گه‌ڕان

Shadow Shadow
سیاسه‌تی

قوتابخانە هەیە چەندین مامۆستاى توش بوون

لە قوتابخانەکانی هەرێم ’’ڕەوشەکە خراپە و ڤایرۆسی کۆرۆنا لە بڵاوبوونەوەدایە’’

2020.10.21 - 12:59
لە قوتابخانەکانی هەرێم ’’ڕەوشەکە خراپە و ڤایرۆسی کۆرۆنا لە بڵاوبوونەوەدایە’’

ناس کورد-

وەزارەتى تەندروستى سەرقاڵى هەڵسەنگاندنە بۆ بڵاوبوونەوەى کۆرۆنا لەناو قوتابخانەکان و بەپێی ئەنجامە بەراییەکان دەرکەوتووە کە رەوشەکە خراپە و ڤایرۆسەکە لە بڵاوبوونەوەدایە.

 

بۆ خوێندنى ئەمساڵ خوێندکارانى قۆناغەکانى 12ى ئامادەیی و یەک و دووى بنەڕەتى گەڕاونەتەوە قوتابخانەکان لە سنورى پارێزگاکانى هەولێر و دهۆک، بەڵام بەهۆى بایکۆتى مامۆستایانەوە هێشتا لە سنورى سلێمانى خوێندنى ئەو قۆناغانە دەستیپێنەکردووە.

 

ئاسۆ حەوێزى، وتەبێژى وەزارەتى تەندروستیی هەرێم بە ناس کوردى (21 تشرینی یەكەمی 2020) راگەیاند، کۆرۆنا لە بەشیک لە قوتابخانەکان بڵاوبووەتەوە، قوتابخانە هەیە چەندین مامۆستاى توشى پەتاکە بوون، بە رێژەى جیاجیا.

 

وتیشى، "لە قوتابخانە هەیە یەک پۆل رەوانەى ماڵەوە کراوەتەوە بەهۆى بڵاوبوونەوەى پەتاکەوە، ڕەوشەکە باش نییە و بەردەوامین لە هەڵسەنگاندن لەو بارەیەوە تا ئەنجامێکى گشتى دەستبخەین".

 

ئاسۆ حەوێزى باسى لەوەشکرد، ئەوان وەک وەزارەت راپۆرتى هەڵسەنگاندنى خۆیان ئامادە دەکەن و دەیخەنە بەردەم لیژنەى باڵاى بەرەنگاربوونەوەى کۆرۆنا لەهەرێم تا بڕیارى لەسەر بدات.

 

لیژنەى باڵاى بەرەنگاربوونەوەى کۆرۆنا هەفتەى ڕابردوو کۆبووەوە و بڕیاریدا سەرەتاى مانگى داهاتوو کۆبێتەوە بۆ هەڵسەنگاندنى بارودۆخى کۆرۆنا و وەرگرتنى بڕیارى پێویست.

 

ئالان حەمە سەعید وەزیرى پەروەردە کە ئەندامى لیژنەکەیە لە کۆنگرەیەکى رۆژنامەنوسدا ڕایگەیاند (14 تشرینی یەكەمی 2020)، خوێندنى پۆلەکانى دوانزەى و یەک تا سێی بنەڕەتى بەم شێوەیەى ئێستا تا یەکى مانگى داهاتوو بەردەوام دەبێت.



وتیشى، "سەرەتاى مانگى داهاتوو لەکۆبوونەوەى لیژنەى باڵاى کۆرۆنا بڕیارى دیکە دەدرێت".



وەزیرى پەروەردە باسى لەوەشکرد، بڕیارە نوێیەکە لەبەرمەبناى هەڵسەنگاندنى دۆخى کۆرۆنا لەلایەن وەزارەتى تەندروستییەوە دەدرێت.