گه‌ڕان

Shadow Shadow
سیاسه‌تی

حەشدی شەعبی ئێزدییەکان هەڕەشەی بەکارهێنانی چەک دەکات لەدژی ڕێککەوتنی هەولێر و بەغدا

2020.10.24 - 12:08
حەشدی شەعبی ئێزدییەکان هەڕەشەی بەکارهێنانی چەک دەکات لەدژی ڕێککەوتنی هەولێر و بەغدا

ناس کورد-

فەرماندەیەکى سەربازیی ئێزدییەکان کە فەوجەکەى سەر بە حەشدی شەعبییە ڕادەگەیەنێت، گەر پارتى و حکومەتى فیدراڵ بیانەوێت بەزۆر بۆ ناوچەکەیان بگەڕێنەوە ئەوا بەهێزى چەک ڕوبەڕوویان دەبنەوە، ئەو فەرماندەیە داواى هەڵوەشاندنەوەى ڕێکەوتنەکەى هەولێر و بەغداش دەکات.

 

خاڵ عەلى، فەرماندەى فەوجى لالشی سەر بە حەشدی شەعبی لە شنگال لە چاوپێکەوتنێکدا بۆ میدیایەکی پەکەکە کە ناس کورد بەدواداچوونی بۆ کردووە (24تشرینی یەکەمی 2020)، ڕێکەوتنەکەى پارتى و حکومەتى بەغدا بۆ گەڕانەوەى ئەو دوو هێزە قبوڵ نەکات و ئەگەر بەزۆر بیانەوێت ئەو ڕیککەوتنە بەسەریاندا بسەپێنن ئەوا ئەوانیش بەچەک ڕوبەڕوویان دەوەستنەوە و ڕێگە نادەن بگەڕێنەوە بۆ شنگال".

 

خاڵ ئاماژەى بۆ ئەوەش کرد، پێشتر ئێزدییەکان قوربانى دەستى تیرۆر و داعش بوون و پارتی ئەوانى فرۆشت و بەجێهێشتن و ئێستاش نایانەوێت ئەو هێزە بگەڕێنەوە ناوچەکەیان و خۆیان بەسەریاندا بسەپێنن.

 

لەبارەى ئەوەى کە ڕێککەوتنەکەى پارتى و بەغدا بۆ لاوازکردنى هیلالى شیعەیە لەو ناوچەیە، فەرماندەکەى فەوجى لالش وتى، "ئێمە هەقمان بەسەر ئەو پرسە نێودەوڵەتییانەوە نییە، ئێمە گەلى خۆمان لەهەر هەڕەشە و مەترسیەک کە جارێکى تر بێتە ڕێگاى دەپارێزێن وقبوڵ ناکەین جارێکى تر بمانفرۆشن چونکە ئێزدییەکان بۆ فرۆشتن نین".

 

لەکۆتایى وتەکانیشدا خاڵ عەلى دەشڵێت، "دەبێت ئەو ڕێککەوتنە هەڵبوەشێتەوە و ئەگەر ئەو لایەنانە دەیانەوێت کاردانەوەى ئێزدییەکان تاقى بکەنەوە ئەوا ئەوان کاردانەوەیان بەهێز پیشاندەدەن و ڕێگرى لە گەڕانەوەى چەکدارانى پارتى و حکومەت دەکەین چونکە گەل لەوانە بەهێزترە".

 

وتەکانى ئەو فەرماندەیەى ئێزدییەکان لەکاتێکدایە، زیاتر لەدوو هەفتەیە حکومەتى هەرێم و فیدراڵ ڕێکەوتنێکیان بۆ ئاسایى کردنەوەى ناوچەى شنگال واژۆ کردووە و ئەو ڕێکەوتنەش کاردانەوەى زۆرى بەدواى خۆێدا هێناوە و بەشێک لەئێزدییەکان ڕەتیدەکەنەوە جارێکى تر پارتى و حکومەتى فیدراڵ دەسەڵاتى بەسەر ناوچەکەیاندا هەبێت.