گه‌ڕان

Shadow Shadow
سیاسه‌تی

’’دەستی لەگەڵ حەشد تێکەڵ کردووە’’

پارتی باس لە ’’هەڕەشەى سەربازیی پەکەکە بۆ سەر هەولێر’’ دەکات

2020.11.04 - 09:30
App store icon Play store icon Play store icon
پارتی باس لە ’’هەڕەشەى سەربازیی پەکەکە بۆ سەر هەولێر’’ دەکات

ناس کورد-

بەرپرسێکى پارتى ڕایگەیاند، بە سەربازگەکردنى کەمپى مەخمور لەلایەن پەکەکەوە، هەڕەشەیە بۆ سەر شارى هەولێر.

کەناڵی ناس کورد لە تێلیگرام جۆین بکە   

 

تەلەفزیۆنى کوردستان تیڤى فەرمى پارتى لە زارى  كرمانج عه‌بدوڵا، به‌رپرسی لقی بیست و سێی قه‌ره‌چووغی پارتییەوە گواستییەوە، "په‌كه‌كه‌ كه‌مپی مه‌خموری كردووه‌ته‌ سه‌ربازگه‌ ئه‌مه‌ش بووەته‌ جێگه‌ی نیگه‌رانی به‌شێك له‌ دانیشتووانی كه‌مپه‌كه‌".

 

ئاماژەى بەوەشکردووە، "په‌كه‌كه‌ ده‌ستی له‌گه‌ڵ چه‌كدارانی حه‌شدی شه‌عبی تێكه‌ڵ كردووه‌، ئه‌مه‌ش مه‌ترسی گه‌وره‌ بۆ شارۆچكه‌ی مه‌خمور و ده‌وروبه‌ری دروست ده‌كات ئه‌وكات هه‌ڕه‌شه‌یه‌ بۆ سه‌ر شاری هه‌ولێریش".

 

ماوەى چەند هەفتەیەکە گرژیی و ئاڵۆزییەکانى پارتى و پەکەکە گەیشتووەتە لوتکە و هەردوکیان هۆشداری دەدەن لە روودانى شەڕ و هێزەکانیان بەرانبەر یەک کۆکردووەتەوە.

 

بەسێ هۆزات، هاوسەرۆکی دەستەى بەڕێوەبەری کەجەکە رایگەیاند (3 تشرینی دووەمی 2020)، ئەوەى ئێستا پارتى ئەنجامی دەدات ئامادەکارییە بۆ شەڕ. "دۆخی ئێستا زۆر مەترسیدارە. ئەو رەفتار و نزیکایەتییەى ئێستا لە خۆیانی نیشان دەدەن وەک کەشی هێرشکردنێکی بەرفراوانە لەگەڵ دەوڵەتی تورکدا. هەموو ئامادەکارییەکانیان لەسەر ئەو بنەمایەیە، ئەوە ناوی راگەیاندنی شەڕە".  

  

وتیشى "پلانێکی وەها کۆتایی بە پەدەکەش دەهێنێت. هەموو دەستکەوتەکانی باشووری کوردستانیش لە ناو دەبات. پێگە و قەوارەی کوردستانی فیدراڵیش لەناو دەبات، شتێک بە ناوی کوردستانی فیدراڵەوە نامێنێت".  

 

لەدوای جوڵاندنی هێز و هەڕەشە، پەکەکە و پارتی کەوتوونەتە وەڵام و وەڵامکاری، مەسعود بارزانی لە پەیامێکدا وەڵامی پەکەکەى دایەوە و ڕایگەیاند (2ی تشرینی دووەمی 2020)، لەسەرەتاوە هەموو هاوکارییەکی پەکەکەیان کردووە، بەڵام ئەوان هەڵوێستێكی "" نواند.        

