گه‌ڕان

Shadow Shadow
سیاسه‌تی

سەرکردەیەکى یەکێتى هێرش دەکاتە سەر پەرلەمانتارانى ناڕازیی لە فەڕەنسا ’’پاسەوانی پووشن’’

2020.10.28 - 08:56
سەرکردەیەکى یەکێتى هێرش دەکاتە سەر پەرلەمانتارانى ناڕازیی لە فەڕەنسا ’’پاسەوانی پووشن’’

ناس کورد-

 

ئەندامێکى سەرکردایەتى یەکێتى هێرشدەکاتە سەر ئەو پەرلەمانتارانەى واژۆیان لەسەر یاداشتى ناڕەزایی کردووە دژى فەڕەنسا و دەڵێت، هەرچى لەو وڵاتە دەکرێت لە چوارچێوەی کارە هونەریەکاندا دەچێتە خانەی دەربڕینی ئازادییەوە ئەگەر سنوری پیرۆزیەکانیش ببەزێنێت.

 

بێستون سابورایی لە لاپەڕەى خۆى لە فەیسبوک کە ناس کورد بەدواداچوونى بۆ کردووە نوسیویەتى (2020/10/27)، "پارلەمانتارەکانی  پاسەوانی پووش..!، ئێوە دەزانن ناڕەزایی دەربڕینتان دژ بە فەڕەنسا لەسەر چیە و چی قازانجێک بە گەلەکەتان دەگەیەنێت..؟".

 

ئاماژەى بەوەشکردووە "ئەگەر خۆتان بیرتان چووە بڕۆن پرسیار لە کیمیازەدەکانی هەڵەبجە و پاشماوەکانی ئەنفال و سەرمابردووەکانی کۆچ و ڕەوە ملیۆنیەکەی خەڵکی کوردستان بکەن..! بزانن لەو ڕۆژگارەدا کام موسوڵمان؟ کام حیزبی ئیسلامی؟ کام وڵاتی ئیسلامی؟  ناڕەزایی دەربڕی دژی بەعس؟ کێ پێی وت ئەو هەموو موسولمانە بۆچی قەڵ و عام دەکەیت؟".

 

سابوراوایی دەڵێت "فەرەنسای ناموسوڵمان یەکەم وڵاتی دنیا بوو لەسەر کورد هاتە دەنگ و داوای پشتیوانی نێودەوڵەتی و  بازنەی دژەفڕینی   هێڵی 36ی کرد، هەر فەرەنسا بوو لە نەوەدەکانی سەدەی ڕابردوو  یەکێتی و پارتی لەسەر یەک مێز کۆکردەوە و پرۆژەی دەوڵەتێکی سەربەخۆی کوردستانی خستە بەردەستیان، هەر خۆمان لە ناو خۆماندا بەهۆی ئاشکراکردنی نهێنی کارەکە بۆ تورکەکان  ئەو هیوایەشمان لەگۆڕنرا کە فەرەنسا پلاندانەری بوو".

 

باسى لەوەشکردووە "لەو ماوەی ڕابردوودا سەرۆک ئیمانۆیل ماکرۆن هاتە عێراق و ڕازی نەبوو بێتە هەولێر، بەوەش ویستی ئاماژەیەک هەڵدات بۆ دەسەڵاتی کوردی و بەتایبەت دەسەڵاتدارانی پارتی کە لە ئەدائی کاری حوکمڕانییان ڕازی نییە،بەتایبەت لە بواری ئیدارەدانی ئابوری و بەرتەسککردنەوەی سنورەکانی ئازادی دەربڕین و پێشێل کردنی مافەکانی مرۆڤ ، ئایا ئێوە لەو بوارەدا چیتان کردووە و کام دڵسۆزیەتان بۆ خەڵک لەم دڵسۆزیەی سەرۆک ماکرۆن بایەخدارترە؟".

 

هەروەها لە پەرلەمانتارەکان دەپرسێت "بۆچی ئێوە لەبری ئەوەی  بەرگری لە ئازادی دەربڕین بکەن لەم وڵاتەی خۆمان دەچن دەبنە پاسەوانی پوشی ئاغایەک کە تەنها مەبەستی ئەوەیە کورد بکات بەگژ دیموکراتیەتی فەرەنسی دا و لە بنەرەتیشدا دوژمنایەتیان بۆ فەرەنسا لەسەر پشتیوانی فەرەنسایە بۆ کورد...؟!بیرێکی وردی لێ بکەنەوە و بزانن بەم کارە ساویلکانەییەتان بوونەتە پاسەوانی پوشی چی دڕندەیەکی کوردکوژ..؟!".

 

25 ئەندامى پەرلەمانى کوردستان (2020/10/26) یاداشتێکى نیگەرانییان ئاڕاستەى کونسوڵى فەرەنسا لە هەرێم کرد لەبارەى لێدوانەکانى ئەم دواییەى سەرۆکى ئەو وڵاتە لەسەر ئیسلام کە کاردانەوەى زۆرى لێکەوتووەتەوە.

 

ماوەیەكە پەیوەندی جیهانی ئیسلامی و كۆماری فەرەنسا گرژی زۆر بەخۆیەوە دەبینێت، لەدوای سەربڕینی مامۆستایەكی فەرەنسی كە كاریكاتێری لەسەر پێغەمبەری ئیسلام كردبوو قەیرانەكە قووڵتر بووەتەوە.  

  

لەدوا پێشهاتی ئەو ئاڵۆزییەشدا ماكرۆن هەڵمەتێكی گەورەی بەرپاكردووە بۆ دژایەتی دیاردەیەك كە ناوی ناوە "تیرۆری ئیسلامی" لەم میانەیەشدا رێگەی داوە بە نمایشكردنەوەی كاریكاتێرەكان كە موسوڵمانەكان بە سوكایەتی و بێڕێزی دژ بە پێغەمبەری لەقەڵەم دەدەن.