گه‌ڕان

Shadow Shadow
سیاسه‌تی

ئەمەریکا سزاکانى لەدژى ئێران فراوانتر کرد

2020.10.26 - 23:10
ئەمەریکا سزاکانى لەدژى ئێران فراوانتر کرد

ناس کورد-

وەزارەتى گەنجێنەى ئەمەریکا سزا سەپێنراوەکانى بەسەر تاراندا فراوانتر کرد و لەنوێترین بڕیاریدا بێژەن زەنگەنەی وەزیرى نەوتى ئەو وڵاتەی خستە لیستى ڕەشى سزاکانیەوە.

 

لەڕاگەیەنراوێکى دا کە ئەمڕۆ (26ى تشرینى یەکەمى 2020) بڵاویکردووەتەوە و ناس کورد بەدواداچوونى بۆ کردووە، وەزارەتى گەنجینەى ئەمەریکا ڕایگەیاندووە: "وەیزیری نەوتی ئێران خرایە لیستی ڕەشی سزاکانمانەوە، سزاکە چەند کەسایەتییەکى ترى ئێرانى دەگرێتەوە، ئەوە سەربارى ژمارەیەک لە کۆمپانیا و دامودەزگاى ئەو وڵاتە بەوەزارەتى نەوتیشەوە." 

 

ئاماژەى بۆ ئەوەش کردووە، سزاکە ئەو کەشتیانەش دەگرێتەوە کە لەژێر ئاڵاکانى هیندۆراس و پەنامادا دەپەڕنەوە، بەڵام پەیوەندییان بەکۆمپانیا نەوتییەکانى ئێرانەوە هەیە.

 

پێشتریش بەتۆمەتى دەستوەردان لە هەڵبژاردنە گشتیەکەى ئەمەریکادا کەبڕیارە سەرەتاى مانگى داهاتوو بەرێوەبچێت، وەزارەتى گەنجینەی ئەمریکا سزاى بەسەر پێنج گروپ و دەزگاى ئێرانیدا سەپاند و بەوە تۆمەتبارى کردن کە کار بۆ نانەوەى فیتنە و پشێوى دەدەن لەناو دەنگدەرانى ئەمەریکادا لەڕێگەى بڵاوکردنەوەى زانیارى ساختەوە لەئینتەرنێتدا.