گه‌ڕان

Shadow Shadow
سیاسه‌تی

لە کەجەکەوە بۆ پارتی

کەجەکە وەڵامی پەیامەکەى بارزانی دایەوە: خواستی خۆی بۆ شەڕ دەرخست

2020.11.04 - 15:41
App store icon Play store icon Play store icon
کەجەکە وەڵامی پەیامەکەى بارزانی دایەوە: خواستی خۆی بۆ شەڕ دەرخست

ناس کورد-

هاوسەرۆکاتی کۆنسەری بەڕێوبەری کۆماجڤاکێن کوردستان–کەجەکە وەڵامی پەیامەکەى بارزانی دایەوە و دەڵێت، بارزانی نیەتی خۆی بۆ شەڕ لەدژی پەکەکە ڕاگەیاندووە، بەڵام ئەوان خۆیان بەدوور دەگرن لە هەرجۆرە ڕووبەڕوو بوونەوەیەک.

کەناڵی ناس کورد لە تێلیگرام جۆین بکە   

 

هاوسەرۆکاتی کۆنسەری بەڕێوبەری کۆماجڤاکێن کوردستان – کەجەکە لە ڕاگەیەنراوێکدا کە کۆپییەکی دەستی ناس کورد کەوتووە (4ی تشرینی دووەمی 2020) هاتووە، "کۆمیتەی بەڕێوەبەری پەکەکە و کۆنسەی بەڕێوەبەری کەجەکە لە ڕاگەیندراوەکانی خۆیاندا جەختیان کردبوەوە کە ئەوان هیچ کێشەیەکیان لەگەڵ پەدەکە و بەڕێوەبەرانی باشوری کوردستاندا نییە، ئەوان پەیوەندییەکانی نێوان پەدەکە و دەوڵەتی تورک و هەڵوێستە دژبەرەکانیان لە بەرامبەر بزووتنەوەی ئازادی کوردستان ڕەخنە کردووە."

 

دەشڵێت، "گەریلا شەنگالی لە دەست هیچ هێزێکی دیکە دەرنەهێناوە بەڵکو و لەدەستی داعش ڕزگاری کرد، بەو شێوازە پارتیمان لە بەرپرسیاریەتی کۆمەڵکوژی گەورەتر لەسەر ئێزدییەکان ڕزگار کرد، ئەم دەستێوەردانەی گەریلا لەهەمووان زیاتر شەرەفی پەدەکەی پاراست، لە پاش ڕێفراندۆمەکەی ساڵی 2017ش گەریلا هەتا دوایی کەرکوکی پاراست و هەرە دوایی گەریلا لە کەرکوک کشایەوە".

 

هاوسەرۆکاتی کۆنسەی بەڕێوەبەری کەجەکە لە ڕاگەیەندراوەکەیدا دەشڵێت، "جوڵاندنی هێز بە ڕوونی نیەتی شەڕخوازی مەسعود بارزانی لەدژی پەکەکە ئاشکرا دەکات و بۆ ئەم مەبەستەش لە بۆسەی ڕەخساندنی دەرفەتێکی لەبارن بۆ دەستپێکردنی شەڕ بەڵام ئەوان خۆیان لە هەرجۆرە ڕووبەڕوو بوونەوەیەک بەدوور دەگرن."

 

مەسعود بارزانی، سەرۆکی پارتی دیموکراتی کوردستان پەیامێکی ئاڕاستەی ڕای گشتیی کوردستان کرد و ڕایگەیاند، لەسەرەتاوە هەموو هاوکارییەکی پەکەکەیان کردووە، بەڵام ئەوانهەڵوێستێكی ناجوامێرانەیان نواند، دەشڵێت، نابێت حەرامکردنی شەڕی کورد و کورد بە هەڵە لێکبدرێتەوە.   

  

دەقی پەیامەکەی مەسعود بارزانی:  

  

پەیامێك لە سەرۆك بارزانی بۆ ڕای گشتیی كوردستان  

بەناوی خودای بەخشندە و میهرەبان  

  

لەم بارودۆخە ئاڵۆزەی ناوچەکە پێیدا تێدەپەرێت و لەو هەموو قەیرانەی ڕووی لە وڵاتی ئێمە كردووە، بە پێویستی دەزانم داوا لە هەموو کوردستانییەک بکەم کە بە شێوەیەکی واقعی ڕووبەڕووی ئەم دۆخە نالەبارە ببنەوەوە و، لەئاست بەرپرسیارتی مێژووییدا بن و بەرەو ئاساییکردنەوە و نەهێشتنی گرژی و ناخوشییەکان هەنگاو بنێن. ئێستا كوردستان لە هەموو كاتێك زیاتر پێویستی بە ڕۆڵە دڵسۆزییەكانیەتی بۆ ئەوەی وڵاتەكەیان لە ناخۆشی و پیلانەكان بپارێزن.  

