گه‌ڕان

Shadow Shadow
سیاسه‌تی

ژمارەى ئەو مامۆستایانە ئاشکرا کرا کە بەهۆی ڤایرۆسی کۆرۆناوە گیانیان لەدەست داوە

2020.10.28 - 10:56
ژمارەى ئەو مامۆستایانە ئاشکرا کرا کە بەهۆی ڤایرۆسی کۆرۆناوە گیانیان لەدەست داوە

 

ناس کورد-

هەرچەندە تائێستا ئاماری فەرمی نییە، بەڵام بەپێی داتاکانی  یەكێتی مامۆستایانی كوردستان، ژمارەى ئەو مامۆستایانەى تائێستا بەهۆی ڤایرۆسی کۆرۆناوە گیانیان لەدەست داوە و لای ئەوان تۆمار کراوە گەیشتووەتە 55 بۆ 60 مامۆستا.

 

ئەحمەد سابیر سەرۆكی یەكێتی مامۆستایانی كوردستان لە لێدوانێکیدا بۆ میدیای پارتی کە ناس کورد بەدواداچوونی بۆ کردووە (28ی تشرینی یەکەمی 2020) دەڵێت، زۆربەی ئەو مامۆستایانە نەخۆشی درێژخایەنیان هەبووە و پەتاكە كاریگەری هەبووە لەسەریان، "جێگای داخە ئێمە ئاگاداری لقەكانمان كردۆتەوە ڕۆژ بە رۆژ ناوی ئەو كەسانە تۆمار بكەن كە كۆچ دەكەن بۆ ئەوەی لە ئایندە بتوانین تۆمارێكیان بۆ بكەینەوە وەك تۆمارێك یان وەك كتێبێك ناوی ئەو مامۆستایانەی تیا تۆمار بكرێت."

 

دەشڵێت، "هەوڵیشمان داوە ئەو مامۆستایانەی توش بوون و چارەسەریان قورسە لەگەڵ وەزیری تەندروستی و بەڕێوەبەرایەتی گشتی تەندروستییەكان ئاسانكاریان بۆ بكەن لەو ڕوەوە هاوكاری ژمارەیەكی زۆری مامۆستامان كردووە كە زوو چارەسەر وەربگرن."

 

پێشتر وتەبێژى وەزارەتى تەندروستیی هەرێم ڕایگەیاند، 50 پزیشک و کارمەندى تەندروستى بەهۆى توشبوونیان بە ڤایرۆسى کۆرۆنا گیانیان لەدەستداوە، لەکۆى زیاتر لە دوو هەزار توشبوو.  

  

ئاسۆ حەوێزى بە ناس کوردى راگەیاند (21 تشرینی یەكەمی 2020)، رێژەی توشبووان بە ڤایرۆسی كۆرونا لە پزیشكان، كارمەندانی تەندروستی، فەرمانبەرانی سەر بە میلاكی وەزارەتی تەندروستی و خۆبەخشان روو لە زیادبوونە.  

  

وتیشى، "زۆترین توشبوو لەسنورى پارێزگاى هەولێرە کە نزیك دەبێتەوە لە هەزار و 100، سلێمانی زیاتر لە 750، دهۆك 580 و هەڵەبجە 15 كەسی تێپەڕاند.  

  

ئاسۆ حەوێزى باسى لەوەشکرد، توشبووەکان بارودۆخیان جیاوازە، هەیانە لەژێر ئامێرى هەناسەدانى دەستکردایە، هەیانە لەژورى چاودێرى چڕە، بەکۆى گشتیش 50 کەسیان گیانیان لەدەستداوە.