shadow Shadow
سیاسه‌تی

بە قاچاخ دەهێنرێن و نرخیان هەرزانە

زانیاری لەسەر ئەو ئۆتۆمبێلە بێ سەرەتایانەی شەقامەکانی هەرێمیان تەنیوە

2020.11.08 - 11:36
App store icon Play store icon Play store icon
زانیاری لەسەر ئەو ئۆتۆمبێلە بێ سەرەتایانەی شەقامەکانی هەرێمیان تەنیوە

ناس کورد-

شەقامەکانی هەولێر و سلێمانی پڕبوون لە ئۆتۆمبێلی بێ سەرەتا و بێ ژمارە و سەرجەمیان بەڕێگەی قاچاخ و لەبەرامبەر پێنج هەزار دۆلار بە کۆنتێنەری داخراو دەهێنرێنە ناوەوە و قاچاخچی تایبەت هەیە کە دەڵێت، "بە 50 وەرەقە بۆت دەهێنمە ئەمدیو مەرزەکە".

کەناڵی ناس کورد لە تێلیگرام جۆین بکە   

 

بەڕێوەبەری هاتوچۆی سلێمانی دەڵێت، تاوەکو ئێستا هیچ بڕیارێک نییە بۆ تۆمارکردنیان و دەستیان بەسەردا دەگیرێت، وتەبێژی هاتوچۆی هەولێریش ئاماژ بەوەدەکات، هەرێمی کوردستان سنوری نییە و هەموو شتێک بە ئاسانی دێتە ناوەوە.

 

ماوەی چەند هەفتەیەکە لە شەقامەکانی سلێمانی و هەولێر، چەند جۆرێک ئۆتۆمبێلی جۆری مێرسیدسی مۆدێل 2008 و لێگززی مۆدێل 2006 و چەند جۆرێکی دیکە بەبێ ژمارە و بێ سەرەتا لە شەقامەکاندا دەبینرێن و ڕۆژانەش دەهێنرێنە ناوەوە، لەکاتێکدا بەگوێرەی بڕیاری وەزارەتی ناوخۆ هاتنەناوەوەی ئۆتۆمبێلی مۆدێل 2018 و بەرەوخوار قەدەغەیە.

me_ga.php?id=1488

ناس کورد زانیویەتی، ئەو ئۆتۆمبێلانە لە ئیمارات دەکڕدرێن و دەکرێنە ناو کۆنتێنەری داخراو و لەسەرجەم دەروازە سنورییەکانەوە بە قاچاخ دەهێنرێنە هەرێم و لێرە نرخیان لەنێوان "130 وەرەقە بۆ زیاتر لە دوو دەفتەر دۆلار دۆلاردایە."

 

بەگوێرەی بەدواداچوونەکانی ناس کورد، ئۆتۆمبێلەکان هیچ سەرەتا و تۆمارێکیان لە بەڕێوەبەرایەتیی هاتوچۆ بۆ ناکریت، بەڵام تابلۆیەکی ژمارە کاتیی ساختەیان لێدەدرێت. 

 

کەسێک کە ئۆتۆمبێلێکی لەو جۆرەی کڕیوە بە ناس کوردی وت: "لەڕێگەی چەند کەسێکەوە قاچاخچییەکیان پێناساندنم و چوار ئۆتۆمبێلی بۆ من و سێ کەسی دیکە هێنا و جگە لە پارەی کڕینەکەی، تەنها بۆ هێنانە ناوەوەی هەر ئۆتۆمبێلێکیان بڕی 50 وەرەقە ئۆتۆمبێلەکەی لێ سەندین."

 

لەوبارەیەوە فەرەیدون عومەر، بەڕێوەبەری هاتوچۆی سلێمانی بە ناس کوردی ڕاگەیاند: "ئەو ئۆتۆمبێلانە لە سەرجەم سنورەکانی هەرێم و عێراقیشەوە بەشێوەی قاچاخ دەهێنرێنە ناوەوە، بەڵام هیچ تۆمارێکیان بۆ ناکرێت."

 

وتیشی: "بڕیارمان هەیە کە لە بازگە یاخود مەفرەزەکانماندا ئەو ئۆتۆمبێلانە دەستیان بەسەردا بگیرێت، چونکە ڕێگەپێندراو و نایاسایین."

 

دەربارەی ئەوەی هیچ بڕیارێک هەیە بۆ ئەوەی تۆمار بکرین و ژمارەیان پێبدرێت: "بەڕێوەبەری هاتوچۆی سلێمانی ئاماژەی بەوەکرد: "تاوەکو ئێستا هیچ بڕیارێک نییە بۆ تۆمارکردنیان، بەڵام ناشزانین چی ڕوودەدات و بڕیاری نوێ لەوبارەیەوە دەدرێت یاخود نا."

 

ئۆتۆمبێلەکان هەر لە سلێمانی نین، بەڵکو لە هەولێریش هەن و وتەبێژی هاتوچۆی هەولێریش دەڵیت، هەرێمی کوردستان سنوری نییە و هەموو شتێک دێتە ناوەوە.

 

فازڵ حاجی، وتەبێژی هاتوچۆی هەولێر بە ناس کوردی ڕاگەیاند: "بێگومان ئاگادارین لەو ئۆتۆمبێلە بێ سەرەتایانە و بەردەوامیش دێنە ناوەوە، بەڵام کە دێنە ناوەوە ئەوکات پێی دەزانین، چونکە بە قاچاخ دێن، نەوەک بە ئاشكرا."

 

وتیشی: "لە ئەمریکاش کاری قاچاخچێتی هەیە و تەنها لە هەرێم نییە، ناتوانرێت ڕێگە لەو کارە بگیرێت، هەرێم سنوری هەر نییە و هەموو شتێک دەهێنرێتە ناوەوە."

 

وتەبێژی هاتوچۆی هەولێریش بەهەمانشێوەی هاتوچۆی سلێمانی ئاماژەی بەوەکرد: "ئەو ئۆتۆمبێلانە لە بازگە و مەفرەزەکاندا دەستیان بەسەردا دەگیرێت و هیچ بڕیارێک نییە بۆ ئەوەی تۆمار بکرێن."