گه‌ڕان

Shadow Shadow
سیاسه‌تی

لەبارەی قەرز بەخشین بەحكومەت دارایی پەڕلەمان لێدوانی دا

2020.10.23 - 21:07
لەبارەی قەرز بەخشین بەحكومەت دارایی پەڕلەمان لێدوانی دا

ناس کورد-

لیژنەى دارایى لەپەرلەمانى عێراق جەخت لەسەر ئەوە دەکاتەوە، لەکۆبونەوەى هەفتەى داهاتوودا لەگەڵ وەزیرى دارایى بەدواداچوون بۆ بڕى قەرزەکانى پێشوو و بڕى قەرزکردن لەداهاتووشدا دەکەن.

 

ئەحمەد سەفار، بڕیاردەرى لیژنەى دارایى لەپەرلەمانى عێراق لە لێدوانێکى بۆ ئاژانسى فەرمى عێراق کە ناس کورد بەدواداچوونى بۆ کردووە، ڕاگەیاند (23ى تشرینى یەکەمى 2020) :"هیچ بڕیارێکى لیژنەکەیان نیە بۆ تێنەپەڕاندنى یاساى پڕکردنەوەى کورتهێنانى دارایى و بۆچونى ئەندامانى لیژنەکەمان لەسەر ئەو پڕۆژە یاسایە جیاوازە، هەیە دژیەتى و هەیە لەگەڵ ئەوەدایە تێپەڕێت".

 

 وتیشى :"هەفتەى داهاتوو لیژنەکەمان لەگەڵ وەزیرى دارایى کۆدەبێتەوە بۆ ئەوەى دروستى ژمارەکە بزانرێت کە چەندە پێویستە بۆ قەرزکردن و هەروەها ئاگاى لەچۆنیەتى بەکارهێنانى و هەروەها سەرجەم خەرجیەکان بێت، ئینجا لیژنەکەیان بڕیار لەسەر یاساکە دەدەن".

 

سەفار ئەوەشى ڕوونکردووەتەوە، پێویستە لیژنەکەیان بەدواداچوون بۆ پڕۆژە یاساکە بکات و لەوەزیرى دارایى تێبگات ئینجا بڕیار بدات، چونکە ئیستا عێراق لەتەنگەژەیەکى ئابوریدایە، فەرمانبەر و خانەنشین و چاودێرى کۆمەڵایەتى و زۆر کاروبارى تر لەسەر ئەو پڕۆژە یاسایە وەستاوە و هەر دەبێت چارەسەرێک بۆ ئەو پرسە بدۆزرێتەوە.



بڕیاردەرى لیژنەى دارایى پەرلەمان ئەوەشى ڕوونکردەوە، تا ئیستا وەزارەتى دارایى بڕى قەرزەکانى نەخستووەتە ڕوو، لەکۆبونەوەکەیاندا داواى بڕى قەرزەکان دەکەن و هەروەها چۆنیەتى بەکارهێنانى قەرزى یەکەم و ئەو میکانیزمانەش کە بۆ قەرزى داهاتوو دەیگرێتە بەر.