گه‌ڕان

Shadow Shadow
سیاسه‌تی

وەڵامى توندى نەسروڵڵا بۆ ماکرۆن: شتێك نییە بەناوی تیرۆری ئیسلامی

2020.10.30 - 23:10
وەڵامى توندى نەسروڵڵا بۆ ماکرۆن: شتێك نییە بەناوی تیرۆری ئیسلامی

ناس کورد-

ئەمینداری گشتی حزبوڵڵای لوبنان بە توندی ئیدانەی هێرشەكەی شاری نیسی فەرەنسا دەكات و دەڵێت، ئیسلام ئەو جۆرە كارانە رەتدەكاتەوە، هەروەها ناكرێت بەرگەی بێڕێزیكردن بە پێغەمبەر "محەمەد" بگرین.

 

 

حەسەن نەسروڵڵا ئەمنیداری گشتی حزبوڵڵای لوبنان (30ی تشرینی یەكەمی 2020) لە وتەیەكدا بەهۆی لەدایكبونی پێغەمبەری ئیسلام "محەمەد د.خ" وتی "موسوڵمانان بە توندی ئیدانەی روداوەكەی شاری نیس دەكەن، ئەو روداوە ئیسلامیش رەتیدەكاتەوە و ناكرێت لەسەر ئیسلام حساب بكرێت كە كوشتن و ئازاردانی  بێتاوانانی حەرام كردووە".

 

وتیشى "سەرجەم روداوە هاوشێوەكان لای ئێمە موسوڵمان رەتكراوەن و ئیدانەكراون لە هەر شوێنێك بێت و هەركەسێك بكاتە ئامانج، ناكرێت هەركاتێك موسوڵمانێك یاخود مەسیحیەك یاخود هەر مرۆڤێك سەربە هەر ئایین و بیركردنەوەیەك تاوانێك دەكات بیخەینە ئەستۆی ئاینێك یاخود پێغەمبەرێك".

 

نەسروڵڵا دەڵێت، ناكرێت دەسەڵاتدارانی فەرەنسا تاوانێك كە كەسێكی دیاریكراو ئەنجامیداوە بیخاتە سەرشانی ئایینێك، "ئەو هەڵسوكەوتە نائەخلاقییە چونكە هەركەس تاوانێكی ئەنجامدا خۆی بەرپرسیارێتیەكەی هەڵدەگرێت".

 

جەختیشدەکاتەوە "ئەمریكا لەسەرتاسەری جیهاندا تاوان ئەنجام دەدات ئایا كەس دەڵێت تاوانی مەسیحیەتە، هەمان شت بۆ فەرەنسا لە جەزائیر و چەندین شوێنی تر وەك لیبیا تاوانی ئەنجامدا كەس بەرپرسیارێتی نەخستە ئەستۆی مەسیح یاخود مەسیحیەت؟،  شتێك نییە بەناوی تیرۆری ئیسلامی ئەوەی تاوانێك ئەنجام دەدات تاوانبارە".

 

ماوەیەكە پەیوەندی جیهانی ئیسلامی و كۆماری فەرەنسا گرژی زۆر بەخۆیەوە دەبینێت، لەدوای سەربڕینی مامۆستایەكی فەرەنسی كە كاریكاتێری لەسەر پێغەمبەری ئیسلام كردبوو قەیرانەكە قووڵتر بووەتەوە.      

  

لەدوا پێشهاتی ئەو ئاڵۆزییەشدا ماكرۆن هەڵمەتێكی گەورەی بەرپاكردووە بۆ دژایەتی دیاردەیەك كە ناوی ناوە "تیرۆری ئیسلامی" لەم میانەیەشدا رێگەی داوە بە نمایشكردنەوەی كاریكاتێرەكان كە موسوڵمانەكان بە سوكایەتی و بێڕێزی دژ بە پێغەمبەری لەقەڵەم دەدەن.