گه‌ڕان

Shadow Shadow
سیاسه‌تی

چەکدارە عێراقییە زیندانیکراوەکانى داعش دەگوازرێنەوە

2020.10.18 - 19:14
چەکدارە عێراقییە زیندانیکراوەکانى داعش دەگوازرێنەوە

ناس کورد-

وەزارەتى کۆچ و کۆچبەرانى عێراق ڕایگەیاند، ژمارەى خێزانە عێراقییە داعشەکانى کەمپى هۆل لە سوریا زیاترە لە 30 هەزار کەس و دواى نۆژەنکردنەوەى کەمپى عەملە چەکدارە زیندانیکراوەکان بۆ ئەو کەمپە دەگوازنەوە.

 

لەڕاگەیەنراوێکیدا کە (18ى تشرینى یەکەمى 2020) بڵاوکراوەتەوە و کۆپیەکى دەستى ناس کورد کەوتووە، وەزارەتى کۆچ و کۆچبەرانى عێراق ڕایگەیاندووە، سەرژمێرى خێزانە عێراقییە داعشەکان لەکەمپى هۆڵ دەکەن و سەرجەمیان ژمارەیان دەگاتە 31 هەزار کەس.

 

باسى لەوەش کردووە، دەستدەکەن بەتەواوکردنى کەمپى عەملە بۆ گواستنەوەى چەکدارانى زیندانیکراوى داعش بۆ ئەو کەمپە دواى ئەوەى لەڕووى ئەمنیەوە توندوتۆڵ کرا.

 

لەبارەى چارەسەرکردنى کێشەى نیشتەجێ بوونەوە، وەزارەتى کۆچ ئەوەشى ڕاگەیاندووە، 300 پارچە زەوییان دابەشکردووە و هەوڵ بۆ کەمکردنەوەى قەیرانى نیشتەجێ بوون دەدەن کە بەهۆى چەند کێشەیەک لەساڵانى ڕابردوودا ڕویانداوە لەوانە تیرۆر.

 

وەزارەتى کۆچ داواش لەکۆمەڵگەى نێودەوڵەتى دەکات پاڵپشتى هەوڵەکانى عێراق بکەن بۆ یارمەتیدانى ئاوارەکان لەهاتنى وەرزى زستاندا بۆ ئەوەى کێشەى ئەو وەرزەیان تووش نەبێت.