گه‌ڕان

Shadow Shadow
سیاسه‌تی

کەجەکە لەبارەی ’’پیلانێکی پارتییەوە’’ هاووڵاتیان و لایەنە سیاسییەکان ئاگاداردەکاتەوە

2020.10.26 - 17:10
کەجەکە لەبارەی ’’پیلانێکی پارتییەوە’’ هاووڵاتیان و لایەنە سیاسییەکان ئاگاداردەکاتەوە

ناس کورد-

کۆمیتەی پەیوەندییەکانی کۆما جڤاکێن کوردستان (کەجەکە) وەلامی ڕاگەیەندراوەکەی ئەنجومەنی ئاسایشی هەرێمی دایەوە و ڕەتیدەکاتەوە هیچ ئەندامیکیان لەلایەن ئاسایشی هەرێمەوە دەستگیرکرابێت و دەشڵێت، پارتی دەیەوێت لەڕێگەی ئەو چەواشەکارییانەوە ڕەوایەتی بە هێرشکردنەسەریان بدات.

 

کەجەکە لەڕاگەیەندراوێکدا کە وێنەیەکی بۆ ناس کورد نێردراوە (دووشەممە 28ی تشرینی یەکەمی 2020) ڕایگەیاند: "پارتی دیموکراتی کوردستان دەستی بە شاڵاوێکی چەواشەکاری کردووە و بۆ شاردنەوەی هەموو تاوانە نەتەوەیی و سیاسییەکانی لە بەرامبەر گەلی کوردستان دەست بۆ هەموو ئاژاوەگێڕی و چەواشەکارییەک دەبات."

 

ئاماژەی بەوەشكردووە: "هەر لە تۆمەت هەڵبەستن لە ڕووداوی کوشتنی بەرپرسی خاڵی سنوریی سەرزێرێ کە لەلایەن هەپەگە-وە بەدرۆخرایەوە، بگرە تا ئامادەکردنی ڕاپۆرت و هەواڵی بێ بنەما سەبارەت بە تەڤگەرەکەمان دەیەوێت بۆ پلانی چەپەڵی داهاتووی زەمینە ئامادە بکات."

 

جەختیشیکردووەتەوە: "هەواڵی کۆتاییشی کە گوایە گروپێکی سەر بە تەڤگەرەکەمانیان دەستگیرکردوو، دوورە لە ڕاستییەوە و هیچ بنەمایەکی نییە، بەتەواوی دوورە لەڕاستی و ئەو هەواڵە چەواشەکارییانە بە هاوئاهەنگی دەزگای سیخوڕیی میت هەڵبەستراوە و ئامانجەکەی زەمینە خۆشکردنە بۆ ڕەوایەتیدان بە هێرشکردنە سەر تەڤگەرەکەمان."

 

کەجەکە لەڕاگەیەندراوەکەیدا دەشڵێت: "ڕای گشتیی باشوری کوردستان باش دەزانێت کە لەکاتی تەنگانەدا و لەکاتی هێرشی داعش بۆسەر هەبوونی کورد لە باشور، کێ باشوری پاراست و کێ سەنگەری جێهێشت و هەڵهات، ئێمە پاراستنی گەلی باشور و خاکەکەی بە ئەرکی خۆمان دەزانین و سەدان هەڤاڵی گەریلا لەو پێناوەدا لە شنگالەوە بگرە تا هەولێر گیانی خۆیان بەخت کردووە."

 

جەختیشیکردووەتەوە: "گەریلا لە پاراستنی ئەمن و ئاسایشی باشوری کوردستان ڕۆڵی پێشەنگی گێراوە و هیچکات خۆی بەدەستی خۆی ئەو ئەمن و ئاسایشە ناخاتە مەترسییەوە کە بەسەدان شەهید لە پێناویدا گیانیان بەخت کردووە."

