گه‌ڕان

Shadow Shadow
سیاسه‌تی

زانیارى نوێ لەبارەى دۆخى شێروان شێروانى لە زیندان لەزارى هاوسەرەکەیەوە 

2020.10.23 - 22:27
زانیارى نوێ لەبارەى دۆخى شێروان شێروانى لە زیندان لەزارى هاوسەرەکەیەوە 

ناس کورد- 

هاوسەرى ڕۆژنامەنووس شێروان شێروانى  لەبارەى چارەنوسى هاوسەرەکەیەوە زانیارى نوێ بۆ ناس کورد ئاشکرا دەکات و دەڵێت، خاچى سورى نێودەوڵەتى لەزیندان سەردانیان کردووە  و نامەیەکى ئەویشیان لەزیندانەوە بۆ هێناوە.

 

ڕوگەش عزەدین جەبار، هاوسەرى ڕۆژنامەنوس شێروان شێروانى تایبەت بەناس کوردى ڕاگەیاند (23ى تشرینى یەکەمى 2020)، "دواى ئەوەى چەند ڕۆژێک پیش ئێستا چومە بارەگاى خاچى سورى نێودەوڵەتى داوامکرد لەرێگەى ئەوانەوە سۆراخى هاوسەرەکەم بزانم چونکە دواى چەندین ڕۆژ دەستگیرکردنى هیچ سۆراخێکیمان نەزانى". 

 

وتیشى "ئەمڕۆ (هەینى) خاچى سورى نێودەوڵەتى پەیوەندیان پێوە کردم و دواى ئەوەى سەردانى شێروانیان کرد بوو لەزیندان و بینویانە نامەیەکى ئەویان پێ بوو بەهۆى ئەوەى من دورم لەهەولێرەوە بۆ ئەوەى زوو ناوەڕۆکەکەى بزانم بۆیان خوێندمەوە". 

 

ڕوگەش ناوەڕۆکى نامەکەى بۆ ناس کورد ئاشکرا کرد و وتى" لەناوەڕۆکى نامەکەدا دەڵێت بارودۆخم باشە لەزیندان و خواردن و خواردنەوەشم باشە و خەمى منتان نەبێت".

 

لەسەر بارودۆخى جەستەیى و دەرونى شێروان هاوسەرەکەى وتى "من لەسەر زارى بەرپرسانى خاچى سورى نێودەوڵەتیەوە بیستومە کە دەموچاو و جەستەى هیچ شوێنەوارێکى لێدانى پێوە نەبووە".

 

ڕوگەش ئەو شوێنەشى بۆ ناس کورد ئاشکرا کرد کە شێروانى هاوسەرى تیایدا زیندانى کراوە و وتى "ئێستا شوێنى زیندانیەکەى شێروان دەزانین و لەئاسایشى گشتى هەولێرە".

 

نزیکەى 15 ڕۆژ پێش ئێستا، لەلایەن هێزێکى ئەمنی و بەفەرمانى دادوەر شێروان شێروانى دەستگیرکرا  و بۆ ماوەى چەند ڕۆژ ڕێگە نەدرا کەسوکار و پارێزەر سەردانى بکەن و شوێنەکەشى ئاشکرا نەکرا، ڕوداوەکەش کاردانەوەى چالاکان و ڕۆژنامەنوسانى لەسەر ئاستى ناوخۆ و دەرەوە لێکەوتەوە.