گه‌ڕان

Shadow Shadow
سیاسه‌تی

دوایین پێشهاتى گرژییەکانى پارتى و پەکەکە.. ’’بۆنى شەڕ لە ئاشتى زیاترە’’

2020.10.28 - 10:38
دوایین پێشهاتى گرژییەکانى پارتى و پەکەکە.. ’’بۆنى شەڕ لە ئاشتى زیاترە’’

ناس کورد-

محەمەد ئەمین پێنجوێنى سیاسەتمەدارى کورد داوا دەکات پارتى و پەکەکە هێزەکانیان بکێشنەوە کە ئێستا بەرانبەر یەکتر وەستاون و دەڵێت، "بۆنى شەڕ زیاترە وەک لە ئاشتى".

 

ماوەى چەند رۆژێکە جارێکى تر گرژى لەنێوان پەکەکە و پارتى سەریهەڵداوەتەوە و گەیشتووەتە ئاستى هۆشداریدان لە شەڕى ناوخۆ، بەتایبەت دواى پێکدادانەکەى چەند رۆژى ڕابردوو لە سنورى ئاکرێ.

 

محەمەد ئەمین پێنجوێنى سیاسەتمەدارى کورد کە بە وردى چاودێرى رەوشەکە دەکات بە ناس کوردى وت (28ى تشرینى یەکەمى 2020)، "بارودۆخى ئێستا زەنگێکى خەتەرە و هیوادارم شەڕ روونەدات، بەڵام بۆنى شەڕ زیاترە لە ئەگەرى ئاشتى".

 

وتیشى، "هەردوولا هێزەکانیان بەرانبەر یەک کۆکردووەتەوە، پێویستە هەردوولا کەمێک بەرانبەر یەک بکشێنەوە بۆ ئەوەى شەڕ روونەدات".

 

پێنجوێنى کە چەندینجار نێوەندگیریی لەنێوان حزبەکاندا کردووە لەناویاندا پەکەکە و حزبەکانى دیکە، جەخ تدەکاتەوە هەردوولا گەیشتونەتە ئەو بڕوایەى کە شەڕ ماڵوێرانى لێدەکەوێتەوە و پرسی کورد دەباتە دواوە، بەڵام هێشتا هەوڵێکى جدى نییە بۆ ئاشتى.

 

ئەو پێشهاتانە هاوکاتن لەگەڵ پێکدادانى نێوان هێزێکى پێشمەرگە و گەریلا لە سنورى دینارتەى سەر بە ئاکرێ کە رۆژى یەکشەممە روویدا.

  

پێکدادانەکە دواى گرژبوونى زیاترى پەیوەندییەکانى پارتى و پەکەکە هات  لەو سنورە، بەتایبەتى لەدواى کوژرانى بەرپرسێکى ئاسایش لەسنورى ئامێدى، کە پەکەکە تۆمەتبارکراو ئەویش رەتیکردەوە.

 

مەحمود محەمەد وتەبێژی پارتى لە ڕاگەیەنراوێکدا کە ناس کورد بەدواداچوونی بۆ کردووە (27ی تشرینی یەکەمی 2020)  ڕایگەیاند، لێدوان و کردەوەکانی بەرپرسانی پەکەکە جێگەی داخە و "نەفەسی هەڕەشە و خواستی نانەوەی گرژی و ناسەقامگیری و، ئاوەژووكردنی ڕاستییەكان بە ئاشكرا دیارە."  

 

رۆژێک پێشتر موراد قەرەیەڵان، ئەندامی کۆنسەی بەڕێوبەریی پەکەکە، ڕایگەیاند، پارتی جوڵەی بە هێزەکانی کردووە و ئامادەکاریی بۆ شەڕ دەکات.

 

پەیوەندییەکانى پارتى و پەکەکە کە هەردووکیان لەمانگى ئابدا دامەزراون (پەکەکە 15ى ئابی 1984، پارتى 16ى ئابی 1946)، بەدرێژایی نزیکەى چوار دەیەى ڕابردوو هەڵکشان و داکشانى زۆرى بەخۆوە بینیوە تا گەیشتووەتە شەڕى ناوخۆى نێوانیان.  

  

مێژووى سەرهەڵدانى پەیوەندى نێوان ئەو دوو پارتە دەگەرێتەوە بۆ هەشتاکانەى سەدەى ڕابردوو، کە رێککەوتنى هەردوولاى لێکەوتەوە، بەڵام لەساڵى 1985 دواى ئۆپراسیۆنێکى سەربازى تورکیا دژى پەکەکە، رێککەوتنەکە کۆتایی پێهات و گرژى نێوان هەردوو حزبەکە دەستیپێکردەوە و کە تا سەرەتاى نەوەدەکان بەردەوام بوو، هەندێکجار پێکدادانى چەکدارى لەنێوانیان روویدەدا.  

  

ساڵێک دواتر و لەساڵى 1991 دواى دەستپێکردنى ئۆپراسیۆنێکى سەربازى تورکیا، شەڕێکى فراوان کە چەندین ساڵى خایاند لەنێوان هەردوولا هەڵگیرسا تا ساڵى 1997 کە رێککەوتن لەسەر کۆتایی هێنان بەشەڕ.  

  

گرژییەکانى پەکەکە و پارتى لەدواى هێرشەکانى داعش لەساڵى 2014 و کۆتایی هاتن بەو شەڕە، پێینایە قۆناغێکى نوێوە و پەڕیەوە بۆ رۆژئاواى کوردستان دواى ئەو ئەزمونە خۆبەرێوەبەرییەى لەناوچە کوردییەکان دروستببوو، کە پارتى بە دەسەڵاتى پەکەکە ناویدەبات و پشتیوانى لەچەند حزبێک دەکات لەو بەشەى کوردستان کە لەگەڵ دەسەڵاتى خۆبەرێوەبەرى دان بەیەکتردا نانێن.  

  

هەروەها لەبەشێک لەو ناوچانەى لەداعش پاککرانەوە، بەتایبەتى لە سنورى شنگال چەند جارێک گرژى و ئالۆزى لەنێوان پارتى و پەکەکە روویداوە تا ئاستى پێکدادانى چەکدارى.