گه‌ڕان

Shadow Shadow
سیاسه‌تی

لایەنگرانی حەشد هەینی بەتەمای داخستنی رێگایەكن 

2020.10.21 - 08:59
لایەنگرانی حەشد هەینی بەتەمای داخستنی رێگایەكن 

ناس کورد-

 

بزوتنەوەی ڕبعوڵڵا كە بەمدواییانە دروست بووە و خۆی بە لایەنگری حەشدی شەعبی دەناسێنێت بانگەوازێكی بڵاوكردەوە بۆ مانگرتنێكی كراوە و بڕینی رێگای گشتی نزیك فڕۆكەخانەی موسەننا. 

 

بزوتنەوەكە لە بەیاننامەیەكدا كە وێنەی لای "ناس كورد" هەیە (20 تشرینی یەكەمی 2020)، داوا لە لایەنگرانیان دەکات ڕۆژى هەینى داهاتوو کاتژمێرى 10ى سەرلەبەیانى لەبەردەم دەروازە فڕۆکەخانەى موسەننا نزیک پردى 14ى ڕەمەزان گردببنەوە و ڕێگاى سەرەکى لەبەردەم ئۆتۆمبێلەکاندا دابخەن، ئەوەش وەکو ناڕەزایەتیەک بەرانبەر دەستگیرکردنى کۆمەڵێک کەس کە "بێ بەڵگە و فەرمانى دادگا" دەستگیرکراون.

 

بزوتنەوەکە دەشڵێت "سەرمان سوڕ دەمێنێت لەوانەى کە خۆیان بەنوێنەرى پێکهاتەى شیعە دادەنێن و لەبەرامبەر ئەو ڕوداوانەدا وەکو نەعامە سەرى خۆیان کردووە بەژێر خۆڵەکەدا".

 

ڕەبعوڵا لەبەیاننامەکەیدا جەخت لەسەر ئەوەشدەکاتەوە "پێیاندەڵێین ئەمڕۆ ئێوە نەدەگەیشتنە ئەو پلەو پۆستانە گەر دەنگى ئەو بنکە جەماوەرییە نەبوایە کە ئەمڕۆ ژمارەیەکیان لێ دەستگیرکراون،  لەدواى ئازاد کردنى ئەو گەنجانە لەمڕۆ و سبەینێدا بەتوندى سەرزەنشتان دەکەین ئەى سیاسیەکانى ڕۆژگارى هەل و هەڵکەوت".

 

لەپاش سوتاندنى بارەگاى لقى پێنجى پارتى لەبەغدا کە ئەو بزوتنەوەیە بە سوتانى تۆمەتبار دەکرێت نزیکەى 18 کەس دەستگیرکران، ڕەبعوڵا لەگردبونەوەکەیدا کە بڕیارە ڕۆژى هەینى ئەنجامی بدات داواى ئازادکردنى ئەو دەستگیرکراوانە دەکات.