گه‌ڕان

Shadow Shadow
سیاسه‌تی

’’لەناکاو بوو بە تەقە’’

دەنگی خاك: كوژرانی پۆلێك پێشمەرگەی پارتی بە فەرماندەیی مەلا بەختیار

2020.11.01 - 18:11
App store icon Play store icon Play store icon
دەنگی خاك: كوژرانی پۆلێك پێشمەرگەی پارتی بە فەرماندەیی مەلا بەختیار

ناس کورد-

حەمەی حەمە سەعید بەسەرهاتی ئەو پۆلە پێشمەرگەیەی پارتی دەگێڕێتەوە كە لە ناوچەی تاوگۆزی سەرسنوری ئێران لە پێكداهەڵبژان بە هێزێكی یەكێتیدا كوژراون، ئەو هێزەش مەلا بەختیار سەرپەرشتی كردووە.

کەناڵی ناس کورد لە تێلیگرام جۆین بکە   

 

حەمەی حەمە سەعید، فەرماندە و پێشمەرگەی دێڕینی یەكێتی نیشتمانی كوردستان كە ئێستا وەزیری ڕۆشنبیریە لە بیرەوەرییەكانیدا "دەنگی خاك" كە ئێوارەی ئەمڕۆ (1 تشرینی دووەمی 2020) لە سلێمانی بڵاوكرایەوە و "ناس كورد" بینیویەتی، باس لەوە دەكات ئەو كۆمەڵە پێشمەرگەیەی پارتی كە بەدەستی هێزەكانی یەكێتی كوژراون لە "كانی ژەنان" ی تاوگۆزی و لەنێویاندا فەرماندەیەك بەناوی "عەزیز حەمە ساڵح" هەبووە، بە ئامادەیی مەلا بەختیار بە بێ بەرنامە كراوە و هۆكاری دروستبوونی تەقەش لەنێوان هەردوولا "پەلەپەلكردنی پێشمەرگەیەكی یەكێتی بووە، هەر لەو تەقەیەشدا لە یەكێتی "حەمە ئاوات" لاقی شكاوە و بەسەختی بریندار بووە."


چیرۆكی ئەم پێكدادانە كە لە ساڵی 1978 روویداوە، بەگێڕانەوەی حەمەی حەمە سەعید لەوەوە دەست پێ دەكات، فەرماندەكەی پارتی "عەزیز حەمە ساڵح" بانگهێشتی هێزەكەی یەكێتی كردووە بۆ گۆشت خواردن لە گوندی بەڕوێنی سەرسنوری ئێران (سنوری ناحیەی بەمۆی ئێستا)، بەڵام لەژێرەوە نامەی ناردووە بۆ "قادر حەمە ساڵح"ی برای تا هێزی پشتیوانی بۆ بنێرێت، ئەمانیش كە نامەكەیان گرتووە، گومانیان لە مەرامی كردووە، سەرەنجام دەعوەتەكەش كە بڕیار بووە بۆ ئاشتەوایی و هێوركردنەوە بێت بەپێكدادان و كوشتار كۆتاییهاتووە.

 

حەمەی حەمە سەعید باس لەوەش دەكات مەلا بەختیار فەرمانیكردووە، پێشمەرگەكانی پارتی چەك بكرێن بێ ئەوەی بەخۆیان بزانن و پلانێكی بۆ كارەكە داناوە بەبێ ئەوەی ئەوان بزانن، كە هەركات ئەو دەنگی بەرز كردەوە هەركەس هاوڕێ پارتییەكەی خۆی چەك بكات، بەڵام لەمیانەی ئەم پڕۆسەیەدا بەهۆی ئەوەی هەندێ لە یەكێتییەكان فەرمانەكەیان وەك خۆی جێبەجێ نەكردووە و یەكێك لە پێشمەرگەكانیش پەلە بووە، تەق و تۆق دروست بووە و كوژرانی پارتییەكان و هەڵهاتنی هەندێكیتری لێ كەوتووەتەوە.

 

بەپێی ئەو تۆمەتانەی لەدوای بڵاوكردنەوەی "لەبری بیرەوەری" ئاراستەی مەلا بەختیار دەكرێن، باس لەوە دەكرێت كاتێك مەفرەزەكەی مەلا بەختیار گەشتوونەتە گوندی "كانی ژەنان"ی تاوگۆزی، كە ژمارەیان لە نێوان 50 بۆ 70 كەس بووە، پاش دەعوەتكردن و میوانداری كردنیان، دەمودەست مەفرەزەكەی پارتی ـ یان ڕەمی كردووە، لەو رووداوەشدا شەش كەس كوژراون، فەرماندەی مەفرەزەكەش "عەزیزی حەمە ساڵح" بەزیندویی گیراوە و دواتر بەدەستی خۆی گۆڕی پێ هەڵكەنراوە و ئەویش كوژراوەتەوە.

 

هەر لەمبارەیەوە جەلالی شێخ كەریم لە وتارێكدا، باس لەوە دەكات "قەتڵ و عامەکەی (کانی ژەنان) کە بەبڕیاری کاک مەلا بەختیار ئەنجامدرا" بووەتە هۆی برینداربوونی سەختی "حەمە ئاوات" لە یەكێتی و هەر بەوهۆیەشەوە لەم ساڵانەی دواییدا گیانی لەدەستداوە.

 

لەم ساڵانەی دواییدا ژمارەیەك فەرماندە و پێشمەرگەی دێرینی یەكێتی بیرەوەرییەكانی سەردەمی شۆڕشیان بڵاو كردەوە، بەم هۆیەشەوە وەڵادمدانەوە و پەرچەكرداری زۆری بەدوادا هاتووە كە یەكێك لەوانەی "لەبری بیرەوەری" مەلا بەختیار و بەسەرهاتی "كانی ژەنان"، ئەم ئێوارەیەش "دەنگی خاك" ی حەمەی حەمە سەعید بووە كۆتا ئەڵقەی ئەو زنجیرە یادەوەرییە.