گه‌ڕان

Shadow Shadow
سیاسه‌تی

هێرشێک لە پارتییەوە: بۆچى زمان لە دەمتاندا نەبوو کاتێک هێرشکرایە سەر نوسینگەی سیستانی

2020.10.17 - 15:40
هێرشێک لە پارتییەوە: بۆچى زمان لە دەمتاندا نەبوو کاتێک هێرشکرایە سەر نوسینگەی سیستانی

ناس کورد-

فراکسیۆنى پارتى لەپەرلەمانى عێراق هێرش دەکاتە سەر ئەو لایەنانەى کە بارەگەى لقى پێنجى حزبەکەیان لەبەغدا سوتاند و دەڵێت، "بۆچى زار لەدەمتاندا نەبوو کاتێک هێرشکرایە سەر بارەگاکەى سیستانی".

 

ئارام باڵەتەیی، وتەبێژى فراکسیۆنى پارتى دیموکراتى کوردستان لە پەرلەمانى عێراق لە تویتێکدا (17ى تشرینى یەکەم 2020) ڕایگەیاند، "کاتێک لەلایەن کەسانى نا عێراقیەوە هەڵکوترایە سەر بارەگاى عەلى سیستانى، زمانتان لاڵ بوو و وشەکان لەناو دەمتاندا قەتیس بوو، بەڵام کاتێک داواى پاراستنى شاندە دیپلۆماتکارەکان لە دەرچووان لە یاسا دەکرێت ئێتر ئێوە تۆڵەکردنەوەتان دەگۆڕێت".

 

وتوشیەتى، "کامەیان گرنگترە، خاوەن فتوا یاخود ئەوانەى کە فتوایان بۆ چەند مەبەستێکى تایبەتى قۆرخکردووە؟ ئایا ئێوە بەڕاستى ئازادن..؟".



لەکاردانەوەیەکى تردا لەسەر ڕوداوى هەڵکوتانە سەر لقى پارتى لەبەغدا لەلایەن لایەنگرانى حەشدى شەعبیەوە، شوان تەها بەرپرسى لقى پێنجى پارتى لەبەغدا لە لێدوانێکى ڕۆژنامەنوسیدا ڕایگەیاندووە، سکاڵاى یاساى لەسەر حکومەتى عێراق بەرز دەکەنەوە بەهۆى ئەوەى ئاسایشى بارەگاکەى نەپاراستووە.

 

ئەمڕۆ (شەممە، 17ی تشرینی یەکەمی 2020) لایەنگرانی حەشدی شەعبی بەربەستی ئەمنییان تێپەڕاند و چوونە ناو بارەگای لقی پارتی لە بەغدا و بارەگاکەیان سوتاند.    

  

خۆپیشاندانی لایەنگرانی حەشدی شەعبی لە دژی لێدوانەکانی هۆشیار زێباری، ئەندامی مەکتەبی سیاسیی پارتییە لەبارەى هێزەکانی حەشدی شەعبی.     

 

چەند کاتژمێرێک دوای سوتاندنی بارەگای لقی پارتی لە بەغدا لەلایەن لایەنگرانی حەشدی شەعبییەوە، هۆشیار زێباری، ئەندامی مەکتەبی سیاسیی پارتی ڕایگەیاند، "حەشد هێزێکی دەستورییە و من هێرشم نەکردوەتە سەری".  

  

هۆشیار زێباری بە کەناڵی (العهد)ی سەر بە قەیس خەزعەلی وت، حەشدی شەعبی هێزێکی خەباتگێڕ و جیهادكار و دەستورییە، من لە چاوپێکەوتنەکەمدا لەگەڵ کەناڵی (الحرة) هێرشم نەکرووەتەسەر حەشدی شەعبی و شتێکیان بەناوی منەوە وتووە کە من نەموتووە."    

  

دەشڵێت، "پەیوەندی مێژوویمان لەگەڵ سەرکردەکانی حەشدی شەعبی و تێکۆشەرانیدا هەیە. حەشدی شەعبی دامەزراوەیەکی دەستورییە و نکولی لە هەوڵەکانی ناکرێت لە سەرکەوتن بەسەر داعشدا."