گه‌ڕان

Shadow Shadow
سیاسه‌تی

گروپە چەكدارەكان بەنیازی پەرچەكردارێكیترن دژ بەكازمی

2020.10.18 - 21:49
گروپە چەكدارەكان بەنیازی پەرچەكردارێكیترن دژ بەكازمی

ئاژانسێكی سەر كەتیبەكانی حیزبوڵڵا بڵاویكردەوە كە لە پێنج پارێزگای عێراق لیژنەی سەرپەرشتیار دروستكراوە بۆ دەستپێكردنی مانگرتن لەدژی حكومەتی مستەفا كازمی.

 

ئاژانسەكە (صابرین نیوز) كە باوەڕ وەهایە سەر بە كەتیبەكانی حیزبوڵڵای عێراقی نزیك لە ئێران بێت لە زاری سەرچاوەی تایبەت بەخۆیانەوە ئەم ئێوارەیە (18 تشرینی یەكەمی 2020) ئەوەی لە سەكۆ ئەلەكترۆنییەكانی خۆی بڵاوكردەوە كە لیژنەی پەرپەرشتیاری لە 5 پارێزگای عێراقدا پێكهێنراوە بۆ ئەوەی مانگرتنی درێژ خایەن دەست پێ بكەن دژی حكومەتی مستەفا كازمی.

 

ئاژانسەكە وردەكاریی زیاتری ئاماژە پێ نەكردووە، تەنها ئەوە نەبێت كە ئەم جموجوڵە هێشتا بەغدای تێدا نییە. ئەم هەنگاوە كە گروپە چەكدارەكانی نزیك لە ئێران سەروكاریی دەكەن رۆژێك لەدوای هێرشكردنە سەر بارەگای پارتی دێت لە بەغدا كە بەگوێرەی ڕۆژنامەی"ئەلعەرەب (یەکشەممە 18ی تشرینی یەکەمی 2020) پەیامێکی ئاڕاستکراو بووە لەلایەن میلیشیاکانەوە بۆ مستەفا کازمی، سەرۆک وەزیرانی عێراق کە لەئێستادا لەهەوڵی ئەوەدایە سنورێک بۆ هەژموونیان دابنێت و ناوەڕۆكی پەیامەكەش ئەوەیە "هەرچی ئێمە بمانەوێ دەیكەین".

 

لەلایەكیترەوە ماڵپەڕی ئیندیپێندێنتی عەرەبی بڵاویكردەوە، گروپە چەكدارە عێراقییەكانی نزیك لە تاران لە پایزێكی سەختی داراییدا دەژین پاش ئەوەی لە سەردەمی عەبدولمەهدی بەهارێكی خۆشیان دی.

 

ماڵپەڕەكە لە ڕاپۆرتێكی شیكاریدا كە "ناس کورد" خوێندنەوەی بۆ كردووە (18 تشرینی یەكەمی 2020) جەخت لەوە دەكاتەوە، هەڵمەتەكانی كازمی بۆ بنەبڕكردنی گەندەڵی بووەتە هۆی وشككردنی سەرچاوەی دارایی گروپە چەكدارە عێراقییەكانی نزیك لە تاران كە بژێوی زۆربەیان لەسەر دەروازە گومرگییەكان و كاری قاچاخچێتییە، لەكاتێكدا كە ئامادەكارییەكانی هەڵبژاردن لەسەر پێیە.