ناس کورد-
سەرچاوەیەکى ئاگادار لە تەندروستى قادرى حاجى عەلى دەڵێت، بارودۆخى تەندروستى ناوبراو لەنێوان جێگیرى و ناجێگریدایە و پزیشکەکانیش چاوەڕوانى گۆڕانکاریین لە دۆخى تەندروستیدا.
کەناڵی ناس کورد لە تێلیگرام جۆین بکە
سەرچاوەیەکى ئاگادار لە تەندروستى قادرى حاجى (31ى تشرینى یەکەمى 2020) بەناس کوردى ڕاگەیاند، "بەهۆى بەکارهێنانى ئامێرێکەوە کە هەوکردن و ئاوى زیادە لە سییەکان دەردەکات لەئێستادا ڕێژەى ئۆکسجینى سییەکانى بەرەو ئاستێکى باشتر دەڕوات و بەو هۆیەوە پزیشکەکان ئومێدى جۆرێک لە گۆڕانکارییان لەلا دروستبووە".
وتیشى، "لەئێستادا پزیشکێکى پسپۆڕیی هەناوى و سییەکان کە لەسویدەوە گەڕاوەتەوە بەهاریکارى تیمێک لە پزیشکەکانى نەخۆشخانەى فاروق چاودێرى تەندروستى دەکەن و چاوەڕوانى گۆڕانکاریین لەدۆخى تەندروستى".
ئەوەش لەکاتێکدایە، بۆ ماوەى دوو ڕۆژە بۆ جارێکى تر هاوڕێ و هەودارانى قادرى حاجى عەلى لەڕێگەى تۆڕە کۆمەڵایەتیەکانەوە داواى شیفاى بۆ دەکەن و ژمارەیەکیش لاواندنەوەى ناڕاستەوخۆى بۆ دەکەن کە بەپێى لێکدانەوەکان ئاماژەیەک بوو بۆ ناجێگیرى تەندروستى ناوبراو.
زیاتر لە 20 ڕۆژە بەهۆى توشبوونى بەڤایرۆسى کۆرۆنا و ناجێگیرى دۆخى تەندروستیەوە، قادرى حاجى عەلى یەکێک لەدامەزرێنەرە سەرەکیەکانى بزوتنەوەى گۆڕان داخڵى نەخۆشخانەى فاروق لەشارى سلێمانى کراوە.
