گه‌ڕان

Shadow Shadow
سیاسه‌تی

لێدوانى دارایى پەرلەمان لەبارەى سەردانەکەى کازمى بۆ ئەوروپا 

2020.10.22 - 10:05
لێدوانى دارایى پەرلەمان لەبارەى سەردانەکەى کازمى بۆ ئەوروپا 

ناس کورد- 

بڕیاردەرى لیژنەى دارایى لەپەرلەمانى عێراق ڕایگەیاند، مستەفا کازمى لەسەردانەکەیدا پشتیوانى وڵاتانى فەڕەنسا و ئەڵمانیا و بەریتانیا بەدەستدەهێنێت بۆ قەرز و بەخشین و هاریکاریى مادى و مەعنەوى تر و ڕۆڵى لەداڕشتنەوەى پەیکەرى ئابورى عێراقدا دەبێت.

 

ئەحمەد سەفار، بڕیاردەرى لیژنەى دارایى لەپەرلەمانى عێراق لە لێدوانێکى بۆ  ڕۆژنامەى سەباحى فەرمى کە ناس کورد بەدواداچوونى بۆ کردووە رایگەیاند (22ى تشرینى یەکەمى 2020)، مستەفا کازمى سەرۆک وەزیران لەسەردانەکەی ئێستایدا بۆ فەڕەنسا و ئەڵمانیا و بەریتانیا قەرز و هاریکارى و بەخشینى دارایى لەلایەن ئەو وڵاتانەوە دەستدەکەوێت کە هاریکارى عێراق دەکەن بۆ دەربازبونى لەقەیرانى دارایى کە ئێستا دوچارى بووە.

 

سەفار ئاماژەى بۆ ئەوەش کردووە، سەربارى ئەو هاریکاریانە، لەڕووى ئەمنیشەوە پاڵپشتى عێراق دەکەن کە پێویستى پێیەتى و ئەو وڵاتانەش هەوڵدەدەن ناوى عێراق لەلیستى ئەو وڵاتانەى کەمایەى مەترسین هەڵبگیردرێت.

 

سەفار باسى لەوەش کردووە، فەڕەنسا و ئەڵمانیا و بەریتانیا ئەو وڵاتانەن کە خاوەنى ئابورى زەبەلاحن و تواناى ئابورییان بەرزە، بۆیە سەردانەکەى کازمى بۆ ئەو وڵاتانەش بایەخى گەورەى هەیە لەزۆر لایەنەوە بەئەنجامدانى ڕێککەوتنێکەوە بۆ ئەوەى ئەو وڵاتانە هاوکاربن لەداڕشتەوەى پەیکەرى ئابورى عێراق لەچوارچێوەى وەرەقەى سپى چاکسازیدا.

 

بڕیاردەرى لیژنەى دارایى جەختى لەسەر ئەوەش کردەوە، قۆناغى یەکەم لەوەرەقەى سپى چاکسازى لەتواناى حکومەتدایە جێبەجێ بکات بەڵام قۆناغەکانى دواترى پەیوەستە بەداڕشتنەوەى پەیکەر و ژێرخان و چەند بوارێکى ترەوە کە پێویستیان بەوڵاتانى پێشکەوتوى دەرەوە هەیە ئەوانەى کەخاوەن شارەزاى زۆرن بۆیە سەردانەکە کارئاسانییەکە بۆ کارەکانى حکومەت بەمەبەستى چەسپاندنى وەرەقەى سپى چاکسازى.