گه‌ڕان

Shadow Shadow
سیاسه‌تی

چەمچەماڵ؛ چوار کەس لەسەر دۆسیەی کوشتنی دوو خوشکەکە دەستگیرکراون

2020.10.19 - 14:00
چەمچەماڵ؛ چوار کەس لەسەر دۆسیەی کوشتنی دوو خوشکەکە دەستگیرکراون

ناس کورد - هەڤاڵ غالب

دوای ئەوەی دوو خوشک  لە سنوری قەزای چەمچەماڵ بە کوژراوی لە گوندێکی سنورەکە تەرمەکانیان دۆزرانەوە، بەوتەی قائیمقامی قەزاکە لە ئێستادا چوارکەس بە تۆمەتی کوشتنیان دەستگیرکراون .

 

ڕەمک ڕەمەران، قائیمقامی چەمچەماڵ و سەرۆکی لیژنەی ئەمنیی قەزاکە بە ناس کورد-ی ڕاگەیاند :" دوای کوژرانی ئەو کچانە فەرمانی گرتن بۆ کۆمەڵێک کەس دەرچوو، لە ئێستادا چوار کەس دەستگیرکراون و کەسێکیان دانی بەتاوانەکەیدا ناوە و دواتر ئەوانی تریش دەستگیرکراون" .

 

وتیشی: " ئەو کەسانە  مامی کچەکانن و بە دوو شێوە تۆمەتبارن، بەشێکیان دەستیان لە شاردنەوەی تەرمەکاندا هەبووە، بەشێکیشیان تاوانەکەیان زانیوە و شاردویانەتەوە، بەڵام تۆمەتباری سەرەکیی دۆسیەکە کە باوکی کچەکانە تا ئێستا دەستگیرنەکراوە".

 

 قائیمقامی چەمچەماڵ ئاماژەی بوەشكرد، لە ئێستادا لێکۆڵینەوە لەدۆسیەکە بەرداوەمە و هەموو ئەو کەسانەی ناویان هاتووە دەستگیر دەکرێن و ڕووبەڕووی یاسا دەکرێنەوە .

 

ئەو دوو خوشکە لە ڕۆژی ١٧ی تەموزی ٢٠٢٠ لە نوسینگەی توندوتیژی خێزانی چەمچەماڵ بە مادەی ٧ی خێزانی لەدژی باوکیان سکاڵا تۆماردەکەن و ڕەوانەی شەڵتەر دەکرێن، تاوەکو ڕۆژی ١١ی ئابی ٢٠٢٠ دوای پڕکردنەوەی بەڵێننامە لەلایەن دادوەرەوە بەباوکی کچەکان کچەکانی ڕادەست دەکرێتەوە .

 

بە کوژراوی دۆزرانەوە و لە ئێستادا پۆلیس باوکی کچەکان بە تۆمەتباری سەرەکی دەناسێنێت .

 

تەرمی دوو خوشکەکە، بەناوەکانی هێلین-ی تەمەن ١٩ ساڵ و ئاوارە-ی ١٧ ساڵ لە گوندی ئیبراهیم ئاغای سنوری شوان دوای شەش ڕۆژ لە شاردنەوەیان دۆزرانەوە و ئاسەواری فیشەک بە جەستەیانەوە هەبوو، دوای دوو ڕۆژ لەلایەن ئیدارەی چەمچەماڵەوە تەرمی ئەو دوو کچە لەمەراسیمێکدا بەخاک سپێردرا .