گه‌ڕان

Shadow Shadow
سیاسه‌تی

’’هەرێم و بەغدا لەسەر ناوی قائیمقامی نوێی شنگال ڕێککەوتن’’

2020.10.15 - 22:00
’’هەرێم و بەغدا لەسەر ناوی قائیمقامی نوێی شنگال ڕێککەوتن’’

ناس کورد-

بەرپرسی لقی پارتی لە شنگال دەڵێت، حکومەتی هەرێم و بەغدا لەسەر ناوی کەسێک بۆ قائیمقامی شنگال ڕێککەوتوون و لەنێو کوردیشدا ئەو پۆستە هی پارتییە.

 

قادر قاچاخ، بەرپرسی لقی پارتی لە شنگال (پێنجشەممە 15ی تشرینی یەکەمی 2020) بە ماڵپەڕی فەرمیی حزبەکەی ڕاگەیاند: ''هەردوو حکومەتی هەرێم و عێراق لەسەر ئەوە ڕێک کەوتوون 'خدر ڕەشۆ' کە پێشتر بەڕێوەبەری ناحیەی سنوونێ بوو بکرێتە قائیمقامی نوێی شنگال."

 

وتیشی، ئەوان چاوەڕوانی هەنگاوی پراکتیکیی حکومەتی عێراقن تا هێزە چەکدارەکان بکرێنەدەرەوە و ئیدارەی نوێی شنگال دەست بە کارەکانی بکات.

 

بەپرسی لقی پارتی لە شنگال ئاماژەی بەوەشكردووە: "قائیمقام پشکی کوردە و لەنێو کوردیشدا هی پارتییە و پارتی بە ئیستحقاقی خۆی دەزانێت، ئێمە چاوەڕوانی کرداری حکومەتی عێراقین تا ئەو هێزە نایاساییانە دەربکرێن و ئیدارەی نوێ دەستبەکار بێت."

 

ڕۆژی ھەینی (9ی تشرینی یەکەمی 2020)، ھەردوو حکومەتی عێراق و ھەرێمی کوردستان ڕێککەوتنێکیان بۆ ئاسایی کردنەوە دۆخی شنگال واژوو کرد و ڕێککەوتنەکەش بە مێژووی وەسفکرا.      

 

بەپێی دەقی ڕێککەوتنی نێوان حکومەتی عێراق و ھەرێمی کوردستان بەناوی "ڕێکەوتنی گەڕانەوەی سەقامگیری و ئاساییکردنەوەی بارودۆخ لە قەزای شنگال" کە بە سێ تەوەر جیاکراوەتەوە و کۆپیەکی دەست ناس کورد کەوتووە، لە تەوەری ئیدارییدا ھاتووە، قائیمقامێکی نوێ بۆ شنگال دیاریدەکرێت کە کەسێکی دەستپاک و پیشەیی و سەربەخۆ بێت و قبوڵکراو بێت، لەلایەن لیژنەی پێکھێنراوی ھاوبەش پۆستە ئیدارییەکانی تر دادەنرێت و پێویستە پیشەیی بوون و دەستپاکی و پێکھاتەی کۆمەڵایەتی لەبەرچاو بگیرێت.     

 

لە دەقی ڕێککەوتنەکە کە لە بەرورای 1ی تشرینی یەکەمی 2020 لەلایەن حەمید ڕەشید فلەیح، وەکیلی سەرۆکی دەزگای ئاسایشی نیشتمانی بە نوێنەرایەتی حکومەتی ناوەند و ڕێبەر ئەحمەد، وەزیری ناوخۆی ھەرێم واژۆکراوە، سەبارەت بە میحوەری ئەمنی ڕونکراوەتەوە، پۆلیسی ناوخۆیی و دەزگای ئاسایشی نیشتمانی و ھەواڵگری بەرپرسیارێتی ئاسایشی قەزاکە دەگرنە ئەستۆ.     

 

باسلەوەشکراوە، سەرجەم پێکھاتە چەکداریەکانی تر دەکرێنە دەرەوە و ٢٥٠٠ ئەندام بۆ ھێزی ئاسایشی ناوخۆیی دادەنرێن و ئاوارەکانی خێوەتگەکان کە خەڵکی شنگالن بەشداریان پێدەکڕێت، ھەروەھا کۆتایی بەبوونی پەکەکە لە شنگال و دەوروبەری دەھێنرێت و بونیان نامێنێت لەناوچەکە.