گه‌ڕان

Shadow Shadow
سیاسه‌تی

دواین زانیاری لە ناس کوردەوە

بۆریە تەقێنراوەکەى هەرێم هێشتا نەوتی لێ دەچۆڕێت و چاک نەکراوەتەوە

2020.11.03 - 21:29
App store icon Play store icon Play store icon
بۆریە تەقێنراوەکەى هەرێم هێشتا نەوتی لێ دەچۆڕێت و چاک نەکراوەتەوە

ناس کورد-

لەدوای نزیکەی هەفتەیەک لە تەقاندنەوەی بۆری نەوتی هەرێم، تاوەکو ئێستا بۆرییەکە چاک نەکراوەتەوە و هەناردەی نەوتی هەرێمیش وەستاوە، ئەندامێکی لیژنەی وزە و سامانە سروشتییەکانی پەرلەمانیش دەڵێت، بەوهۆیەوە ڕۆژانە دەیان ملیۆن دۆلار زیان بەر هەرێم دەکەوێت و ناشزانرێت کەی بۆرییەکە چاک دەکرێتەوە.

کەناڵی ناس کورد لە تێلیگرام جۆین بکە   

 

ڕۆژی هەنیی ڕابردوو 30ی تشرینی یەکەمی 2020، حکومەتی هەرێم ڕایگەیاند، ڕۆژی چوارشەممە 28ی تشرینی یەکەمی 2020، بۆری نەوتی هەرێم تەقێندراوەتەوە و هەناردەی نەوتی هەرێم وەستاوە.

 

ڕێبوار بابکەیی، ئەندامی لیژنەی وزە و سامانە سروشتییەکان لە پەرلەمانی کوردستان (سێشەممە 3ی تشرینی دووەمی 2020) بە ناس کوردی ڕایگەیاند: "ئەوەندەی زانیاریمان هەبێت تاوەکو ئێستا بۆرییەکە چاکنەکراوەتەوە و هەناردەی نەوتی هەرێم هەر وەستاوە، بەوهۆیەشەوە ڕۆژانە زیاتر لە 10 ملیۆن دۆلار زیان بە داهاتی هەرێمی کوردستان دەگات."

 

وتیشی، چاککردنەوەی بۆرییەکە ئەوەندە ئاسان نییە کە بە چەند ڕۆژێکی کەم چاکبکرێتەوە، هیچ کاتێکیش دیارینەکراوە بۆ وادەی چاککردنەوەی و دەستپێکردنەوەی هەناردەی نەوت.

 

لە کابینەی هەشتەمی حکومەتی هەرێمی کوردستان بە سەرۆکایەتی نێچیرڤان بارزانی، بۆری نەوتی هەرێمی کوردستان فرۆشرا بە کەرتی تایبەت و لەئێستادا بۆری نەوتی هەرێم موڵکی کۆمپانیایە.

 

سەبارەت بە تێچووی چاککردنەوەی بۆرییەکە، بابکەیی باسی لەوەکرد: "بۆ ئەو پرسە پێویستە حکومەت و کۆمپانیان خاوەن بۆرییەکە بگەڕێنەوە سەر ناوەڕۆکی ئەو ڕێککەوتنەی کە کردوویانە، هەروەها کۆمپانیاکانی پاراستنی بۆرییەکەش دەکەونە نێو ئەو پرسەوە."

 

"ئەو بەشەی کە دەکەوێت دیوی تورکیا دەکەوێتە ئەستۆی کۆمپانیا، بەڵام بۆ بەشی هەرێمی کوردستان هێشتا ڕوون نییە و پێویستە لایەنی پەیوەندیداری ئەو پرسە گفتوگۆی لەسەر بکەن."، ڕێبوار بابکەیی وای وت.

 

ئەو ئەندامەی لیژنەی وزە و سامانە سروشتییەکان ئاماژەی بەوەشکرد: "بەداخەوە وەک لیژنەکەمان زانیاری وردمان لەبەردەستدا نییە سەبارەت بەو پرسە و پێویست بوو دانیشتنێکی لیژنەکە هەبێت لەوبارەیەوە و پەرلەمانی کوردستانیش هەڵوێستی هەبێت، بەڵام بەداخەوە پەرلەمان بێدەنگی هەڵبژارد."

 

لەڕاگەیەندراوەکەی حکومەتی هەرێمی کوردستاندا ئاماژە بەوەکرابوو: " حکومەتی هەرێمی کوردستان ئەم کردەوە تێرۆریستییە شەرمەزار دەکات و پێی وایە ئەم جۆرە کردەوانە دۆخی هەرێم و ناوچەکە زیاتر ئاڵۆز دەکەن، بەهیچ شێوەیەکیش رێگە نادەن هەڕەشە لە بەرژەوەندییەکانی بکرێت و دەست بۆ قوتی خەڵکی کوردستان ببرێت."