گه‌ڕان

Shadow Shadow
سیاسه‌تی

پەروەردەی سلێمانی بۆ مامۆستایان: دەوام دەستپێبکەنەوە

2020.10.17 - 21:58
پەروەردەی سلێمانی بۆ مامۆستایان: دەوام دەستپێبکەنەوە

ناس كورد-

بەڕێوەبەرایەتییەكانی پەروەردەی رۆژئاوا و رۆژهەڵاتی سلێمانی داوا لەقوتابخانەكانی سنورەكانیان دەكەن دەست بەدەوامی فەرمی بكەنەوە.

 

بەكر محەمەد، بەڕێوەبەری پەروەردەی رۆژئاوای سلێمانی، ئەمڕۆ شەممە 17ی تشرینی یەكەمی 2020، بە ناس كوردی راگەیاند، هەردوو پەروەردەی ڕۆژئاوا و ڕۆژهەڵات پێیانوایە كاتی ئەوە هاتووە مامۆستایان بچنەوە ناوەندەكانی خوێندن و دەوام دەستپێبكەنەوە و بەگوێرەی فەرمانە وەزارییەكان كە پۆلەكانی 1و2ی بنەڕەتی و پۆلی 12ی ئامادەیی بەهەموو بەشەكانیەوە لەناو خوێندنگە دەوام دەكەن و پۆلەكانی تریش بەشێوازی خوێندنی ئەلكترۆنی دەبێت.

 

سەبارەت بەوەی ئەگەر دوای دابەشكردنی موچە، مامۆستایان پابەندی دەوامكردن نەبوون، هەڵوێستی پەروەردە چی دەبێت، پێشتر بەكر محەمەد بە ناس كوردی راگەیاندبوو، دوای دابەشكردنی مووچەش ئیلتیزام بەبڕیارەكانی وەزارەتی پەروەردەوە دەكەن و ئاگاداری مامۆستایان دەكەنەوە بۆ دەوامكردن، بەڵام مامۆستایانیش بەتەنها وابەستەی ئەوان نین، بەڵكو رێكخراوی یەكێتی مامۆستایانیش هەیە، پاشان شاری سلێمانیش دۆخێكی تایبەتی هەیە و مامۆستایانیش بەجۆرێك لەجۆرەكان تووڕەن، لەبەرئەوەی مووچەكە بەو شێوەیە رۆیشتووە.

 

ئاماژەی بەوەشكردبوو: "تەمەننا دەكەین دوای مووچە دەوام دەست پێبكاتەوە، بەڵام ئەگەر دەستی پێنەكردەوە، ئەوا ئێمە و پەروەردەكانی دیكەش راپۆرتی خۆمان دەدەینە بەڕێوەبەرایەتی گشتیی پەروەردە با ئەو كاتە وەزارەت بڕیار بدات".

 

هاوکات سەبارەت بەوەی ئەگەر دوای دابەشكردنی مووچە، مامۆستایان پابەندی دەوام نەبوون، سزای مامۆستایان دەدەن، بەڕێوەبەری پەروەردەی رۆژئاوا ئاماژەی بەوەكرد: "تائێستا هیچ بڕیارێك لەو بارەیەوە نییە، وەك خۆمان بیرمان لەسزا نەكردووەتەوە، چونكە سزا و پاداشت بەیەكەوەیە".