گه‌ڕان

Shadow Shadow
سیاسه‌تی

’’سۆراخ دەکەین’’

هەڵوێستى بەغدا لەسەر شەڕ و ئاڵۆزییەکانى پەکەکە و پارتى

2020.11.04 - 16:00
App store icon Play store icon Play store icon
هەڵوێستى بەغدا لەسەر شەڕ و ئاڵۆزییەکانى پەکەکە و پارتى

ناس کورد-

فەرماندەیی ئۆپراسیۆنە هاوبەشەکانى عێراق رایگەیاند، سۆراخى ئەو رووداوەدە دەکەن کە لەنێوان پێشمەرگە و پەکەکە روویداوە لەسنورى ئامێدى.

کەناڵی ناس کورد لە تێلیگرام جۆین بکە   

 

لە لێدوانێکى تایبەتدا بۆ ناس کورد لەسەر ڕوداوى شەڕو ئاڵۆزییەکانى نێوان پارتى و پەکەکە لەناوچەکانى دهۆک، لیوا تەحسین خەفاجى وتەبێژى فەرماندەى ئۆپراسیۆنە هاوبەشەکانى عێراق (4ى تشرینى دووەمى 2020) ڕایگەیاند، "ئاگامان لەو ڕوداوە نوێیەى نێوان پەکەکە و پارتى لەو سنورەدا نییە و دەست بە پەیوەندى گرتن لەسەر ئەو ڕوداوانە دەکەم و سۆراخى زیاتر دەکەین".

 

ئەوە لەکاتێکدا نیوەرۆى ئەمرۆ لە سنورى ناحیەى چەمانکێ شەڕ و پێکدادان لەنێوان هێزەکانى پێشمەرگە و گەریلا روویدا و زیانى گیانى لێکەوتەوە.

 

بەڕێوەبەری ڕاگەیاندن و ڕۆشنبیری لە وەزارەتی پێشمەرگە ڕاستی ڕووداوەکەى ناحیەی چەمانکێی ئاشکرا کرد و دەڵێت، "ئۆتۆمبێلێکی فەرماندەیی ژینگە بە ئەرێک چوونەتە ناوچەکە و لەوێ بەھۆی تەقینەوەیەكەوە، كە پەكەكە داینابوو، دوو ئەفسەر و جێگری ئەفسەرێكی پێشمەرگە بریندار بوونە."  

  

بابەكر فەقێ ئەحمەد لە لێدوانێکی تایبەتدا بۆ ناس کورد (4ی تشرینی دووەمی 2020) دەڵێت، "ئەمڕۆ هێزێکی فەرماندەیی ژینگە کە ئەرکی پاراستنی ژینگە و دارستانەکانە بە ئەرکێک خۆی چووەتە ناوچەی چەمانکێ، لەوێ بۆمبێكی پەكەكە بە هێزەکەدا تەقیوەتەوە و دوو ئەفسەر و جێگری ئەفسەرێك بریندار بوونە."      

  

وتیشی، "شۆفێری ئۆتۆمبێلەکە بە سەختی بریندار بووە."      

  

فەرماندەیی ژینگە هێزێکن سەر بە یەکەکەکانی هەشتای پارتییە و ئەرکی پاراستنی دارستانەکانە.      

  

بەڕێوەبەری ڕاگەیاندن و ڕۆشنبیری لە وەزارەتی پێشمەرگە جەختی کردووەتەوە کە "پەكەكە لە دوورەوە بە چەکی تەقەی لە شوێنی تەقینەوەکە کردووە، بەڵام ڕووداوەکە ھێرشی راستەوخۆ نەبووە وەكو ھێرشكردن بۆ سەر ھێزی پێشمەرگە."      

  

ئەوە لەکاتێکدایە، میدیاکانی پارتی بڵاویان کردەوە، هێزەکانی پەکەکە هێرشیان کردووەتە سەر بنکەیەکی پێشمەرگە، لە ئاکامدا پێشمەرگەیەک کوژراوە و سیانی تریش بریندار بوون.      

  

هاوکات تەلەفزیۆنی فەرمی پارتی ڕایگەیاندووە کە لە هێرشەکەدا "شەهید و بریندار هەن."          

  

هەروەها سەرچاوەیەکى دیکەى ئیداریی لەو سنورە بە ناس کوردى راگەیاند، کە شەڕ و پێکدادان لە سنورى چەمانکێ روویداوە، پێشمەرگەیەک کوژراوە و دووانی تریش بریندارن.          

  

هێشتا پەکەکە هیچ لێدوانێکى لەبارەى شەڕەکەوە بڵاونەکردووەتەوە، بەڵام ئاژانسى ڕۆژنیوزى نزیک لەپەکەکە ئەمڕۆ بڵاویکردووەتەوە، "هەڕەشەکانی پارتى بۆ هەڵگیرسانی شەڕی ناوخۆ زیادییان کردووە، جێگیرکردنی هێزێکی تایبەتی سەر بە سەرۆکی پارتى لە هەولێرەوە تا بارزان، بەوە لێکدەدرێتەوە کە ئاماژەیەک بێت بۆ ئامادەکارییەکانی پەدەکە بۆ هەڵگیرسانی شەڕ".          

  

ئەمە دووەم پێکدادانى نێوان پێشمەرگە و پەکەکەیە لەماوەى 10 رۆژدا، ڕۆژی 25ى تشرینى یەکەمى 2020 لەسنورى ئاکرێ پێکدادان لەنێوان هێزێکى پێشمەرگە و گەریلاکانى پەکەکە روویدا، لەکاتێکدا هێزەکانى پێشمەرگە خەریکى سەنگەر لێدان بوون لەو سنورە.