  

مێژوو شاهیدی ئەوەمان بۆ دەدات و شانازی دەکەین کە شەڕی کورد و کوردمان حەرام کردووە چونکە گەلی كوردستان و هەموو لایەکمان زەرەری زۆرمان لە شەڕ و ناتەبایی بینیوە.  

  

بەڵام نابێت ئەم هەڵوێستەمان بە هەڵە لێک بدرێتەوە و ئیستغلال بكرێت بۆ ئەوەی تەحەدای دەستەڵاتی یاسایی هەرێمی کوردستان بکرێت و هەوڵی سەپاندنی ئیرادەیەكی چەكدارانەی نایاسایی بە سەر خەلکی کوردستان بدرێت. نابێ هەڵوێستی حەرامكردنی شەڕی كورد و كورد بەوە لێكبدرێتەوە كە سەقامگیری و ئاساییشی شار و شارۆچکە و دێهاتەکانمان تێک بدرێت و هاووڵاتیانمان ناچار بکرێن ماڵ و شوێنەکانیان بە جێ بێڵن و ببنە قوربانی و بە ناحەق شەهید بکرێن و كەسیش دەنگ نەكات.  

  

دوای هێرشی دڕندانەی تیروریستانی داعش، پێشمەرگە قارەمانەکانی کوردستان ڕوویان كردە بەرەکانی شەری دژی تیروریستان و زۆر لە ناوچە سنوورییەکان چۆڵ کران. بە داخەوە لەو کاتەوە لە جیاتی ئەوەی پشتیوانی ئەزمونی هەرێمی کوردستان بکەن، چەکدارانی پەکەکە ئەم ناوچە سنووریانە و دواتر هەندێک ناوچەی تریش یان داگیر کرد و خویان وەک جێگرەوەی حکوومەت سەپاند و ڕێگریان لە خەڵک کرد ماڵ و دێهاتەکانیان ئاوەدان بکەنەوە و ئەگەر سەردانی ناوچەکانیشیان بكەنەوە باج و سەرانەیان لێ وەر دەگرن. بێگوومان ئەم ڕەفتارانە جێگای قبووڵكردن نییە. هەڵوێستی نیشتیمانپەروەرانە و وڵاتپارێزانە بە کردەوە دیار دەکەوێت نەک بە قسە و وتار.  

  

لێرەدا پێویستە بە بیریان بێتەوە کاتێک لە سەرەتای دەستکردن بە چالاکیەکانیان بوون، ئێمە هەموو جۆرە هاوکارییەکمان کردن. ئەوان بە پێچەوانەوە هەڵوێستێکی ناجوامێرانەیان نواند و دواتر لە چەندین قوناغدا شەڕیشیان بەسەردا سەپاندین و لە ئەنجامدا هەموو لایەک زەرەرمەند بوین.  

  

باشترین هەڵوێست لەم کاتەدا ڕێز گرتنە لە دەستەڵاتی شەرعی و یاسایی هەرێم و هەروەها چۆڵكردنی هەموو ئەو ناوچانەیە کە لە ڕێگەی سەپاندنی هێزی چەکداری داگیر كراون و بونەتە جێگەی مەترسی بو هاووڵاتیانی هەرێمی کوردستان. ئێستاشی لەگەڵدا بێت سەدان گوند بەهۆی بوونی چەکدارەکانی پەکەکەوە ئاوەدان نەکراونەتەوە و كراونەتە گوڕەپانی شەڕ و پێکدادان.  

  

لێرەدا داوا لە هەمو لایەک دەکەم بو ئەوەی بارودوخی وڵاتەکەمان لەمە زیاتر تێک نەچێت و شوێنە وێرانکراوەکان ئاوەدان بکرێنەوە و ڕێ لە گرژیی زیاتر و ڕووداوی نەخوازراو بگیرێت پێویستە ڕێگە بە خۆسەپاندنی نایاسایی هیچ لایەک نەدەن و پشتیوانی لە خەبات و قوربانی پێشمەرگە و گەلی ستەملێکراومان بکەن و لە ئاستی بەرپرسیارێتیی ئەم قوناغەدا بن.  

  

مسعود بارزانی  

2ـی تشرینی دووەمی 2020