گه‌ڕان

Shadow Shadow
سیاسه‌تی

پەیامی لاهور شێخ جەنگی لەبارەی یەکگرتنەوەی هێزەکانی 70 و 80

2020.10.27 - 17:13
پەیامی لاهور شێخ جەنگی لەبارەی یەکگرتنەوەی هێزەکانی 70 و 80

ناس کورد-

لاهور شێخ جەنگی، هاوسەرۆژی یەکێتیی نیشیتیمانیی کوردستان ڕایگەیاند، پشتگیری تەواوی پرۆسەی چاکسازیی و رێکخستنەوەی هێزەکانی پێشمەرگە دەکات بەتایبەت هێزەکانی 70 و 80، دەشڵێت، دەبێت چاکسازی هەموو جومگەکانی حکومەت بگرێتەوە.

 

ئەمرۆ سێشەممە 27ی تشرینی یەکەمی 2020، لاهور شێخ جەنگی، هاوسەرۆکی یەکێتیی نیشتیمانیی کوردستان، پێشوازیکرد لە ستیڤ پاکەرین، راوێژکاری سەربازیی کونسوڵخانەی گشتیی بریتانیا لە هەولێر و سەرپەرشتیاری پرۆژەی هاوپەیمانیی نێودەوڵەتی بۆ یەکخستنەوەی هێزی پێشمەرگە و وەفدێکی هاوڕێی.

 

بەگوێرەی ڕاگەیەندراوێکی کۆبوونووەکە، تیایدا گفتوگۆکرا دەربارەی دوایین پەرەسەندنە سیاسی و ئەمنیەکان و پەرەپێدانی پەیوەندییە دوو قۆڵییەکانی نێوان هەرێمی کوردستان و بریتانیا و هەنگاوەکانی پرۆسەی چاكسازی و یەکخستنەوەی هێزی پێشمەرگە و بەردەوامی مەترسیەکانی تیرۆر لەسەر ناوچەکە.

 

ئاماژە بەوەشکروە، لاهور شێخ جەنگی، هاوکاری و پشتیوانییە سەربازییەکانی هاوپەیمانیی نێودەوڵەتی بەرز نرخاند لە جەنگی دژی تیرۆر و پرۆسەی چاكسازی و یەکخستنەوەی هێزی پێشمەرگە، هاوکات دەستخۆشی لە هەوڵە بەردەوامەکانی وەزارەتی پێشمەرگەی حکومەتی هەرێم کرد کە لەو پێناوەدا خستویەتیە گەڕ.

 

ئەوەش هاتووە، هاوسەرۆکی یەکێتیی نیشتیمانیی کوردستان، راشیگەیاند: " پشتگیریی تەواوی پرۆسەی چاکسازیی و رێکخستنەوەی هیزەکانی پێشمەرگە دەکەم، هەر دامەزراوەیەکی سەربازی پێویستی بە چاکسازیی و یەکخستنەوە هەبێت نابێت بە بیانوی جۆراوجۆر رێگریی بۆ دروستبکرێت بەتایبەت یەکەکانی 70 و 80، هاوکات بنەمای یەکسانی رەچاو بکرێت بەتایبەت لە دابەشکردنی هاوکارییە سەربازییەکاندا."

 

لاهور شێخ جەنگی جەختیشیکردووتەوە لە گرنگی بەشداریکردن و هاوسەنگی رێژەی ژنان لە ناو هێزی پیشمەرگەدا.

 

هاوسەرۆژی یەکێتی ئاماژەی بەوەشكردووە: " دەبێت چاکسازی هەموو جومگەکانی حکومەت بگرێتەوە، حکومەت بەیەکسانی کار بۆ شار و شارۆچکەکانی هەرێم بکات و  دەسەڵاتەکان لە چوارچێوەی لامەرکەزیی ئیداریی و دارایی رێکبخرینەوە."

 

بەگوێرەی ڕاگەیەندراوەکە، لاهور شێخ جەنگی داواشی کردووە، هاوپەیمانیی نێودەوڵەتی لە  مەشق و راهێنان و هاوکارییە سەربازییەکانی بۆ هێزی پێشمەرگە بەردەوام بێت تا هەرێمی کوردستانیش لە چوارچێوەی دەستوری عێراق خاوەن هێزێکی سەربازیی پرچەک و مەشق پێکراوی سەردەمیانە بێت.

 

ئەوەش هاتووە، لەلای خۆشیەوە ستیڤ پاکەرین، سوپاسی ئامۆژگاری و هەڵوێستەکانی لاهور شێخ جەنگی کرد بۆ پشتیوانی لە هەنگاوەکانی پرۆسەی چاکسازی و یەکخستنەوەی هێزی پێشمەرگە، هاوکات  ئامادەیی هاوپەیمانیی نێودەوڵەتی دووپاتکردەوە بۆ پەرەپێدانی پەیوەندیەکان و هاوکاری و پاڵپشتیی زیاتری هەرێمی کوردستان بە تایبەت لە بواری مەشق و راهێنانی هێزی پێشمەرگە.