گه‌ڕان

Shadow Shadow
سیاسه‌تی

ناوەڕۆکى کۆبونەوەى ئەمڕۆى ئەنجومەنى وەزیران

2020.10.28 - 17:54
App store icon Play store icon Play store icon
ناوەڕۆکى کۆبونەوەى ئەمڕۆى ئەنجومەنى وەزیران

ناس کورد-

ئەنجومەنى وەزیرانى هەرێمى کوردستان راگەیەندراوێکى بڵاوکردەوە و تیایدا ئاماژە بە پەسەندکردنى دوو پەیڕەوى تایبەت بە ماف و ئیمتیازاتەکانى زیندانیکراو و گیراوى سیاسى و میراتگرانى شەهیدان و ئەنفالکراوان کرا.

 

کەناڵی ناس کورد لە تێلیگرام جۆین بکە   

لە راگەیەندراوەکەى نوسینگەى ڕۆژنامەوانى ئەنجومەنى وەزیراندا کە وێنەیەکى دەست ناس کورد کەوتووە ئاماژە بەوە کراوە (28ى تشرینى یەکەمى 2020)، بە سەرپەرشتی مەسرور بارزانی سەرۆک وەزیرانی هەرێمی کوردستان و ئامادەبونی قوباد تاڵەبانی جێگری سەرۆک وەزیران، ئەنجومەنی وەزیرانی هەرێمی کوردستان کۆبووەوە.

 

بەگوێرەى راگەیەندراوەکە، لە سەرەتای کۆبوونەوەکەدا ، ڕێبەر ئەحمەد وەزیری ناوخۆ، ڕاپۆرتێکی تایبەت بە بابەتی بەجینۆسایدناساندنی تاوانەکانی ڕێکخراوی تیرۆریستی داعش و هەوڵەکانی تیمی لێکۆڵینەوەی نێودەوڵەتی بۆ لێپێچینەوە لە تاوانەکانی داعش ( یونیتاد UNITAD ) خستەڕوو . دوای گفتوگۆ و ڕاگۆڕینەوە ، ئەنجومەنی وەزیران کۆمەڵێک پێشنیار و بڕیاری لەمبارەیەوە پەسەند کرد.

 

ئاماژە بەوەش کراوە، لە بڕگەی دووەمی کۆبوونەوەکەدا، عەبدوڵڵا حاجی مەحموود وەزیری کاروباری شەهیدان و ئەنفالکراوان، ڕەشنووسی پڕۆژەی تایبەت بە دوو پەیڕەوی خستەڕوو، کە بریتی بوون لە (پەیڕەوی ئیمتیازاتی زیندانیکراو و گیراوی سیاسی لە هەرێمی کوردستان)  و  ( پەیڕەوی دیاریکردنی ماف و ئیمتیازاتی میراتگرانی شەهیدان و ئەنفالکراوان) . ئەنجومەنی وەزیران دوای گفتوگۆ و ڕاگۆڕینەوە ،  لە کاتێکدا جەخت لە دابینکردنی ماف وئیمتیازاتی کەسوکاری سەربەرزی شەھیدان و ئەنفالکراوان و ستایشکردنی خەباتی شەھیدە سەربەرزەکان کە گیانی خۆیان لە پێناوی گەل و نیشتیماندا بەختکردووە و  خەباتی زیندانی سیاسیەکان دەکاتەوە. وەزارەتی کاروباری شەھیدان وئەنفالکراوانی ڕاسپارد کە درێژە بە پرۆسەی  چاکسازیی بدات لە لیستی ناوی ئەوانەی کە بە ناشایستەیی سوودمەندن لەو ماف و ئیمتیازاتانە وجەختکرایەوە لە پاراستنی ماف وئیمتیازاتی ئەوانەی شایستەی وەرگرتنی ئەو ماف و ئیمتیازاتانەن.

 

راگەیەندراوەکە رونیدەکاتەوە، ئەنجومەنی وەزیران دوای گفتوگۆکردن، لە ڕووی مەبدەئیەوە هەردوو پەیڕەوەکەی پەسەند کرد بە ڕەچاوکردنی ئەو تێبینی وسەرنجانەی لە کۆبونەوەکەدا خرانەڕوو ، بە ئاراستەی باشترکردنی ژیان و بژیۆی کەسوکاری شەھیدان و زیندانیان و ڕاگیراوانی سیاسی و پاراستنی مافەکانیان.