گه‌ڕان

Shadow Shadow
سیاسه‌تی

پەرلەمانی توركیا: خواردنەوەی ئاو لەلایەن پەرلەمانتارێکی جەهەپە دەمەقاڵێی دروستكرد

2019.05.10 - 16:59
ناس كورد- لە دانیشتنێكی پەرلەمانی توركیادا لەدوای ئەوەی پەرلەمانتارێكی جەهەپە لە كاتی قسەكردن و لە پەخشی راستەوخۆدا ئاوی خواردەوە كاردانەوەی بەدوای خۆیدا هێنا و پەرلەمانتارانی ئاكەپە كردیان بە دەمەقاڵێ‌ و پەرلەمانتارێكی هەدەپە هاتە دەنگ و داكۆكی لە پەرلەمانتارەكەی جەهەپە كرد. . لە دانیشتنەكەی پەرلەمانی توركیادا، توفان كوسی ئەندامی پەرلەمانی توركیا لە فراكسیۆنی پارتی گەلی كۆماری (جەهەپە) لەكاتی قسەكردنیدا ئاوی خواردەوە ناڕەزایەتی پەرلەمانتارەكانی ئاكەپەی بەدوای خۆیدا هێنا و بەهۆی خواردنەوەی ئاوەوە لە رەمەزان و لەناو هۆڵی پەرلەماندا كردیان بە دەمەقاڵێ‌. . پەرلەمانتارەكەی جەهەپە لەو كاتەدا لەبارەی بڕیارەكەی كۆمسیۆنی هەڵبژاردنەكانی توركیا قسەی دەكرد كە بڕیاری دووبارە ئەنجامدانەوەی هەڵبژاردنی لە شاری ئەستەنبوڵدا و لەكاتی قسەكردندا دەستی بۆ پەرداخە ئاوەكەی بەردەمی برد و تۆزێك ئاوی خواردەوە. . لەو بارەیەوە عمران كیلیچ پەرلەمانتاری پارتی داد و گەشەپێدان (ئاكەپە) نارەزایەتی دەربڕی و پێی وت "ئێرە بڵندگۆی توركیای موسڵمانە، پێویستە لەسەرت رێز لە نەریتەكانی مانگی رەمەزان بگریت". . لەبەرامبەردا تۆما ئیتچیلك پەرلەمانتاری پارتی گەلی دیموكرات (هەدەپە) داكۆكی لە پەرلەمانتارەكەی جەهەپە كرد و وتی "توركیا وڵاتێكی ئیسلامی نییە، ئێرە توركیای عەلمانییە، من موسڵمان نییم".