گه‌ڕان

Shadow Shadow
سیاسه‌تی

ڕاگەیەندراوێک لە هەپەگەوە

هەپەگە وردەکاریی ڕووداوەکەی چەمانکێ ئاشكرادەکات: ئەوان هێرشیان کرد

2020.11.07 - 18:52
App store icon Play store icon Play store icon
هەپەگە وردەکاریی ڕووداوەکەی چەمانکێ ئاشكرادەکات: ئەوان هێرشیان کرد

ناس کورد-

هێزەکانی پاراستنی گەل (هەپەگە) لە بارەی رووداوەکەی 4ی ئەم مانگەی گوندی بێبابێی سەر بە شارۆچکەی چەمانکێ ڕاگەیەندراوێکی بڵاوکردەوە و جەختییکردەوە کە هێزەکانیان هێرشیان نەکردووەتە سەر هیچ کەسێک، بەڵکو ئەوان هێرشیانکردووە، داواش دەکات، کێشەکان بە رێگای دیالۆگ چارەسەر بکەن.

کەناڵی ناس کورد لە تێلیگرام جۆین بکە   

 

ناوەندی راگەیاندن و چاپەمەنی هەپەگە (شەممە 7ی تشرینی دووەمی 2020) لەڕاگەیەندراوێکدا ڕایگەیاند:" هەندێک ڕێکخراو و دەزگای راگەیاندن باسیان لەوە کردووە کە لە 4ی تشرینی دووهەمی 2020دا لە ڕووداوێکدا لە نزیک گوندی بێبابێ سەر بە چەمانکێ، گوایە هێزەکانی ئێمە هێرشێکیان ئەنجامداوە، بەڵام ئەو هەواڵ و لێدوانانەی لەو بارەیەوە بڵاوکراونەتەوە، ناڕاستن."

 

ئاماژەی بەوەشكردووە: "هێزەکانمان هیچ هێرشێکیان ئەنجام نەداوە، بەڵکو ئەوان لە دوو قۆڵەوە بەشێوەی ئۆپڕاسیۆن هاتوونەتە ناو ئەو کەمپەی هێزەکانی ئێمەی تێدایە، رووداوەکە بەم شێوەیەیە."

 

هەپەگە لەڕاگەیەندراوەکەدا ئەوەشی خستووەتەڕوو: " ئێمە دڵگرانین لە ڕووداوێکی لەم چەشنە، پێشووتریش بۆ ئەوەی ڕووداوی بەمشێوەیە  ڕوونەدات، بە ڕێگای لێدوان و بانگەوازی هۆشداریمان دابوو."

 

جەختیشیکردووەتەوە: "ئێستاش دووپاتیدەکەینەوە کە ئۆپڕاسیۆنەکانی سەر کەمپەکانمان بوەستێنن و کێشەکان بە رێگای دیالۆگ چارەسەر بکەن."

 

ئەوەش لەکاتێکدایە، لە بەرواری 4ی ئەم مانگەدا و لە ڕووبەڕووبوونەوەیەکی تەمومژاوی هێزەکانی نزیک لە پارتی دیموکراتی کوردستان و هێزەکانی پەکەکەدا لە چەمانکێ، پێشمەرگەیەک گیانیلەدەستدا و دوو پێشمەرگەی دیکەش برینداربوون.