گه‌ڕان

Shadow Shadow
سیاسه‌تی

پڕۆژە سیاسییەكەی قادری حاجی عەلی چییە؟

2020.10.17 - 20:14
پڕۆژە سیاسییەكەی قادری حاجی عەلی چییە؟

ناس کورد-

هەڵمەتی بەرفراوانی دەبڕینی هاوسۆزی بۆ قادری حاجی عەلی كە سەركردەیەكی دانیشتووی گۆڕانە، پرسیارێكی وروژاند كە ئاخۆ ناوبراو پێش نەخۆشكەوتنی پڕۆژەیەكی سیاسیی بۆ جێگرتنەوەی گۆڕان هەبووە یان ئەم هاوسۆزیانە تەنها هی هاوڕێیەتییە؟.

 

بەپێی بەدواداچوونەكانی "ناس کورد" پێش ئەوەى دووچارى ڤایرۆسى کۆرۆنا بێت لە كۆتایی ئەیلولی 2020، قادرى حاجى عەلى بەنیاز بووە بچێتە شارى هەولێر و لەوێ لەگەڵ ژمارەیەک لەناڕازییە هاوڕێکانیدا تاوتوێی  پێکهێنانى جوڵانەوەیەکى سیاسیى نوێ بكات لەهەرێمى کوردستان لە دەرەوەی بزوتنەوەی گۆڕان كە دوا وێستگەی فەرمیی سیاسی ئەو بووە لەپاش جیابوونەوەی لە یەكێتی.

 

لەو میانەیەشدا زانیارییەكانی "ناس کورد" ئاماژە بۆ ئەوە دەكەن جموجوڵەكەی قادری حاجی عەلی لە هەولێر بڕیاربووە پێش 16 ئۆكتۆبەر بەرێوە بچێت، بەڵام توشبوونی بە كۆرۆنا و تێكچوونی باری تەندروستیی نەیانهێشتووە بەئاكام بكات.

 

سەرچاوەکانى "ناس کورد" ئاماژە بۆ ئەوەش دەکەن، قادرى حاجى عەلى لە گفتوگۆی دروستكردنی جوڵەیەكی سیاسیدایە، ئیتر چ لە شێوەی قەوارەی سیاسی بێت یان لیستی هەڵبژاردن كە ببێتە ڕووگەی كۆكردنەوەی ناڕازییەكانی گۆڕان و پڕۆژەیەكی جێگرەوە بۆ ئەم بزوتنەوەیە كە ئێستا دووچاری ڕەخنەی زۆری بەشێك لە چالاك و هەڵسوڕێنەرانی پێشووی بووەتەوە.

 

ئەوەشی تێبینی كراوە لە نەخۆشییەكەی و ناجێگیریی باری تەندروستیدا سەرجەم ئەوانەی ئێستا زویرن لە گۆڕان یان دانیشتون یان ڕەخنەیان هەیە، لە تۆڕە كۆمەڵایەتییەكان خەمی تەندروستیی ئەویان بووە و هیوای چاكبوونەوەیان بۆ خواستووە و ستایشی كارنامە و باكگراوەندی سیاسیی ئەویان كردووە.

 

هەر لەو میانەیەشدا دکتۆر محمەد کیانى، پەرلەمانتارى پێشووترى فراکسیۆنى گۆڕان لەبەغدا لە كۆمێنتێكدا بۆ قادری حاجی عەلیی نووسوە: "هاوڕێ گیان دوو هەفتە لەمەوبەر سۆزت دا یا ئەڵڵاى لێ دەكەین و جاڕی شۆڕشێكی ڕاستەقینە دەدەین"، بەبێ ئەوەی هیچی زیاتر لەمبارەیەوە بدركێنێت.

 

قادرى حاجى عەلى لە شەستەکانى تەمەنیدایە و یەکێکە لەدەستەى دامەزرێنەرانى گۆڕان، بەڵام دوو ساڵە وازى لەو بزوتنەوەیە هێناوە.

 

دواى تێکچوونى بارودۆخى تەندروستیشی بەهۆی ڤایرۆسى کۆرۆناوە كەسانی نزیكی رێوەڕەسمێكی هاوسۆزیان بۆ بەرێوەبرد لە سلێمانی پاش راگەیاندنی لە رێگەی سۆشیال میدیاوە، بەر لەوانیش لە سەركردە دیارەكانی گۆڕان تەنها عەدنان عوسمان پەیامی هاوسۆزی ئاڕاستە كردبوو.

 

قادر حاجی عەلی كە كارەكتەرێكی سیاسی كەمدووە، زۆر جار وەك پیاوی پشت پەردە ناسراوە  و زانیاری كەم لەبارەی پرۆفایلەكەیەوە هەیە، بەڵام لەدوای جیابوونەوەی لە یەكێتی و دەستبەرداربوونی ئەندامێتی مەكتەبی سیاسی وەك جێگرەوەی نەوشیروان مستەفا و كەسی دووەم تەماشا دەكرا لەناو گۆڕان، بەڵام دواتر بەهۆی نیگەرانی و ناڕەزاییەوە لەم بزوتنەوەیە دووركەوتەوە.

 

لەسەر ئاستی خودی خۆشی خاوەنی سێ منداڵە و دووجار هاوسەرگیری كردووە، بڕوانامەی لە زانستی جیۆلۆجیا بەدەستهێناوە و برای هونەرمەندی كۆچكردوو حەمە جەزایە و خەڵكی شاری سلێمانییە، بەهۆی ئەوەشی دامەزرێنەری دەزگای زانیاریی یەكێتی بووە، كە دەزگایەكی هەواڵگرییە زۆربەی ژیانی سیاسی دوور لەچاوی میدیا گوزەراندووە.