گه‌ڕان

Shadow Shadow
سیاسه‌تی

یەکێتى دەترسێت

لە کەجەکەوە بۆ پارتى: راگەیاندنى شەڕ و نەمانى قەوارەى هەرێم

2020.11.03 - 15:47
App store icon Play store icon Play store icon
لە کەجەکەوە بۆ پارتى: راگەیاندنى شەڕ و نەمانى قەوارەى هەرێم

ناس کورد-

بەسێ هۆزات هاوسەرۆکی دەستەى بەڕێوەبەری کەجەکە هۆشداریدا لەوەى هەڵگیرسانى شەڕ لەنێوان پارتى و پەکەکە، دەبێتە هۆى "نەمانى" قەوارەى هەرێمى کوردستان و دەڵێت یەکێتى لەو دۆخە "دەترسێت".

 

کەناڵی ناس کورد لە تێلیگرام جۆین بکە   

 

 

 

بەپێی ئاژانسى فورات نیوزى سەر بە پەکەکە، بەسێ هۆزات رایگەیاندووە (3 تشرینی دووەمی 2020)، ئەوەى ئێستا پارتى ئەنجامی دەدات ئامادەکارییە بۆ شەڕ. "دۆخی ئێستا زۆر مەترسیدارە. ئەو رەفتار و نزیکایەتییەى ئێستا لە خۆیانی نیشان دەدەن وەک کەشی هێرشکردنێکی بەرفراوانە لەگەڵ دەوڵەتی تورکدا. هەموو ئامادەکارییەکانیان لەسەر ئەو بنەمایەیە، ئەوە ناوی راگەیاندنی شەڕە".

 

وتیشى "پلانێکی وەها کۆتایی بە پەدەکەش دەهێنێت. هەموو دەستکەوتەکانی باشووری کوردستانیش لە ناو دەبات. پێگە و قەوارەی کوردستانی فیدراڵیش لەناو دەبات، شتێک بە ناوی کوردستانی فیدراڵەوە نامێنێت".

 

بەرپرسەکەى کەجەکە دەڵێت "ئێستا لە زۆرێک لە شوێنەکانی گارە دا هێزەکانی زێرەڤانی جێگیرکراون. ئەو هێزانەى پێشمەرگە کە ماوەیەک لەوە پێش ناردبونیان بۆ ناوچەکانی پاراستنی مەدیا کشانەوە، لە بریی ئەوان هێزەکانی زێرەڤانی جێگیرکران".

 

دەشڵێت "لەوناوچانەدا کە دەوڵەتی تورک ناتوانێت خۆی تیادا بگرێت، هێزی زێرەڤانیان تیادا جێگیر دەکرێت. لە نێوان ناوچەکانی گەریلادا جێگیریان دەکەن. پەیوەندیی ناوچەیەک لەگەڵ ناوچەیەکی تر دەپچڕێنن. هەوڵ دەدەن هێڵی هاتن و رۆیشتن بگرن. هەوڵ دەدەن گەریلا لە شوێنێکدا گیر بدەن و لەگەڵ دەوڵەتى تورک پێکەوە هێرشیان بکەنە سەر و لە ناویان ببەن".

 

بەوتەى بەسێ هۆزات، "یەکێتی لەو دۆخە دەترسێت، چونکە باشوور داگیر دەکرێت".

 

لەدوای جوڵاندنی هێز و هەڕەشە، پەکەکە و پارتی کەوتوونەتە وەڵام و وەڵامکاری، مەسعود بارزانی لە پەیامێکدا وەڵامی پەکەکەى دایەوە و ڕایگەیاند (2ی تشرینی دووەمی 2020)، لەسەرەتاوە هەموو هاوکارییەکی پەکەکەیان کردووە، بەڵام ئەوان هەڵوێستێكی "" نواند.      