  

مەسعود بارزانی، سەرۆکى پارتی دیموکراتی کوردستان لە پەیامەکەیدا دەڵێت، "مێژوو شاهیدی ئەوەمان بۆ دەدات و شانازی دەکەین کە شەڕی کورد و کوردمان حەرام کردووە، بەڵام نابێت ئەم هەڵوێستەمان بە هەڵە لێک بدرێتەوە و ئیستغلال بكرێت بۆ ئەوەی تەحەدای دەستەڵاتی یاسایی هەرێمی کوردستان بکرێت و هەوڵی سەپاندنی ئیرادەیەكی چەكدارانەی نایاسایی بە سەر خەلکی کوردستان بدرێت."        

  

میدیای فەرمی پەکەکەش دەقی پەیامەکەى بڵاوکردووەتەوە، بەڵام شیکردنەوەی بۆ کردووە و دەڵێت، "دوای بانگەوازی پەکەکە بۆ گفتوگۆ و ڕێگرتن لە شەڕ، مەسعود بارزانی وەڵامی دایەوە، بەڵام بەهیچ جۆرێک باسی لە گفتوگۆ نەکرد."        

  

"بەڵامەکەی" میدیای پەکەکە ئاماژەیە بۆئەوەى پەیامەکەى بارزانی دۆخەکەی بەرەو هێوربوونەوە نەبردووە، "چونکە هیچ باسێکی گفتوگۆی تێدا نییە".        

  

پەیامی بارزانی لە وەڵامی موراد قەرەیلان، ئەندامی کۆنسەی بەڕێوبەریی پەکەکە بوو "لەبارەی جوڵەی هێزەکانی پارتی لە گارێ" و داوای بۆچوونی ناوبراوی کرد لەسەر شەڕی براکوژی و ئامادەیی پەکەکەشی بۆ گفتوگۆ نیشاندا.        

  

پەیوەندییەکانى پارتى و پەکەکە کە هەردووکیان لەمانگى ئابدا دامەزراون (پەکەکە 15ى ئابی 1984، پارتى 16ى ئابی 1946)، بەدرێژایی نزیکەى چوار دەیەى ڕابردوو هەڵکشان و داکشانى زۆرى بەخۆوە بینیوە تا گەیشتووەتە شەڕى ناوخۆى نێوانیان.        

  

مێژووى سەرهەڵدانى پەیوەندى نێوان ئەو دوو پارتە دەگەرێتەوە بۆ هەشتاکانەى سەدەى ڕابردوو، کە رێککەوتنى هەردوولاى لێکەوتەوە، بەڵام لەساڵى 1985 دواى ئۆپراسیۆنێکى سەربازى تورکیا دژى پەکەکە، رێککەوتنەکە کۆتایی پێهات و گرژى نێوان هەردوو حزبەکە دەستیپێکردەوە و کە تا سەرەتاى نەوەدەکان بەردەوام بوو، هەندێکجار پێکدادانى چەکدارى لەنێوانیان روویدەدا.        

  

ساڵێک دواتر و لەساڵى 1991 دواى دەستپێکردنى ئۆپراسیۆنێکى سەربازى تورکیا، شەڕێکى فراوان کە چەندین ساڵى خایاند لەنێوان هەردوولا هەڵگیرسا تا ساڵى 1997 کە رێککەوتن لەسەر کۆتایی هێنان بەشەڕ.        

  

گرژییەکانى پەکەکە و پارتى لەدواى هێرشەکانى داعش لەساڵى 2014 و کۆتایی هاتن بەو شەڕە، پێینایە قۆناغێکى نوێوە و پەڕیەوە بۆ رۆژئاواى کوردستان دواى ئەو ئەزمونە خۆبەرێوەبەرییەى لەناوچە کوردییەکان دروستببوو، کە پارتى بە دەسەڵاتى پەکەکە ناویدەبات و پشتیوانى لەچەند حزبێک دەکات لەو بەشەى کوردستان کە لەگەڵ دەسەڵاتى خۆبەرێوەبەرى دان بەیەکتردا نانێن.        

  

هەروەها لەبەشێک لەو ناوچانەى لەداعش پاککرانەوە، بەتایبەتى لە سنورى شنگال چەند جارێک گرژى و ئالۆزى لەنێوان پارتى و پەکەکە روویداوە تا ئاستى پێکدادانى چەکدارى.