گه‌ڕان

Shadow Shadow
سیاسه‌تی

ئۆکتۆبەر و ئاب؛ ئایکۆنى گرژییەکانى پارتى و یەکێتى

ڕۆژنامەى ’’خەبات’’ى فەرمى پارتى لاپەڕەى یەکەمى ڕۆژنامەکەى بە سپێتى هێشتووەتەوە

2020.10.17 - 10:40
ڕۆژنامەى ’’خەبات’’ى فەرمى پارتى لاپەڕەى یەکەمى ڕۆژنامەکەى بە سپێتى هێشتووەتەوە

ناس کورد-

ساڵیادى ڕووداوەکانى 16ى ئۆکتۆبەر شەڕێکى گەرمى میدیایی لەنێوان پارتى و یەکێتیدا دروستکرد، کە پەڕییەوە بۆ  وەڵام و وەڵامکارى لەنێوان تیمەکانیان لە حکومەت.

 

ڕۆژنامەى "خەبات" ى ئۆرگانى فەرمى پارتى، لاپەڕەى یەکەمى ڕۆژنامەکەى بە سپێتى هێشتووەتەوە و نوسیویەتى ئەوە ناڕەزاییە بەرانبەر "خیانەتى 16ى ئۆکتۆبەر".

 

ئەوە تەنها هەڵوێستى پارتى نەبوو لەو بارەیەوە، بەڵکو بەدرێژایی دوێنێ شەپۆلێک پەیام و لێدوان و راگەیەنراو لەسەر ئاستى باڵا و بەرپرسانى پارتى لەو بارەیەوە بڵاوکرایەوە.

me_ga.php?id=1254

لەبەرانبەر ئەوەدا میدیا فەرمییەکانى یەکێتى و بەرپرسانیان دۆسیەى 31ى ئابیان وروژاند، وەک وەڵامێک بۆ پارتى و خوێندنەوەى جیاوازیان بۆ رووداوەکانى 16ى ئۆکتۆبەر کرد.

 

رۆژنامەى کوردستانى نوێی ئۆرگانى یەکێتى ئەگەرچى چاپى کاغەزى رۆژانى هەینى دەرناچێت، بەڵام ماڵپەڕەکەى تەرخانکردووە بۆ باسکردن لەو پرسە و وەڵامدانەوەى پارتى.

 

وەڵامە توندەکانى هەردوولا بۆ یەکترى لەئاستى میدیاییدا نەوەستان، بەڵکو پەڕییەوە بۆ وەڵام و وەڵامکارى لەنێوان تیمە وەزارییەکانیان لە حکومەت، دواى ئەوەى مەسرور بارزانى سەرۆکى حکومەت پەیامێکى لەو بارەیەوە بڵاوکردەوە.

 

درەنگانى شەوى رابردوو تیمى یەکێتى لە حکومەت لە پەیامێکدا رایگەیاند، ئەگەر بڕیارە‌ حکومەت ھە‌ڵوێست لەسەر رووداو و کارەساتەکان وەربگرێت، پێویستە باس لەسەرجەم روداوەکان وەک یەک بکات بە رووداوە‌كانی ٣١ی ئاب و کارەساتی شەنگال جینۆسایدی ئێزدییەکان. 

 

لەبەرانبەریشدا تیمى پارتى لەحکومەت وەڵامى تیمى یەکێتى دایەوە و دەڵێت ڕووداوی "خاکفرۆشتن" و لە دەستدانی نیوەی خاکی کوردستان لە 16 ئۆکتۆبەر، زۆر جیاوازە "لە 31 ی ئابی پیرۆز". 

 

شەڕى میدیایی پارتى و یەکێتى و میدیا سێبەرەکانیان لەساڵیادى رووداوەکانى 31 ی ئاب و  16 ئۆکتۆبەر ساڵانە بەشێوازى جیاجیا دوبارە دەبێتەوە، بەڵام ئەوەى دواترینیان گەرمتر بوو.

 

ڕووداوەکانی 16 ئۆکتۆبەر نزیكەی سێ هەفتە لەدوای ئەنجامدانی ڕیفراندۆمی سەربەخۆیی هەرێمی كوردستان لە (25 ئەیلولی 2017) ڕوویدا كە بەهۆیەوە لایەنە كوردییەكان (پارتی و یەكێتی) دەسەڵاتیان بەسەر ڕوبەرێكی بەرفراوانی ناوچەی جێناكۆكدا (140) لەدەستدا لەبەرژەوەندی هێزە فیدراڵییەكانی عێراق و حەشدی شەعبی لەپێش هەموویانەوە شاری كەركوك كە پێگەیەكی ستراتیژی و مێژویی هەیە.

 

 لە ئێستاشدا هۆكارەكانی ئەم پاشەكشە و نسكۆیە بووەتە کەرەستەیەکی گەورەی شەڕی میدیایی و ململانێی میدیای فەرمی و سێبەری پارتی و یەكێتی.

 

هەروەها روداوەکانى 31 ی ئابى 1996 کە لەسەر داواى پارتى سوپاى عێراق هێرشیکردە سەر هەولێر و یەکێتى لەو شارە دەرکرد، بەهەمان شێوە بووەتە کەرەستەیەکی گەورەی شەڕی میدیایی نێوانیان.