گه‌ڕان

Shadow Shadow
سیاسه‌تی

ڕەبعەڵڵا كێن كە بارەگای بەغدای پارتیان سوتاند؟

2020.10.17 - 11:24
ڕەبعەڵڵا كێن كە بارەگای بەغدای پارتیان سوتاند؟

ناس كورد-

لەدوای كوژرانی قاسم سلێمانی و ئەبو مەهدی موهەندیسەوە چەندین گروپ و ناونیشانی نوێی گروپی چەكداریی ڕاگەیەنراون كە یەكێكیان كۆمەڵی "ڕەبعەڵڵان" كە ئەمڕۆ هەڵیان كوتایە سەر بارەگای پارتی دیموكراتی كوردستان لە بەغدا.

 

بەپێی زانیارییەكانی "ناس كورد"، ڕەبعەڵڵا جیاواز لەو گروپە نوێیانەی نزیك لە ئێران كە تەنها بەیاننامەیان هەیە، چەندین گەنج و ئەندامیان بە كردەیی هەیە كە لە سوتاندنی بارەگای كەناڵی UTVی سەرمەدی كوڕی خەمیس خەنجەر و هەڵكوتانە سەر نوسینگەی بەغدای MBC عێراق بەشدارییان كردووە، لە زیارەتی چلەی ئیمام حوسێنی ئەمساڵیشدا بەشێوەیەكی فراوان لە شەقامەكانی كەربەلادا بڵاوەیان كردبوو.


پێشتر میدیا ئەمەریكییەكان لەوانەش ئەلحوڕە لە (9 تشرینی یەكەمی 2020) لەزاری زیاتر لە سەرچاوەیەكی ئاگادارەوە بڵاویان كردەوە كە "ڕەبعەڵڵا" سەر بە "بزوتنەوەی عەسایب" ن  كە قەیس خەزعەلی سەرۆكایەتی دەكات و پێشتر لە سەدر جیا بووەتەوە، لەئێستاشدا جگە لە هێزی چەكداریی لەناو حەشدی شەعبی 15 كورسی لەناو پەرلەمانی عێراق هەیە.


بەپێی توێژینەوەیەكی گۆڤاری ئایندەناسی كە سەنتەری لێكۆڵینەوەی ئایندەیی دەری دەكات (ژمارە 3)، گروپی "ڕەبعەڵڵا" دەچێتەوە سەر مۆدێلی نوێی گروپە چەكدارەكانی سەر بە ئێران كە پێشەنگیان بریتییە لە "عصبة الثائرين"، "أصحاب الكهف" و "قبضة المهدي"، سەرجەم ئەمانەش بە نوێترین مۆدێلی حەشدی وەلائی لەقەڵەم دەدرێن، كە سەرچاوە هەواڵگرییەكانی ئەمەریكا بە لقی میلیشیا و گروپە چەكدارە ناسراوەكانی ئێرانیان دەزانێت كە لە ترسی تۆڵەلێكردنەوەی ڕاستەوخۆیان پەنایان بۆ خۆحەشاردان لەژێر ناوی نوێدا بردووە.

 

هەروەها ئەم مۆدێلە كاركردنە لە گەڕانەوە دەچێت بۆ تەكنیكی ساڵانی بەر لە كشانەوەی سوپای ئەمەریكا و دەركەوتنی داعش كە بە "تیمەكانی مەرگ" دەناسران.


هەندێ سەرچاوەش لە زاری كادیرانی حزبوڵڵای عێراقەوە ئەوەیان پشت ڕاست كردووەتەوە كە ئەم "گرووپە نەناسراوانە" لەلایەن ئەوانەوە بە ئاگاداریی بزوتنەوەی عەسایب و نوجەبا و گروپە دژەئەمەریكاییەكانی تر دامەزراون، شاردنەوەشی بۆ دوركەوتنەوەیە لە پەرچەكرداری حكومەت.


پەیوەستنەبوونی ئەم گروپانەش بە هیچ گروپێكی ناسراوەوە، تێپەڕاندنی پڕۆسەی سیاسیی عێراق و تێپەڕاندنی چوارچێوەی فەڕمیی حەشدی شەعبییە كە لە ڕووی تێورییەوە بەپێی یاسای (40)ی ساڵی 2016 دەبێت سەر بە فەرماندەی گشتیی هێزە چەكدارەكانی عێراق بێت.

 

رۆژنامەی ئەخباری لوبنانی سەر بە حیزبوڵڵای لوبنان لە راپۆرتێكدا ئ (29 ئەیلولی 2020) بڵاویكردەوە ئەو گروپانەی هێرشەكانی ناو بەغدا ئەنجام دەدەن و ناوی نوێ بۆ خۆیان ڕادەگەیەنن رووكار و درێژكراوەی ئەو گرووپە چەكدارە ناسراوانەن كە لەلایەكیترەوە بەیاننامەی رەتكردنەوەی بەشداری لەو هێرشانە دەردەكەن. 

 

ئەمڕۆ (شەممە، 17ی تشرینی یەکەمی 2020) لایەنگرانی حەشدی شەعبی بەربەستی ئەمنییان تێپەڕاند و چوونە ناو بارەگای لقی پارتی لە بەغدا و بارەگاکەیان سوتاند.

 

خۆپیشاندانی لایەنگرانی حەشدی شەعبی لە دژی لێدوانەکانی هۆشیار زێباری، ئەندامی مەکتەبی سیاسیی پارتییە لەبارەى هێزەکانی حەشدی شەعبی. 

me_ga.php?id=1252me_ga.php?id=1251me_ga.php?id=1253
سەرەتا هێزێکی ئەمنی زۆر لە بەردەم بارەگای لقی پارتی دانرابوون، بەڵام لایەنگرانی حەشد بەربەستەکەیان تێپەڕاند و چەندین دروشم دەڵێنەوە دژی پارتی و هۆشیار زێباری کە "سوکایەتی بە هێزەکانی حەشدی شەعبی کردبوو."

 

بەپێى گرتە ڤیدیۆیەک کە دەستى ناس کورد کەوتووە، لایەنگرانی حەشدی شەعبی لە بەردەم بارەگاکە ئاڵای کوردستان و وێنەی هۆشیار زێباری، وەزیری پیشووتری دارایی عێراقیان سوتاند.  


  

 

  

خۆپیشاندەران دروشم لەدژى پارتى دەڵێنەوە  و ئیدانەى لێدوانەکەى ئەو بەرپرسەى پارتى دەکەن.  

  

توڕەبونى لایەنگرانى حەشدى شەعبى دواى ئەوە هات، هۆشیار زێبارى وەزیرى لەسەر کارلابراوى دارایى عێراق لەمیانەى چاوپێکەوتنێکى تەلەفزیۆنیدا ئەوەى ڕاگەیاند:" ئەو گروپانەى هێرشیان کردە سەر هەولێر هەر ئەو گروپانەن کە لەبەغدا هێرش دەکەنە سەر دیپلۆماتکاران "