 

کەجەکە ڕاشیگەیاندووە: " پێویستە بزانن ئەوانەی ئاسایشی هەرێمی کوردستان دەخەنە مەترسییەوە پارتی دیموکراتی کوردستان و دەوڵەتی تورکیان و لە ئەنجامی پیلانی هاوبەشی داگیرکاری ئەم دوو هێزەیە ڕۆژانە دەنگی تەقینەوە و تۆپی سوپای تورکیا لە چیاکانی کوردستان کەم نابێت."

 

باسی لەوەشکردووە: "هاوشێوەی دەسەڵاتی ئەردۆگان، پارتی دیموکراتی کوردستان شاڵاوێکی گرتن، ڕفاندن، زایندانیکردن، تۆقاندن و فشاری هەمەلایەنەی لەدژی ڕۆژنامەنوسان، مامۆستایان، چالاکوانان و کەسایەتی ئۆپۆزسیۆن بەڕێوەدەبات و ئەمن و ئاسایشی هاووڵاتیان تێکدەدات."

 

لەکۆتایی ڕاگەیەندراوەکەدا، کەجەکە ڕایگەیاندووە: "لێردا بانگ لە هەموو هێز و لایەنە سیاسییەکانی کوردستان و ڕای گشتیی گەلی کوردستان دەکەین کە بە وشیارییەوە مامەڵە لەگەڵ ئەو شاڵاوە گێرەشێوێنییەی پارتی دیموکراتی کوردستان  و میت بکەن و بە هەڵوێستی نیشتیمانپەروەرانە پوچەڵی بکەنەوە."

 

ئەمڕۆ شەممە ئەنجومەنى ئاسایشى هەرێمى کوردستان ڕایگەیاند: " لە ئەنجامی ئۆپەراسیۆنی هێزەکانی ئاسایشدا، دوو پیلان پووچەڵکرانەوە کە یەکێکیان لە لایەن پارتی کرێکارانی کوردستان ( پەکەکە) پلانی بۆ دانرابوو بەڵام خۆشبەختانە بە هاوکاریی و هەماهەنگیی نێوان هێزەکانی پۆلیس و ئاسایش و هەواڵگریی و دژە تیرۆری هەرێمی کوردستان پووچەڵکرانەوە و گروپێکیش دەستگیرکران."

 

لە راگەیەندراوەکەى ئەنجومەنى ئاسایشى هەرێمى کوردستان کە وێنەیەکى دەست ناس کورد کەوتووە ئاماژە بەوە کراوە (26ى تشرینى یەکەمى 2020)، هێزەکانی ئاسایشی هەرێمی کوردستان، لە چەند رۆژی رابردوودا چەند هێرشێکی تێکدەرانەیان لە هەرێمی کوردستان پووچەڵ کردەوە و چەندین کەسیشیان دەستگیرکرد کە پەیوەندییان لەگەڵ گرووپە تیرۆریستییەکاندا هەیە. 

 

بەگوێرەى راگەیەندراوەکە "لە ئەنجامی ئۆپەراسیۆنی هێزەکانی ئاسایشدا، دوو پیلان پووچەڵکرانەوە کە یەکێکیان لە لایەن پارتی کرێکارانی کوردستان ( پەکەکە) پلانی بۆ دانرابوو بەڵام خۆشبەختانە بە هاوکاریی و هەماهەنگیی نێوان هێزەکانی پۆلیس و ئاسایش و هەواڵگریی و دژە تیرۆری هەرێمی کوردستان پووچەڵکرانەوە. هەندێک لە پیلانداڕێژەرانی ئەم هەوڵانە، پەیوەندییان لەگەڵ خەڵکی دەرەوەی عێراق و دانیشتووی وڵاتانی ئەوروپاوە هەیە و لە لایەن ئەوانەوە ئاراستەکراون. ئەو کەس و لایەنانەی کە بڕیار بوو بکرێنە ئامانجی ئەم هێرشە تیرۆریستیيانە، ئاگادارکراونەتەوە و رێکاریی پێویستیش، لەپێناو پاراستنی دیپلوماتکاران و خاوەنکارانی بیانی لە هەرێمی کوردستان گیراوەتەبەر".