گه‌ڕان

Shadow Shadow
سیاسه‌تی

لیزا فەلەكەدین بۆ یوسف محەمەد: میراتی ئێوە شەڕەجنێو و بەردبارانكردنە

2020.10.26 - 12:39
App store icon Play store icon Play store icon
لیزا فەلەكەدین بۆ یوسف محەمەد: میراتی ئێوە شەڕەجنێو و بەردبارانكردنە

ناس کورد-

لیزا فەلەکەدین پەرلەمانتارى پارتى لە پەرلەمانى کوردستان وەڵامى یوسف محەمەد سەرۆکى فراکسیۆنى گۆڕانى لە پەرلەمانى عێراق دایەوە و دەڵێت "میراتی ئێوە شەڕەجنێو و بەردبارانكردنە".

کەناڵی ناس کورد لە تێلیگرام جۆین بکە   

لیزا فەلەکەدین لەلاپەڕەى خۆى لە فەیسبوک کە ناس کورد بەدواداچونى بۆ کردووە رایگەیاند (26ى تشرینى یەکەمى 2020) "کاتێک ئەم بەرێزە لەهەڕەمی دەسەڵاتی یاساداناندا بوو سەردەمێکی نەگریس و تاریک دەستیپێکرد، ململانێی نێوان حیزبە سیاسییە کوردستانییەکان گەیشتە لوتکە و هەر ئەو سەردەمەش بووە دەسپێکی پرۆسەی ناشرینکردنی کاری پەرلەمانتاری و تێکدانی شیرازەی کۆمەڵگە و تۆختر کردنەوەی ئاسەوارەکانی دوو ئیدارەیی".

 

ئاماژەى بەوەشکردووە "باشتر وایە کاک یوسف ئاوڕێک باتەوە بەدوای خۆیدا بۆ ئەوەی رووبەرووی راستییە تاڵەکان ببێتەوە کە خۆی و هاوشێوەکانی کۆمەڵگەی کوردیان بەچ دەردێک بردووە، تەواوی میرات و دەسکەوتیان پەروەردەکردنی هزری شەرە جنێو و بەردبارانکردن و ئاگربەردانە و هیچی دیکە".

 

یوسف محەمەد سەرۆکى فراکسیۆنى گۆڕان لە پەرلەمانى عێراق رایگەیاند (25ى تشرینى یەکەمى 2020)،  ئەگەری هێنانە کایەی دەسەڵاتێکی پۆلیسی لە هەرێم لەهەر کاتێکی تر بەهێزترە و ئازادییە گشتییەکان لەبەردەم هەڕەشەی جدیدان.  

  

یوسف محەمەد لەهەژمارى خۆى لە فەیسبوک کە ناس کورد بەدواداچونى بۆ کردووە نوسیویەتى "لە ماوەی رابردودا لە ناوچەکانی ژێر دەسەڵاتی پارتی لە هەولێر و دهۆک، چەندین چالاکوانی مەدەنی و مامۆستا و ڕۆژنامەنوس کەوتونەتە بەر هێرش و ڕفاندن و گرتن و بێسەروشوێن کردن".  

  

ئاماژەى بەوەشکردووە "مامۆستا بەدەل بەرواری بڕیاری بێتاوانیی لە دادگا دەرچوە، بەڵام بەدەر لە یاسا ئازاد ناکرێ. شێروان شێروانی، گوهدار زێباری، شڤان بەرۆشكی، ئەیاز نهێلی‌و هاریوان كۆچەر رفێندراون و روبەروی دادگاش نەکراونەتەوە و کەسوکاریان زانیارییان لەسەر ژیانیان نییە. تاوانی ئەمانە تەنها داواکردنی مافە سەرەتاییەکانیانە".  

  

یوسف محەمەد دەڵێت "هەموو ئەم رەفتارانە پێشێلکردنی گەورەی چەندین ماف و ئازادیی چەسپاوی دەستورن. لەوانە مادەکانی 17/ دووەم؛ 19/ سێیەم، چوارەم، شەشەم؛ 12/ أ؛ 13؛ 37/ أ، ب، ج؛ 38 و مادەی 40".  

  

هەروەها باسى لەوەکردووە ،هاوتەریب بەم پێشیلکارییانە پێشنیازە یاسایەک لە لایەن فراکسیۆنی پارتی لە پەرلەمانی کوردستان ئامادە کراوە بۆ سزادانی هەر کەسێک کە "بێڕێزی" بەرامبەر بە "رابەر" و سەرکردەکان بکات بە سزایەک کە دەگاتە حەوت ساڵ زیندانی.  

  

"هەموو ئەمانە لە کاتێکدایە کە کەسێکی وەک مەسرور بارزانی بە باکگراوندێکی ئەمنیی حیزبی لە لوتکەی هەڕەمی دەسەڵاتی هەرێمدایە. هەمو ئەمانەش ئەگەری هێنانە کایەی دەسەڵاتێکی پۆلیسی لە لەهەر کاتێکی تر بەهێز کردووە. ئەرکی هەموانە فشار بکەین بۆ بەرگرتن لەمە و وەستاندنی پێشێلکارییەکان بۆسەر ماف و ئازادییە گشتی و تایبەتییەکان"، یوسف محەمەد واینوسیوە.