گه‌ڕان

Shadow Shadow
سیاسه‌تی

مەسعود بارزانی: بەشێك لە حیزبەكان بێ بەڵێن بوون، عەلی باپیر سەرسامی خۆی پیشاندا

2020.10.24 - 23:45
مەسعود بارزانی: بەشێك لە حیزبەكان بێ بەڵێن بوون،  عەلی باپیر سەرسامی خۆی پیشاندا

ناس کورد-

 

مەسعود بارزانى دەڵێت، لەبرى كاركردن بۆ بابەتێكى چارەنوسسازى وەك سەربەخۆيى، حزبەكان لەناو پەرلەمان سەرقاڵى دروستكردنى قەيران و كودەتابوون.

 

مەسعود بارزانى سەرۆكى پارتى لە کتێبێکەیدا بەناوى (بۆ مێژوو) لەبارەى روداو و لێکەوتەکانى ئەنجامدانى ڕیفراندۆمى سەربەخۆیى کە ناس کورد بەدواداچوونى بۆ کردووە (24 تشرینی یەكەمی 2020)  ئاماژەى بەوەداوە، "دواى گەڕانەوەم لە ئەمريكا دەستبەجێ لەگەڵ لايەنەكان دانيشتم و ئەنجامى سەردانەكەم بۆ باسكردن، لەكۆبونەوە مێژووييەكەى 18ى ئايارى 2015 دا لايەنەكان بۆچونى خۆيان بۆ پشتگيريكردنى پرۆسەى سەربەخۆيى بە ئاشكرا دەربڕى، هەر لەو كۆبونەوەيەدا عەلى باپير ئەميرى كۆمەڵ سەرسامى خۆى بە ئەنجام و دەستكەوتەكانى سەردانەكەمان پيشاندا".

 

ڕونيشيكردوەتەوە، "عەلى باپير وتيشى جەنابى كاك مەسعود پێدەچێت بە دەستێكى پڕ گەڕابێتەوە، ئەوە كارێكى زۆر گەورەيە و بەرپرسيارێتيەكى گەورەشە، ئايا تۆ ئامادەى ئەو بەرپرسيارێتييە قبوڵ بكەيت؟، لە وەڵامدا پێموت بەڵێ مامۆستا بەرپرسارێتييەكى گەورە و مێژوييە و ئامادەم هەڵيگرم بەڵام بەمەرجێك لەناوخۆدا تێكى نەدەن".

 

سەرۆكى پارتى هێماى بۆ ئەوەشكردوە، "راستيەكەى ئەو وەڵامە لەبەر ئەوە بوو دڵنيا نەبووم ئايا بەشێك لە حزبەكان هەتا سەر لە پرۆسەى سەربەخۆييدا لەگەڵ گەلى كوردستان دەمێننەوە يان بە پێچەوانەوە لەنيوەى ڕێگەدا پشت لە ويست و ئيرادەى گەلەكەيان دەكەن".

 

بارزانى دەشڵێت، مانگێك دواى ئەو كۆبونەوەيە لەبرى كاركردن بۆ بابەتێكى چارەنوسسازى وەك سەربەخۆيى، حزبەكان لەناو پەرلەمان سەرقاڵى دروستكردنى قەيران و كودەتابوون و ڕوداوەكانى 23ى حوزەيران و دواترى لێكەوتەوە، ،ئەگەر لايەنەكان كاريان بە بەڵێنەكانى خۆيان كردبا و بەرەو قەيرانسازى نەڕۆشتنايە ئێستا هەمومان لە دۆخێكى تردا بووين، بينيشمان لە ڕيفراندۆمى 2017 چۆن هەندێك لايەن لە دژى وەستان و ڕوداوەكانى دواى ڕيفراندۆميش گەواهين بۆ سەلماندنى ئەو ڕاستيە".