کەناڵی ناس کورد لە تێلیگرام جۆین بکە
ناس کورد- ڕاوێژکاری ئاسایشی نیشتمانی ئەمریکا ڕایگەیاند، کەشتییەکى فڕۆکەهەڵگر و کۆمەڵێک کەشتى هێرشبەر ڕەوانەى ئاوەکانى ڕۆژهەڵاتی ناوەڕاست دەکەن تاوەکو "پەیامێکى ڕوون بێت بۆ ئاگادارکردنەوەى ئێران لە هەر هێرشێک بۆسەر بەرژەوەندییەکانى ئەمریکا و هاوپەیمانەکانى لە ناوچەکە. جۆن بۆڵتن، ڕاوێژکاری ئاسایشی نیشتمانی ئەمریکا ڕاشیگەیاند، "وەک وەڵامێک بۆ چەند ئاماژە و هۆشدارییەکی نیگەرانکەر کەشتى فڕۆکەهەڵگری "ئەبراهام لینکوڵن" و کۆمەڵە کەشتییەکى هێرشبەر دەنێرینە ئاوەکانى ڕۆژهەڵاتى ناوەڕاست کە تەنها پەیام و ئاگادارکردنەوەیە بۆ ڕژێمی ئێران لە هەر هێرشێک." جۆن بۆڵتن ڕاشیگەیاند، "ئەمریکا هەوڵی شەڕکردن لەگەڵ ئێراندا نادات، بەڵام ئامادەیی تەواومان هەیە بۆ وەڵامدانەوەى هەر هێرشێک جا لەڕێگەى بەکرێگیراوەکان یان سوپای پاسداران یان هێزە فەرمییەکان ئێران."
لەلایەکی ترەوە، ماڵپەڕی ئەکسیوسی هەواڵیی ئەمریکی ڕایگەیاند، ئیدارەى ترەمپ لەم هەفتەیەدا خۆی بۆ ڕاگەیاندنی کۆمەڵێک سزای نوێ بەسەر ئێراندا ئامادە دەکات.
ماڵپەڕەکە لە زاری دوو بەرپرسی ئەمریکییەوە ئاماژەى بەوەشکرد، پێدەچێت چوارشەممەى ڕابردوو لەگەڵ ساڵیادی کشانەوەى ئەمریکا لە ڕێککەوتنە ئەتۆمییەکەى ئێران سزاکان ڕابگەیەنێت.
ئەو دوو بەرپرسە باسیان لە شێواز و سروشتى سزاکان نەکردووە بەڵام جەختیکردووەتەوە کە چەند کەرتێکى تری جیاواز لە کەرتی وزە دەگرێتەوە.
