گه‌ڕان

Shadow Shadow
سیاسه‌تی

ڕونکردنەوەى وەزارەتی شەهیدان لەبارەی گۆڕە بەکۆمەڵەکەی شەنگال 

2020.10.25 - 16:18
App store icon Play store icon Play store icon
ڕونکردنەوەى وەزارەتی شەهیدان لەبارەی گۆڕە بەکۆمەڵەکەی شەنگال 

ناس کورد-هەڤاڵ فەتاح

بڕیکاری وەزارەتی شەهیدانی حکومەتی هەرێمی کوردستان ڕایگەیاند، ئەو گۆڕە بەکۆمەڵەی کە لەئێستادا لەشەنگال هەڵدراوەتەوە، پێشبینی دەکرێت 70 تەرمی ژنانی بەساڵاچووی ئیزیدییەکانی تێدا بێت، ئاماژەی بەوەشکرد، گۆڕەکە دەکەوێتە نزیک پەیمانگەی تەکنیکی شەنگالەوە.

 

کەناڵی ناس کورد لە تێلیگرام جۆین بکە   

بەراڤان حەمدی، بریکاری وەزارەتی شەهیدانی حکومەتی هەرێمی کوردستان لەلێدوانێکی تایبەتدا بەناس کوردى ڕاگەیاند (25ی تشرینی یەکەمی 2020 ) ، "ئەو گۆڕە بەکۆمەڵەی کە لەئێستادا لە شەنگال کاری کنە و پشکنینی تێدا دەکرێت، پێشبینی دەکرێت  لەنێوان 60 بۆ 70 تەرمی ژنانی بەساڵاچووی ئیزیدییەکانی تێدا بێت کەلە 3ی ئابی 2014دا لەسەر دەستی  چەکدارانی ڕێکخراوی داعش گولەباران کراون".

 

وتیشی :"بەهاوبەشی دەزگای شەهیدان و بەڕێوەبەرایەتی گۆڕە بەکۆمەڵەکانی عێراق  وهەردوو وەزارەتی تەندروستی هەرێمى کوردستان وعێراق و بەسەرپەرشتی ڕێکخراوی (یونیتاد)ی سەر بەنەتەوە یکگرتووەکان کارەکانی هەڵدانەوە لەو گۆڕە بەکۆمەڵانەدا  ئەنجام دەدرێت".

 

حەمدی ئاماژە بەوەشکرد: "قۆناغی یەکەمی هەڵدانەوەی گۆڕە بەکۆمەڵەکانی شەنگال لە (15ی ئاداری 2019) دەستی پێکرد، دەرئەنجام توانرا لەکۆی 71 گۆڕی بەکۆمەڵ  16 گۆڕیان هەڵبدرێتەوە کە (205) تەرمی تێدا بوون، لەئێستادا توانراوە لەلایەن تاقیگەکانی حکومەتی عێراقییەوە 100 تەرمیان بناسرێتەوە لەگەڵ خانەوادەکانیاندا، پڕۆسەکەش تائێستا بەردەوامە".

 

بەوتەی بڕیکارەکەی وەزارەتی شەهیدان :"دۆخی ئەمنی ناوچەکە ڕۆڵی باڵای دەبێت لە بەردەوامبوونی قۆناغی دووەمی هەڵدانەوەی  گۆڕە بەکۆمەڵەکانی سنوری قەزای شەنگال".