  

مەسعود بارزانی، سەرۆکى پارتی دیموکراتی کوردستان لە پەیامەکەیدا دەڵێت، "مێژوو شاهیدی ئەوەمان بۆ دەدات و شانازی دەکەین کە شەڕی کورد و کوردمان حەرام کردووە، بەڵام نابێت ئەم هەڵوێستەمان بە هەڵە لێک بدرێتەوە و ئیستغلال بكرێت بۆ ئەوەی تەحەدای دەستەڵاتی یاسایی هەرێمی کوردستان بکرێت و هەوڵی سەپاندنی ئیرادەیەكی چەكدارانەی نایاسایی بە سەر خەلکی کوردستان بدرێت."      

  

میدیای فەرمی پەکەکەش دەقی پەیامەکەى بڵاوکردووەتەوە، بەڵام شیکردنەوەی بۆ کردووە و دەڵێت، "دوای بانگەوازی پەکەکە بۆ گفتوگۆ و ڕێگرتن لە شەڕ، مەسعود بارزانی وەڵامی دایەوە، بەڵام بەهیچ جۆرێک باسی لە گفتوگۆ نەکرد."      

  

"بەڵامەکەی" میدیای پەکەکە ئاماژەیە بۆئەوەى پەیامەکەى بارزانی دۆخەکەی بەرەو هێوربوونەوە نەبردووە، "چونکە هیچ باسێکی گفتوگۆی تێدا نییە".      

  

پەیامی بارزانی لە وەڵامی موراد قەرەیلان، ئەندامی کۆنسەی بەڕێوبەریی پەکەکە بوو "لەبارەی جوڵەی هێزەکانی پارتی لە گارێ" و داوای بۆچوونی ناوبراوی کرد لەسەر شەڕی براکوژی و ئامادەیی پەکەکەشی بۆ گفتوگۆ نیشاندا.      

  

پەیوەندییەکانى پارتى و پەکەکە کە هەردووکیان لەمانگى ئابدا دامەزراون (پەکەکە 15ى ئابی 1984، پارتى 16ى ئابی 1946)، بەدرێژایی نزیکەى چوار دەیەى ڕابردوو هەڵکشان و داکشانى زۆرى بەخۆوە بینیوە تا گەیشتووەتە شەڕى ناوخۆى نێوانیان.      

  

مێژووى سەرهەڵدانى پەیوەندى نێوان ئەو دوو پارتە دەگەرێتەوە بۆ هەشتاکانەى سەدەى ڕابردوو، کە رێککەوتنى هەردوولاى لێکەوتەوە، بەڵام لەساڵى 1985 دواى ئۆپراسیۆنێکى سەربازى تورکیا دژى پەکەکە، رێککەوتنەکە کۆتایی پێهات و گرژى نێوان هەردوو حزبەکە دەستیپێکردەوە و کە تا سەرەتاى نەوەدەکان بەردەوام بوو، هەندێکجار پێکدادانى چەکدارى لەنێوانیان روویدەدا.      

  

ساڵێک دواتر و لەساڵى 1991 دواى دەستپێکردنى ئۆپراسیۆنێکى سەربازى تورکیا، شەڕێکى فراوان کە چەندین ساڵى خایاند لەنێوان هەردوولا هەڵگیرسا تا ساڵى 1997 کە رێککەوتن لەسەر کۆتایی هێنان بەشەڕ.      

  

گرژییەکانى پەکەکە و پارتى لەدواى هێرشەکانى داعش لەساڵى 2014 و کۆتایی هاتن بەو شەڕە، پێینایە قۆناغێکى نوێوە و پەڕیەوە بۆ رۆژئاواى کوردستان دواى ئەو ئەزمونە خۆبەرێوەبەرییەى لەناوچە کوردییەکان دروستببوو، کە پارتى بە دەسەڵاتى پەکەکە ناویدەبات و پشتیوانى لەچەند حزبێک دەکات لەو بەشەى کوردستان کە لەگەڵ دەسەڵاتى خۆبەرێوەبەرى دان بەیەکتردا نانێن.      

  

هەروەها لەبەشێک لەو ناوچانەى لەداعش پاککرانەوە، بەتایبەتى لە سنورى شنگال چەند جارێک گرژى و ئالۆزى لەنێوان پارتى و پەکەکە روویداوە تا ئاستى پێکدادانى چەکدارى.