گه‌ڕان

Shadow Shadow
سیاسه‌تی

ئێستا دۆخەکە چۆنە؟

بەڕێوەبەری ناحیەی چەمانکێ وردەکاری ڕووداوەکە دەگێڕێتەوە (ڤیدیۆ)

2020.11.04 - 14:44
App store icon Play store icon Play store icon
بەڕێوەبەری ناحیەی چەمانکێ وردەکاری ڕووداوەکە دەگێڕێتەوە (ڤیدیۆ)

ناس کورد-

بەڕێوەبەری ناحیەی چەمانجێ لە قەزای ئامێدی دەڵێت، لەدوای تەقینەوەی بۆمبەکە بە ئۆتۆمبێلێکی هێزەکانی پێشمەرگە، شەڕ و پێکدادان لەنێوان ئەوان و پەکەکە ڕوویداوە، سەرچاوەیەکى ئیدارییش لە ناوچەکە جەخت دەکاتەوە کە ئێستا ناوچەکە ئارام بوەتەوە و هیچ پێکدادانێکى تر رووینەداوە.

کەناڵی ناس کورد لە تێلیگرام جۆین بکە   

 

ئەو سەرچاوەیە بە مەرجی بڵاونەکردنەوەی ناوەکەى بە ناس کورد (4ی تشرینی دووەمی 2020) وت، "ئەوەى روویداوە تەقینەوەى بۆمبێک بووە بە هێزێکى پێشمەرگەدا و دواتر تەقە لەو هێزە کراوە و بەهۆیەوە چەند پێشمەرگەیەک برینداربوون."

 

هاوکات لە کۆنفرانسێکی ڕۆژنامەنوسیدا بۆ میدیایکانی حزبەکەى کە ناس کورد بەدواداچوونی بۆ کردووە، ئەلەند ئەمیر، بەڕێوەبەری ناحیەی چەمانکێ دەڵێت، لەدوای تەقینەوەی بۆمبەکە بە ئۆتۆمبێلی هێزەکانی پێشمەرگە و برینداربوونی چەند پێشمەرگەیەک، "شەڕە تەقە لەنێوان هەردوولا ڕوویداوە بەڵام هیچ زیانێکی نەبووە."

 

دەشڵێت، هێزەکانی پێشمەرگە ویستوویانە سەردانی بنکەکانی خۆیان بکەن لە سنوری ناحیەکە، لەسەر جادەکە پەکەکە تەقینەوەی بۆ داناون و تەقیوەتەوە پێیاندا، دوای تەقینەوەش، هەندێک شەڕ و پێکدادان ڕوویداوە."

 

جەختی کردەوە کە ئەوە یەکەمجارە "پەکەکە تەقینەوە بۆ پێشمەرگە دادەنێت."

 

 

بەڕێوەبەری ڕاگەیاندن و ڕۆشنبیری لە وەزارەتی پێشمەرگە ڕاستی ڕووداوەکەى ناحیەی چەمانکێی ئاشکرا کرد و دەڵێت، "ئۆتۆمبێلێکی فەرماندەیی ژینگە بە ئەرێک چوونەتە ناوچەکە و لەوێ بەھۆی تەقینەوەیەكەوە، كە پەكەكە داینابوو، دوو ئەفسەر و جێگری ئەفسەرێكی پێشمەرگە بریندار بوونە."  

  

بابەكر فەقێ ئەحمەد لە لێدوانێکی تایبەتدا بۆ ناس کورد (4ی تشرینی دووەمی 2020) دەڵێت، "ئەمڕۆ هێزێکی فەرماندەیی ژینگە کە ئەرکی پاراستنی ژینگە و دارستانەکانە بە ئەرکێک خۆی چووەتە ناوچەی چەمانکێ، لەوێ بۆمبێكی پەكەكە بە هێزەکەدا تەقیوەتەوە و دوو ئەفسەر و جێگری ئەفسەرێك بریندار بوونە."  

  

وتیشی، "شۆفێری ئۆتۆمبێلەکە بە سەختی بریندار بووە."  

  

فەرماندەیی ژینگە هێزێکن سەر بە یەکەکەکانی هەشتای پارتییە و ئەرکی پاراستنی دارستانەکانە.  

  

بەڕێوەبەری ڕاگەیاندن و ڕۆشنبیری لە وەزارەتی پێشمەرگە جەختی کردووەتەوە کە "پەكەكە لە دوورەوە بە چەکی تەقەی لە شوێنی تەقینەوەکە کردووە، بەڵام ڕووداوەکە ھێرشی راستەوخۆ نەبووە وەكو ھێرشكردن بۆ سەر ھێزی پێشمەرگە."  

  

ئەوە لەکاتێکدایە، میدیاکانی پارتی بڵاویان کردەوە، هێزەکانی پەکەکە هێرشیان کردووەتە سەر بنکەیەکی پێشمەرگە، لە ئاکامدا پێشمەرگەیەک کوژراوە و سیانی تریش بریندار بوون.  

  

هاوکات تەلەفزیۆنی فەرمی پارتی ڕایگەیاندووە کە لە هێرشەکەدا "شەهید و بریندار هەن."      

  

هەروەها سەرچاوەیەکى دیکەى ئیداریی لەو سنورە بە ناس کوردى راگەیاند، کە شەڕ و پێکدادان لە سنورى چەمانکێ روویداوە، پێشمەرگەیەک کوژراوە و دووانی تریش بریندارن.      

  

هێشتا پەکەکە هیچ لێدوانێکى لەبارەى شەڕەکەوە بڵاونەکردووەتەوە، بەڵام ئاژانسى ڕۆژنیوزى نزیک لەپەکەکە ئەمڕۆ بڵاویکردووەتەوە، "هەڕەشەکانی پارتى بۆ هەڵگیرسانی شەڕی ناوخۆ زیادییان کردووە، جێگیرکردنی هێزێکی تایبەتی سەر بە سەرۆکی پارتى لە هەولێرەوە تا بارزان، بەوە لێکدەدرێتەوە کە ئاماژەیەک بێت بۆ ئامادەکارییەکانی پەدەکە بۆ هەڵگیرسانی شەڕ".      

  

ئەمە دووەم پێکدادانى نێوان پێشمەرگە و پەکەکەیە لەماوەى 10 رۆژدا، ڕۆژی 25ى تشرینى یەکەمى 2020 لەسنورى ئاکرێ پێکدادان لەنێوان هێزێکى پێشمەرگە و گەریلاکانى پەکەکە روویدا، لەکاتێکدا هێزەکانى پێشمەرگە خەریکى سەنگەر لێدان بوون لەو سنورە.