ناس كورد-
له‌باره‌ی ڕوداوه‌كانی چه‌مانكێ و پێكدادانی هێزه‌كانی پێشمه‌رگه و گه‌ریلاكانی په‌كه‌كه هه‌ریه‌ك له سه‌رۆكی په‌رله‌مانی كوردستان و جێگری سه‌رۆكی په‌رله‌مانی كوردستان دوو راگه‌یه‌ندراوی دژیه‌ك و جیاوازیان بڵاوكرده‌وه.
کەناڵی ناس کورد لە تێلیگرام جۆین بکە
(4ی تشرینی دووه‌می 2020) ڕێواز فایه‌ق، سه‌رۆكی په‌رله‌مانی كوردستان راگه‌یه‌ندراوێكی له‌باره‌ی ڕوداوه‌كه بڵاوكرده‌وه و جگه له سه‌ركۆنه‌كردنی شه‌ڕی براكوژی ڕاسته‌وخۆ هیچ یه‌كێك له هێزه شه‌ڕكه‌ره‌كانی به هۆكاری ئه‌و گرژییانه ناونه‌برد و هاوكات داوای یه‌كڕیزی لایه‌نه سیاسیه‌كان و كۆتایهێنان به گرژییه‌كان كرد.
پێشتر ناس كورد له‌سه‌رچاوه‌یه‌ك له پارتی دیموكراتی كوردستانه‌وه بڵاوی كرده‌وه كه پارتی نیگه‌رانه له‌و راگه‌یه‌ندراوه‌ی ڕێواز فایه‌ق به‌هۆی ئه‌وه‌ی په‌كه‌كه‌ی وه‌ك لایه‌نێكی هێرشكار و هۆكار له سه‌رهه‌ڵدانی گرژییه‌كان ناو نه‌بردووه.
هه‌ر بۆیه له‌دوای چه‌ند كاتژمێرێكی كه‌م له راگه‌یه‌ندراوه‌كه‌ی سه‌رۆكی په‌رله‌مان، هێمن هه‌ورامی جێگری سه‌رۆكی په‌رله‌مانی كوردستان راگه‌یه‌ندراوێكی جیاوازی بڵاوكرده‌وه و تیایدا گه‌ریلاكانی په‌كه‌كه‌ی به هێرشكار و ده‌ستدرێژیكاری سه‌ر هێزه‌كانی پێشمه‌رگه ناوبرد و داوای كرد كه ده‌ست له پێشێلكاریی و هێرش و ده‌ستدرێژییه به‌رده‌وامه‌كانیان بۆ سه‌ر خاك و خه‌ڵكی كوردستان هه‌ڵبگرن.
ڕاگەیاندراوێک لە هێمن هەورامی جێگرى سه‌رۆكی په‌رله‌مانى كوردستانه‌وه
هێرش و دەستدرێژیی ئەمڕۆی چەکدارانی پەکەکە بۆ سەر هێزی پێشمەرگەی کوردستان سەرکۆنە دەکەین و داوا دەکەین پەکەکە دەست لەپێشێلکاری و هێرش و دەستدرێژییە بەردەوامەکانی بۆ سەر خاک و خەڵکی هەرێمی کوردستان هەڵگرێت و چیتر نەبێتە کێشەو گرفت بۆ قەوارەی دەستووری و خەڵکی کوردستان.
هێرش و دەستدرێژیی پەکەکە بۆ سەر هێزی پێشمەرگەی کوردستان، کە تاکە هێزی شەرعی و دەستووریی هەرێمی کوردستانە، بەڵگەی ئەوەیە کە پەکەکە هەرگیز سڵ لەتێکدانی گیانی برایەتی و تەبایی و یەکڕیزیی کوردستانییانە ناکاتەوەو بەمەنتیقی هێرش و پەلاماردان و دەستدرێژی مامەڵە دەکات.
خەڵکی هەرێمی کوردستان و دامەزراوە شەرعییەکانی هەمیشە دووپاتیان کردووەتەوە کە پێویستە پەکەکە نەبێتە هۆکارێک بۆ هێنانەناوەوەی کێشەکان بۆ ناو خاکی هەرێمی کوردستان و بیانو نەداتە وڵاتانی دراوسێ، بەڵام سەرکێشییەکانی پەکەکەو گرفت دروستکردن هەرگیز دواییان نایەت و لەبری وەڵامدانەوەی دامەزراوە شەرعییەکان و هێزە کوردستانییەکان بەئەرێنی، کەچی هێرش و دەستدرێژی دەکەنە سەر هێزی پێشمەرگەی کوردستان.
لە کۆتاییدا وێڕای هاوخەمیمان بۆ خانەوادەی ئەو پێشمەرگانه‌ی کەئەمڕۆ بەهۆی دەستدرێژی و پەلاماردانەکەی پەکەکە شەهید بوون، هاوکات داوا لەخوای گەورە دەکەین بەبەهەشتیان شاد بکات و هیوای چاکبوونەوەی خێراش بۆ بریندارەکان دەخوازین.
هەرێمی کوردستان لەئێستادا لەهەوڵی بەردەوامدایە بۆ ڕووبەڕووبوونه‌وه‌ی قەیرانی ئابووری و تەندروستی و پاراستنی یەکڕیزی و تەبایی نێوان لایەنە سیاسییەکان، هاوکات بەرپرسیارێتیی هەموو لایەنە سیاسییەکانیشە بەرگری لە قەوارەی دەستووریی هەرێمی کوردستان بکەن و خاک و خەڵکی هەرێمی کوردستان بپارێزن.
هێمن هەورامی
جێگری سەرۆکی پەرلەمانی کوردستان
2020/11/4
