گه‌ڕان

Shadow Shadow
سیاسه‌تی

ئەمەریکا دەرئەنجامێکی مەترسیداری سوتاندنی بارەگای پارتی لە بەغدا ئاشکرا دەکات

2020.10.18 - 09:04
ئەمەریکا دەرئەنجامێکی مەترسیداری سوتاندنی بارەگای پارتی لە بەغدا ئاشکرا دەکات

ناس کورد-

وەزارەتی دەرەوەی ئەمەریكا سەرکۆنەی ھێرشەکەی سەر بارەگای پارتی کرد لە بەغدا و دوپاتیشکردەوە، ڕەفتاری میلیشیاكان دەبنە هۆکاری تێکدانی سەقامگیری عێراق و دروستکردنی شەڕی تائیفی.

 

مۆرگان ئۆرتاگۆس، وتەبێژی وەزارەتی دەرەوەی ئەمەریكا لە ڕاگەیەندراوێکدا (یەکشەممە، 18ی تشرینی یەکەمی 2020) ڕایگەیاند: "بە توندی سەرکۆنەی ھێرشكردنە سەر بارەگای پارتی دیموكراتی كوردستان دەکەین لە بەغدا، لەلایەن لایەنگرانی حەشدی شەعبییەوە".

 

ئاماژە بەوەشکرد: "چالاکییە نەگریسەکانی ئەو میلیشیانەی کە لەلایەن ئێرانەوە پشتیوانی دەکرێن دەبێتە مایەی تێکدانی ئەمن و ئاسایشی عێراق، دەبێت لایەنە سیاسییەكان هەوڵی جدی بدەن بۆ پاراستنی دیموکراسییەت، بەبێ ھەڕەشە کردنی میلیشیا گێرەشێوێنەكان".

 

وەزارەتی دەرەوەی ئەمەریكا، داواشی لەسەرجەم لایەنە عێراقییەکان کردووە، لەم كاتە ھەستیارەدا كە عێراق پێیدا تێپەڕ دەبێت بەھۆی ڤایرۆسی كۆرۆنا و قەیرانی ئابووری و ھەڕەشەی بەردەوامی داعش، بەرپرسیارانە مامەڵە بكەن.

 

ڕۆژی شەممە، 18ی تشرینی یەکەمی 2020، لایەنگرانی حەشدی شەعبی لەدژی لێدوانەکانی هۆشیار زێباری، ئەندامی مەکتەبی سیاسیی پارتی لەدژی ئەو لایەنە، هەڵیانکوتایە سەر بارەگای لقی پارتی لە بەغدا و سوتاندیان، هاوکات چەندین ئاڵای کوردستانیان سوتاند و سوکایەتییان پێ کرد.  

 

لەلایەکی ترەوە، نێردەی نەتەوە یەکگرتووەکان لە عێراق نیگەرانی خۆی لە سوتاندنی ئاڵای هەرێمی کوردستان و بارەگای پارتی لە بەغدا نیشان دا و بە پێوستیشی زانی ڕووداوی توندوتیژی بە هیچ شێوەیەک نەبێتە جێگرەوەی گفتۆگۆ بۆ چارەسەرکردنی کێشەکان.


نێردەی نەتەوە یەکگرتووەکان لە عێراق (یونامی) لە هەژماری تویتەری خۆی دەڵێت، "بە نیگەرانییەکی زۆرەوە دەڕوانینە سوتاندنی ئاڵای هەرێمی کوردستان و بارەگای پارتی دیموکراتی کوردستان لە بەغدا، دەبێت بەهەموو شێوەیەک سەرکۆنەی ڕووداوەکانی توندوتیژی و تۆقاندن بکرێت، چونکە ڕێگاچارە نییە بۆ چارەسەرکردنی کێشەکان".


لەتویتەکەدا هاتووە، "عێراق پێویستی بە یەکڕیزی و ئارامی و گفتوگۆ هەیە بۆ چارەسەرکردنی کێشەکانی".