گه‌ڕان

Shadow Shadow
سیاسه‌تی

دەستەی مافی مرۆڤ هێشتا نازانێت چەند چالاکوانێکی بادینان بۆچی دەستگیر کراون

2020.10.23 - 14:53
دەستەی مافی مرۆڤ هێشتا نازانێت چەند چالاکوانێکی بادینان بۆچی دەستگیر کراون

ناس كورد-

دەستەی سەربەخۆی مافەكانی مرۆڤ رایدەگەیەنێت، سەرقاڵی بەدواداچوونن بۆ هۆكاری دەستگیركردنی چالاكوانانی سنوری بادینان، بەڵام ئەوەی لای ئەوان گرنگە بەپێی یاسا هەر هاووڵاتییەك دەستگیر بكرێت پێویستە بڕیاری دادوەر هەبێت و پاشان مافی زانیاری لەلای كەسوكاری هەبێت كە ئەو دەزگایەی هاتوون بۆ دەستگیركردنی.

 

محەمەد گۆمەشینی، وتەبێژی دەستەی سەربەخۆی مافەكانی مرۆڤ ئەمڕۆ هەینی23ی تشرینی یەكەمی 2020، بە ناس كوردی راگەیاند، دوای ئەوەی دوێنێ و لەڕۆژانی رابردوو چەند چالاكوانێك لەناوچەی بادینان دەستگیركران، لەڕابردوو بەدواداچوونیان كردبوو بۆ ئەوەی بزانن هۆكاری ئەو حاڵەتانە چییە، بەپێی زانیاری سەرەتایی، دەستگیركردنەكانی رابردوو بەپێی بڕیاری دادگا بووە و لای دەزگا ئەمنییەكان بوون، بەڵام ئەوەی زیاتر پرسیاری لەبارەوە كرا شێروان شێروانی و شڤان سەعید بوون.

 

گۆمەشینی روونیكردەوە، خێزانی شێروان شێروانی سەردانی كردوون بەمەبەستی تۆماركردنی  سكاڵا، ئەوانیش راستەوخۆ نوسراویان بۆ ئاسایش كردووە بۆ هۆكاری دەستگیركردنی، بۆ شڤان سەعیدیش نووسینگەی دهۆكیان راسپێردراون بۆ بەدواداچوونی هۆكارەكانی دەستگیركردنی، كاتێك بەفەرمی وەڵامیان دەستكەوت، ئەو كاتە هۆكارەكانی دەستگیركردنیان دەزانن و دەتوانن بڵاویان بكەنەوە.

 

وتەبێژی دەستەی مافی مرۆڤ ئاماژەی بەوەشکرد: "ئەوەی گرنگە بەلای ئێمەوە، بەپێی یاسا هەر هاوڵاتییەك دەستگیر بكرێت پێویستە بڕیاری دادوەر هەبێت و پاشان مافی زانیاری لەلای كەسوكاری هەبێت كە ئەو دەزگایەی هاتوون بۆ دەستگیركردنی و بە چ ماددەیەك دەستگیركراوە، واتە لەماوەی 24 تا 72 كاتژمێر زانیارییان هەبێت، ئەوە جگە لەوەی مافی بینینی پارێزەریشیان هەبێت".

 

لەماوەی چەن ڕۆژی ڕابردوو و هەفتەکانی پێشووتریشدا چەند چالاكوانێك لەسنوری بادینان دەستگیركراون كە بەوتەی كەسوكاریان نازانن هۆكاری دەستگیركردنیان چییە.