گه‌ڕان

Shadow Shadow
سیاسه‌تی

شەڕ نزیک نییە

لیژنەى پێشمەرگە: پارتی و پەكەكە کێشەیان نییە و هەماهەنگى باشیان هەبووە

2020.11.03 - 09:07
App store icon Play store icon Play store icon
لیژنەى پێشمەرگە: پارتی و پەكەكە کێشەیان نییە و هەماهەنگى باشیان هەبووە

ناس كورد-

سەرۆكی لیژنەی كاروباری پێشمەرگە لەپەرلەمانی كوردستان بەدوری دەزانێت شەڕ لەنێوان پارتی دیموكراتی كوردستان و پارتی كرێكارانی كوردستان رووبدات و دەڵێت کێشە لەنێوانیان نییە.

 

کەناڵی ناس کورد لە تێلیگرام جۆین بکە   

رێڤینگ هروری، بە ناس كوردی راگەیاند (3ی تشرینی دوووەمی 2020) "شەڕی پارتی و پەكەكە نزیك نییە و زۆرجاری دیكەش گرژی لەنێوان لایەنەكان روویداوە، بەڵام باوەڕ ناكەم شەڕ روبدات، هەرچەندە پەكەكە هەندێك هەڕەشەیان كردووە، بەڵام شەڕ بۆ ئەوانیش باش نییە، لەبەرژەوەندی هیچ كەس و لایەنێكیشدا نییە".

 

سەبارەت بەوەی رێگەی ئاشتی لەنێوان پارتی و پەكەكەدا ماوە بیگرنەبەر لە بری شەڕكردن، هروری كە پەرلەمانتاری پارتیشە، روونیكردەوە "ئەوە هەڵەیە بوترێت ئەوە شەڕی پارتی و پەكەكەیە، پارتی و پەكەكە كێشەی سەرەكی لەنێوانیان نییە، چونكە لەسەردەمی شۆڕشدا هەماهەنگی باش لەنێوان پارتی و پەكەكە هەبووە".

 

وتیشی "خۆسەپاندنی پەكەكە نەك تەنها كاریگەری لەسەر پارتی هەبووە، بەڵكو كاریگەری لەسەر دام و دەزگاكانی حكومەتیش دروستكردووە، چونكە پەكەكە هەندێك هەنگاوی ناوە باش نییە".

 

لەدوای جوڵاندنی هێز و هەڕەشە، پەکەکە و پارتی کەوتوونەتە وەڵام و وەڵامکاری، ئەمڕۆ مەسعود بارزانی لە پەیامێکدا وەڵامی پەکەکەى دایەوە و ڕایگەیاند، لەسەرەتاوە هەموو هاوکارییەکی پەکەکەیان کردووە، بەڵام ئەوان هەڵوێستێكی ناجوامێرانەیان نواند.    

  

مەسعود بارزانی، سەرۆکى پارتی دیموکراتی کوردستان لە پەیامەکەیدا دەڵێت، "مێژوو شاهیدی ئەوەمان بۆ دەدات و شانازی دەکەین کە شەڕی کورد و کوردمان حەرام کردووە، بەڵام نابێت ئەم هەڵوێستەمان بە هەڵە لێک بدرێتەوە و ئیستغلال بكرێت بۆ ئەوەی تەحەدای دەستەڵاتی یاسایی هەرێمی کوردستان بکرێت و هەوڵی سەپاندنی ئیرادەیەكی چەكدارانەی نایاسایی بە سەر خەلکی کوردستان بدرێت."    

  

میدیای فەرمی پەکەکەش دەقی پەیامەکەى بڵاوکردووەتەوە، بەڵام شیکردنەوەی بۆ کردووە و دەڵێت، "دوای بانگەوازی پەکەکە بۆ گفتوگۆ و ڕێگرتن لە شەڕ، مەسعود بارزانی وەڵامی دایەوە، بەڵام بەهیچ جۆرێک باسی لە گفتوگۆ نەکرد."    

  

"بەڵامەکەی" میدیای پەکەکە ئاماژەیە بۆئەوەى پەیامەکەى بارزانی دۆخەکەی بەرەو هێوربوونەوە نەبردووە، "چونکە هیچ باسێکی گفتوگۆی تێدا نییە".    

  

پەیامی بارزانی لە وەڵامی موراد قەرەیلان، ئەندامی کۆنسەی بەڕێوبەریی پەکەکە بوو "لەبارەی جوڵەی هێزەکانی پارتی لە گارێ" و داوای بۆچوونی ناوبراوی کرد لەسەر شەڕی براکوژی و ئامادەیی پەکەکەشی بۆ گفتوگۆ نیشاندا.    

  

پەیوەندییەکانى پارتى و پەکەکە کە هەردووکیان لەمانگى ئابدا دامەزراون (پەکەکە 15ى ئابی 1984، پارتى 16ى ئابی 1946)، بەدرێژایی نزیکەى چوار دەیەى ڕابردوو هەڵکشان و داکشانى زۆرى بەخۆوە بینیوە تا گەیشتووەتە شەڕى ناوخۆى نێوانیان.    

  

مێژووى سەرهەڵدانى پەیوەندى نێوان ئەو دوو پارتە دەگەرێتەوە بۆ هەشتاکانەى سەدەى ڕابردوو، کە رێککەوتنى هەردوولاى لێکەوتەوە، بەڵام لەساڵى 1985 دواى ئۆپراسیۆنێکى سەربازى تورکیا دژى پەکەکە، رێککەوتنەکە کۆتایی پێهات و گرژى نێوان هەردوو حزبەکە دەستیپێکردەوە و کە تا سەرەتاى نەوەدەکان بەردەوام بوو، هەندێکجار پێکدادانى چەکدارى لەنێوانیان روویدەدا.    

  

ساڵێک دواتر و لەساڵى 1991 دواى دەستپێکردنى ئۆپراسیۆنێکى سەربازى تورکیا، شەڕێکى فراوان کە چەندین ساڵى خایاند لەنێوان هەردوولا هەڵگیرسا تا ساڵى 1997 کە رێککەوتن لەسەر کۆتایی هێنان بەشەڕ.    

  

گرژییەکانى پەکەکە و پارتى لەدواى هێرشەکانى داعش لەساڵى 2014 و کۆتایی هاتن بەو شەڕە، پێینایە قۆناغێکى نوێوە و پەڕیەوە بۆ رۆژئاواى کوردستان دواى ئەو ئەزمونە خۆبەرێوەبەرییەى لەناوچە کوردییەکان دروستببوو، کە پارتى بە دەسەڵاتى پەکەکە ناویدەبات و پشتیوانى لەچەند حزبێک دەکات لەو بەشەى کوردستان کە لەگەڵ دەسەڵاتى خۆبەرێوەبەرى دان بەیەکتردا نانێن.    

  

هەروەها لەبەشێک لەو ناوچانەى لەداعش پاککرانەوە، بەتایبەتى لە سنورى شنگال چەند جارێک گرژى و ئالۆزى لەنێوان پارتى و پەکەکە روویداوە تا ئاستى پێکدادانى چەکدارى.