گه‌ڕان

Shadow Shadow
سیاسه‌تی

دوا قسەی پارتی لەبارەی سوتاندنی بارەگاکەی لە بەغدا

لەدوای سوتاندنی بارەگاکەیان شاندێکی پارتی سەردانی بەغدایان کرد

2020.10.20 - 23:41
App store icon Play store icon Play store icon
لەدوای سوتاندنی بارەگاکەیان شاندێکی پارتی سەردانی بەغدایان کرد

ناس کورد-

شاندێکی مەکتەبی سیاسیی پارتی دیموکراتی کوردستان بە سەرۆکایەتی جەعفەر ئیبراھیم و بە یاوەری نوێنەری بارەگای بارزانی  سەردانی بەغدایان کرد و لەگەڵ بەرپرسانی لقی پێنجی حزبەکە لە بەغدا کۆبوونەوە کە لە چەند ڕۆژی ڕابردوودا لەلایەن لایەنگرانی حەشدی شەعییەوە ئاگری تێبەردرا.

کەناڵی ناس کورد لە تێلیگرام جۆین بکە   

 

میدیای فەرمیی پارتی (سێشەممە 20ی تشرینی یەکەمی 2020) بڵاویکردەوە: "شاندێکی مەکتەبی سیاسیی پارتی دیموکراتی کوردستان بە سەروکایەتی  د.جەعفەر ئیبراھیم، ئەندامی مەکتەبی سیاسی، بە یاوەری د.عرفات کەرەم، نوینەری بارەگای بارزانی سەردانی بەغدایان کرد."

 

ئاماژەی بەوەشكردووە: " ئامانج لەو سەردانە بۆ لەنزیکەوە ئاگاداربوونی دۆخی ئەمنی و رێکخستن و سیاسی ھەڤاڵانی لقی پێنجی پارتی دیموکراتی کوردستانە، بەتایبەت دوای سووتانی بارەگای لقی پارتی لە لایەن گروپێکی توندڕۆی لە یاسادەرچوو و ئاژاوەگێڕەوە.

 

ئەوەشخراوەتەڕوو، لە میانی سەردانەکەدا شاندی مەکتەبی سیاسی پارتی دیموکراتی کوردستان، بە یاوەری نوێنەری بارەگای بارزانی کۆبوونەوەیەکی فراوانیان لەگەڵ ھەڤاڵانی بەرپرس و کارگێڕ و ئەندامانی لق و بەرپرسانی ناوچەکان ئەنجام دا.

 

ئەوەش هاتووە: "لە کۆبوونەوەکەدا دواین پێشھاتەکانی سیاسی و رێکخستن، خرایە بەرباس و گفتوگۆ و، ستایشی رۆڵی ھەڤاڵانی پارتی کرا بۆ دانبەخۆداگرتن و ئاستی بەرزیان لە خۆڕاگری و شێوازی مامەڵەکردنیان لەگەڵ رووداو و قەیرانەکاندا."

 

چەند ڕۆژێک پێش ئێستا، هۆشیار زێبارى، وەزیرى لەسەر کارلابراوى دارایى عێراق و ئەندامی مەکتەبی سیاسیی پارتی لەمیانەى چاوپێکەوتنێکى تەلەفزیۆنیدا وتی: " ئەو گروپانەى هێرشیان کردە سەر هەولێر هەر ئەو گروپانەن کە لەبەغدا هێرش دەکەنە سەر دیپلۆماتکاران ".  

  

وتەکانی هۆشیار زێباری، حەشدی شەعبی و لایەنگرانیانی توڕەکرد و ڕەخنەی توندیان لەوبارەیەوە ئاڕاستەی ناوبراو کرد و تەنانەت ژمارەکانیان بڵاوکردەوە و لەڕێگەی واتسئاپەوە هەڕەشەیان لێ کرد.  

  

هەر لە کاردانەوەی وتەکانی هۆشیار زێباریدا، (شەممە، 17ی تشرینی یەکەمی 2020) لایەنگرانی حەشدی شەعبی بەربەستی ئەمنییان تێپەڕاند و چوونە ناو بارەگای لقی پارتی لە بەغدا و بارەگاکەیان سوتاند و ئاڵای کوردستانیان لەسەر بارەگاکە داگرت و سوتاندیان، ئەوەش کاردانەوەی گەورەی لە ناوخۆ و دەرەوە لێکەوتەوە.