گه‌ڕان

Shadow Shadow
سیاسه‌تی

فایلی پەیوەندییەكانی هادی عامری و ئەمەریكا بڵاوكرایەوە

2020.10.18 - 14:25
فایلی پەیوەندییەكانی هادی عامری و ئەمەریكا بڵاوكرایەوە

ناس کورد-

كۆمەڵێك بەڵگەنامەی هەواڵگریی بەعس بڵاوكرانەوە كە تیشك دەخەنە سەر پەیوەندییەكانی هادی عامری و ئیدارەی ئەمەریكا بە ڕەزامەندی عەلی خامنەیی لەسەروبەندی ئامادەكاریی ڕوخاندنی رژێمی سەدام حسێن لە 2002.

 

ئەم بەڵگەنامانە كە هی دەزگای هەواپێڵگری پێشوی عێراقە و گوزاراوەتەوە بۆ ئەمەریكا، لەلایەن ڕۆژنامەنوس و چالاكی میدیایی بەرەگەز ئاشوری ستیفن نەبیلەوە بڵاوكراوەتەوە كە لە وڵاتە یەكگرتووەكان نیشتەجێیە و "ناس كورد" بەدواداچوونی بۆ كردوون (18 تشرینی یەكەمی 2020).


بەڵگەكان ئاماژە بەوەدەكات ڕۆژانی 17 و 18 تشرینی دووەمی 2002 هادی عامری بە نوێنەرایەتی ئەنجومەنی باڵای ئیسلامی لەشاری كرماشانی ئێران لەگەڵ لایەنە ئۆپۆزسیۆنەكانی ئەوكاتی عێراق كردووە كۆبوونەوەیەكی سازكردووە بەمەبەستی هاندانیان بۆ هاوكاریكردنی ئەمەریكا و وتوشیەتی "لەسەر رەزامەندی وەلی فەقیه عەلی خامنەیی لەگەڵ ئەمەریكییەكان پەیوەندی دەگرین".


بەپێی بەڵگەنامەكان، هەر لەو كۆبوونەوەیەدا هادی عامری كە ئەوكات جێگری فەرماندەی فەیلەقی بەدر بووە رایگەیاندووە ئەوان دژی دەستێوەردانی دەرەكین لە عێراق و لەگەڵ یەكێتی و سەروەری خاكەكەیدان.

لە بەشێكی تری بەڵگەنامەكانی بەعس باس لەوەكراوە محەمەد باقر حەكیم ڕازیی بووە ئەندامانی بەدر بنێرێتە دەوڵەتی كوەیت بۆ ئەوەی ببنە چاوساغی هێزەكانی ئەمەریكا لە هێرش بۆسەر عێراقدا.


بڵاوكردنەوەی ئەم بەڵگەنامانە لەكاتێكدایە پەیوەندی گروپ و هێزە چەكدارەكانی شیعە و هێزەكانی ئەمەریكا و باڵیۆزخانەی ئەمەریكا لە عێراق گرژی و ئاڵۆزی زۆر بەخۆیەوە دەبینێت بەهۆی لێكەوتەكانی بەریەككەوتنی واشنتۆن و تاران و كوشتنی قاسم سلێمانی و ئەبو مەهدی موهەندیس.