گه‌ڕان

Shadow Shadow
سیاسه‌تی

نوێترین زانیاری لەبارەی بەرێوەچوونی پرۆسەی خوێندنی ئەمساڵ

2020.10.23 - 11:36
نوێترین زانیاری لەبارەی بەرێوەچوونی پرۆسەی خوێندنی ئەمساڵ

ناس كورد-

پەرلەمانتارێكی لیژنەی پەروەردە و خوێندنی باڵا لەپەرلەمانی كوردستان رایدەگەیەنێت، دوو رای جیاواز بۆ دەستپێكردنەوەی خوێندن لەناو قوتابخانەكان هەیە، بەڵام لەم هەفتەیەدا ئەنجام دەردەچێت بەوەی ئایا بەردەوامی بەخوێندنی نێو هۆڵەکانی خوێندن دەدرێت یان بەشێوەی ئەلكترۆنی بەردەوام دەبێت.

 

 

موسلیم عەبدوڵا قەسرێ، ئەندامی لیژنەی پەروەردە و خوێندنی باڵا لە پەرلەمانی کوردستان ئەمڕۆ 23ی تشرینی یەكەمی 2020 بە ناس كوردی راگەیاند، ئەو پلانەی كە دانراوە بۆ قۆناغەكانی 1 و 2ی بنەڕەتی و 12ی ئامادەیی بۆ خوێندنی نێو قوتابخانەكان جێبەجێ دەكرێت، بەڵام ئێستا ژمارەی تووشبووانی كۆرۆنا زیاتر دەبن و ئەوەش  مەترسی دروستكردووە.

 

وتیشی، بۆیە لیژنەكەیان بەهەماهەنگی وەزارەتی پەروەردە دۆخەكەیان تاوتوێكردووە و ئێستا لەدۆخی چاودێریدان، ئەگەر پێویستی بە هەر رێكارێك بێت لەڕۆژانی داهاتوودا قسەی لەسەر دەكەن، جا بە بەردەوامیدان بەم پلانەی ئێستا، یاخود دۆخەكە بڕواتە پڕۆسەی ئۆنلاینەوە.

 

سەبارەت بەوەی پێیان باش نییە دوای 1ی تشرینی دووەمیش واتە (1-11) ناوەندەكانی خوێندن بكرێنەوە، موسلیم قەسرێ روونیكردەوە: "ئەوە دوو ڕای جیاوازی لەسەرە، ڕایەك پێیوایە خوێندنی ئەلكترۆنی هیچ سوودێك بەپڕۆسەی خوێندن ناگەیەنێت، رای دووەمیش پێیوایە ناكرێت ریسك بەژیانی نزیكەی ملیۆنێك و 800 خوێندكارەوە بكرێت."

 

بە وتەی ئەو ئەندامەی لیژنەی پەروەردە و خوێندنی باڵا: "بڕیاردان لەم دۆخەدا ئاسان نابێت و پێویستی بەدیراسەی ورد هەیە، لەم هەفتەیەدا ئەنجام دەردەچێت بەوەی ئایا بەردەوامی بەخوێندنی نێو هۆڵەکانی خوێندن دەدرێت یان بەشێوەی ئەلكترۆنی بەردەوام دەبێت، چونكە دیراسەی دەوێت".

 

وەزارەتی پەروەردەی حكومەتی هەرێم لەم مانگەوە دەستپێكردنەوەی پڕۆسەی خوێندنی بەشێوەی ئەلكترۆنی بۆ قۆناغەكانی 3ی بنەڕەتی تا 11ی ئامادەیی دەركردووە، ئەوەش بەهۆی زیاتربوونی ڤایرۆسی كۆرۆنا.