گه‌ڕان

Shadow Shadow
سیاسه‌تی

پەروەردەى سلێمانى دابەشکردنى موچەى دواخست

2020.10.16 - 17:41
پەروەردەى سلێمانى دابەشکردنى موچەى دواخست

ناس کورد-

 

دابەشکردنى موچەى بەڕێوەبەرایەتی پەروەردەی رۆژئاوای سلێمانی دواخرا کە بڕیاربوو سبەینێ دابەشبکرێت.

 

 

بەڕێوەبەرایەتی پەروەردەی رۆژئاوای سلێمانی لە ئاگادارییەکدا لەلاپەڕەى فەرمى خۆى لە فەیسبوک (16ی تشرینی یەكەمی 2020)، سەرجەم بەڕێوەبەری قوتابخانە و خوێندنگە و هۆبەکانی سەر بە پەروەردە ئاگاداردەکاتەوە کە سبەینێ شەممە (17/10/2020) لیستی موچە ئامادە نابێت لەبەر ئەو گۆڕانکارییەی بەسەر مانگی دابەشکردنەکەدا هاتووە.

 

ئاماژەى بەوەشکردووە، وەک دەزانن هۆبەی ژمێریاری مووچەو وردبینی و هۆبەکانی دیکەی پەیوەست بە مووچە بەردەوامن لەکار کردن و تەنانەت هەتا شەو درەنگ دەمێننەوە، بەڵام لەبەر زۆری سەرمووچەو گواستنەوەی هاتوو گواستنەوەی ڕۆشتوو و خانەنشینی کەڕێژەیەکی زۆرن کاتی دەوێت هەتا ئامادە دەکرێت. بۆیە ڕۆژی یەک شەممە لیستی مووچە دابەشدەکەین بۆ ئەوەی ڕێککارییەکان و مافی ئەوانی دیکەش دابین بکەین".

 

بەهۆى گۆڕینى لیستى موچەى ئەم مانگەوە، دابەشکردنى موچە خاوبوونەوەى بەخۆوە بینیوە. 15ی تشرینی یەكەمی 2020، مووچەی مانگی ئەیلولی وەزارەتی تەندروستی حكومەتی هەرێم وەك یەكەمین وەزارەت دابەشکرا، بەڵام بەشێك لەفەرمانگەكانی سەر بەو وەزارەتە لەشاری سلێمانی مووچەكانیان وەرنەگرتووە.    

 

هەروەها دابەشکردنى موچەى کەس و کاری ئەنفالکراوان و شەهیدانی کەرکوک لەچەمچەماڵ کە بڕیاربوو سبەینێ دابەشبکرێت دواخرا.  

  

بەپێی ئاگادارییەکى بانکى چەرموو کە لە لاپەڕەى فەرمى قایمقامیەتى چەمچەماڵ لە فەیسبوک بڵاوکراوەتەوە (16 تشرینی یەكەمی 2020)، بەهۆی تەواونەبوونی لیستی موچەی کەس و کاری ئەنفالکراوان و شەهیدانی کەرکوکەوە، سبەی شەممە موچەکانیان دابەش ناکرێت ڕۆژی یەکشەممە دەست بە دابەشکردنی دەکرێت.